വരാനിരിക്കുന്ന ചിത്രത്തിന്റെ പ്രൊമോഷനുകൾക്കില്ല, ടെൻഷനുമില്ല; ബർലിനിൽ കറങ്ങിയടിച്ച് പ്രണവ് മോഹൻലാൽ; 'പുതിയ പടം ഇറങ്ങുന്നത് അറിഞ്ഞോ എന്തോ'യെന്ന് ആരാധകർ

ബെർലിൻ: ജർമ്മനിയിലെ ബെർലിൻ നഗരത്തിലെ തെരുവോരങ്ങളിൽ യാതൊരു താരപരിവേഷവുമില്ലാതെ കറങ്ങിനടക്കുന്ന നടൻ പ്രണവ് മോഹൻലാലിന്റെ വീഡിയോ സമൂഹമാധ്യമങ്ങളിൽ വൈറൽ. ഏറ്റവും പുതിയ ചിത്രമായ 'ഡീസ്‌ ഐറേ' റിലീസ് അടുത്തിരിക്കെയാണ് താരത്തെ ആരാധകർ കണ്ടുമുട്ടിയത്. സിനിമകളുടെ പ്രൊമോഷനുകളുടെ ഭാഗമായി അഭിമുഖങ്ങളിലും മറ്റും സജീവമാകുന്ന മറ്റ് താരങ്ങളിൽ നിന്ന് വ്യത്യസ്തനായി, റിലീസിന്റെ സമ്മർദ്ദങ്ങളില്ലാതെ സമയം ചെലവഴിക്കുന്ന പ്രണവിനെ കണ്ട അമ്പരപ്പിലാണ് ആരാധകർ.

ജർമ്മനിയിലെ ബെർലിനിൽ വെച്ച് യാദൃശ്ചികമായി പ്രണവിനെ കണ്ടുമുട്ടിയ കുറച്ച് മലയാളികളാണ