മുന്നണി മാറ്റം: കേരള കോണ്ഗ്രസില് 'ക്ലൈമാക്സ്' നാളെ; ജോസ് കെ മാണിയെ കുഴപ്പിച്ച് അണികളും എംഎല്എമാരും; മുന്നണി വിടുമോ ഇല്ലയോ? ജോസ് കെ മാണിക്കുപോലും ഉറപ്പില്ലാത്ത അവസ്ഥ; കേരള കോണ്ഗ്രസില് മാണിയില് പുകയുന്ന രാഷ്ട്രീയ നാടകം ഇങ്ങനെ
തിരുവനന്തപുരം: കേരള രാഷ്ട്രീയത്തെ മുള്മുനയില് നിര്ത്തി കേരള കോണ്ഗ്രസ് (എം) എല്ഡിഎഫ് വിടുമോ ഇല്ലയോ എന്ന സസ്പെന്സ് തുടരുന്നു. മുന്നണി മാറ്റ ചര്ച്ചകള്ക്ക് താല്ക്കാലിക വിരാമമിട്ട് ചെയര്മാന് ജോസ് കെ. മാണി തന്നെ നേരിട്ട് രംഗത്തെത്തി 'ഇടതുമുന്നണിയില് ഉറച്ചുനില്ക്കുന്നു' എന്ന് പ്രഖ്യാപിച്ചെങ്കിലും, പാര്ട്ടിക്കുള്ളിലെ ഭിന്നതയും യുഡിഎഫിന്റെ തന്ത്രപരമായ നീക്കങ്ങളും അണികളെ ആശയക്കുഴപ്പത്തിലാക്കിയിരിക്കുകയാണ്. മുന്നണി വിടുമോ എന്ന് ജോസ് കെ മാണിയ്ക്ക് പോലും ഉറപ്പു പറയാന് കഴിയാത്ത അവസ്ഥ.
വരാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായി കേരളം ഉറ്റുനോക്കുന്ന ഏറ്റവും വലിയ രാഷ്ട്രീയ സസ്പെന്സായി കേരള കോണ്ഗ്രസ് (എം) മുന്നണി മാറ്റം മാറുകയാണ്. ജോസ് കെ. മാണി എല്ഡിഎഫിനൊപ്പം എന്ന് പുറമേ പറയുമ്പോഴും, പാര്ട്ടിക്കുള്ളിലെ എംഎല്എമാരുടെ സമ്മര്ദ്ദവും യുഡിഎഫിന്റെ ക്ഷണം പടിവാതില്ക്കല് നില്ക്കുന്നതും ജോസിനെ പ്രതിസന്ധിയിലാക്കുന്നു. ജോസ് കെ. മാണിയുടെ ഫെയ്സ്ബുക് പോസ്റ്റാണ് ചര്ച്ചകള്ക്ക് പുതിയ മാനം നല്കിയത്. ആദ്യം വന്ന പോസ്റ്റില് 'എല്ഡിഎഫ്' എന്ന വാക്ക് പരാമര്ശിക്കാതെ പാര്ട്ടി ഒറ്റക്കെട്ടായി നീങ്ങുമെന്ന് മാത്രം എഴുതി. എന്നാല് ഒരു മണിക്കൂറിന് ശേഷം അത് തിരുത്തി 'ഇടതുമുന്നണിക്ക് ഒപ്പം' എന്ന് കൂട്ടിച്ചേര്ത്തു. ഈ തിരുത്തല് വെറുമൊരു സാങ്കേതിക പിഴവല്ലെന്നും പാര്ട്ടിക്കുള്ളിലെ കടുത്ത അഭിപ്രായ വ്യത്യാസത്തിന്റെ പ്രതിഫലനമാണെന്നും രാഷ്ട്രീയ നിരീക്ഷകര് വിലയിരുത്തുന്നു.
തദ്ദേശ തിരഞ്ഞെടുപ്പിലെ യുഡിഎഫിന്റെ വിജയ കണക്കുകള് പാര്ട്ടി എംഎല്എമാരെ ഭയപ്പെടുത്തുന്നുണ്ട്. പല മണ്ഡലങ്ങളിലും യുഡിഎഫിന് ലഭിച്ച വോട്ടുകളുടെ വര്ദ്ധനവ് വരാനിരിക്കുന്ന നിയമസഭാ തിരഞ്ഞെടുപ്പില് തങ്ങളെ തോല്പ്പിക്കുമെന്ന് അവര് ഭയപ്പെടുന്നു. പാര്ലമെന്ററികാര്യ യോഗത്തില് ചില എംഎല്എമാര് 'എല്ഡിഎഫില് തുടരുന്നത് ആത്മഹത്യാപരമായിരിക്കും' എന്ന് തുറന്നടിച്ചതായാണ് വിവരം. പ്രമോദ് നാരായണ് എംഎല്എ തന്നെ സഭകളുടെ സമ്മര്ദ്ദമുണ്ടെന്ന് പരസ്യമായി സമ്മതിച്ചിട്ടുണ്ട്. കേരള കോണ്ഗ്രസ് കൈവിട്ടു പോകുമെന്ന് ഭയന്ന് സിപിഎമ്മും സര്ക്കാരും അതിവേഗ കരുനീക്കങ്ങളാണ് നടത്തുന്നത്.
തിരുവനന്തപുരത്ത് കെ.എം. മാണിക്ക് സ്മാരകം പണിയാന് 25 സെന്റ് ഭൂമി അനുവദിക്കാനുള്ള മന്ത്രിസഭാ തീരുമാനം ജോസ് കെ. മാണിയെ തൃപ്തിപ്പെടുത്താനുള്ള നീക്കമായാണ് കാണപ്പെടുന്നത്. മന്ത്രി വി.എന്. വാസവന് കേരള കോണ്ഗ്രസ് നേതാക്കളുമായി നിരന്തരം സമ്പര്ക്കം പുലര്ത്തുന്നുണ്ട്. ദിവസങ്ങള്ക്കുള്ളില് ഒരു 'വിസ്മയം' സംഭവിക്കുമെന്ന പ്രതിപക്ഷ നേതാവ് വി.ഡി. സതീശന്റെ പ്രസ്താവന യുഡിഎഫിലേക്കുള്ള പാലം തയ്യാറാണെന്ന സൂചനയാണ് നല്കുന്നത്. എന്നാല്, ജോസ് കെ. മാണി യുഡിഎഫിലേക്ക് മടങ്ങിയെത്തിയാല് പാലാ സീറ്റ് വിട്ടുനല്കേണ്ടി വരുമോ എന്ന ഭയത്തിലാണ് മാണി സി. കാപ്പന്. കാപ്പന് ഇതിനകം മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടിയുമായി കൂടിക്കാഴ്ച നടത്തി പാലാ തനിക്ക് വേണമെന്ന ആവശ്യം ഉന്നയിച്ചു കഴിഞ്ഞു.
കേരളാ കോണ്ഗ്രസിന്റെ നാളെ ചേരുന്ന പാര്ട്ടി സ്റ്റിയറിങ് കമ്മിറ്റി യോഗത്തോടെ ചിത്രം വ്യക്തമാകുമെന്നാണ് കരുതപ്പെടുന്നത്. പാര്ട്ടിയില് പിളര്പ്പുണ്ടാകാതെ എല്ലാവരെയും കൂടെ നിര്ത്തുക എന്ന വലിയ വെല്ലുവിളിയാണ് ജോസ് കെ. മാണിക്ക് മുന്നിലുള്ളത്. അഞ്ച് എംഎല്എമാരും ഒപ്പമുണ്ടാകുമെന്ന് അദ്ദേഹം ആവര്ത്തിക്കുമ്പോഴും ഓരോ എംഎല്എമാരുടെയും നിലപാട് നിര്ണ്ണായകമാകും. കേരള കോണ്ഗ്രസ് (എം) എല്ഡിഎഫ് വിട്ട് യുഡിഎഫിലേക്ക് മടങ്ങുമോ എന്ന കാര്യത്തില് നാളെ ചേരുന്ന സ്റ്റിയറിങ് കമ്മിറ്റി യോഗം അന്തിമ ചിത്രം വ്യക്തമാക്കും. നിലവില് എല്ഡിഎഫില് ഉറച്ചുനില്ക്കുന്നു എന്ന് ജോസ് കെ മാണി പറയുന്നുണ്ടെങ്കിലും പാര്ട്ടിക്കുള്ളിലെ സമ്മര്ദ്ദം മുറുകുകയാണ്.
ജോസ് കെ മാണിയുടെ സോഷ്യല് മീഡിയ പോസ്റ്റിലെ മാറ്റങ്ങള് രാഷ്ട്രീയ കേന്ദ്രങ്ങളില് വലിയ ചര്ച്ചയായിട്ടുണ്ട്. ആദ്യം പുറത്തുവിട്ട പോസ്റ്റില് 'ഇടതുമുന്നണി' എന്ന വാക്ക് പരാമര്ശിക്കാതിരുന്നത് ബോധപൂര്വ്വമാണോ എന്ന സംശയം ശക്തമാണ്. ഒരു മണിക്കൂറിന് ശേഷം പോസ്റ്റ് തിരുത്തി 'ഇടതുമുന്നണിക്കൊപ്പം' എന്ന് ചേര്ത്തത് സിപിഎം നേതൃത്വത്തിന്റെ സമ്മര്ദ്ദം മൂലമാണെന്നും സൂചനയുണ്ട്. കെ.എം മാണിക്ക് തലസ്ഥാനത്ത് സ്മാരകം പണിയാന് 25 സെന്റ് ഭൂമി അനുവദിച്ചത് സിപിഎമ്മിന്റെ അനുനയ നീക്കത്തിന്റെ ഭാഗമാണ്.
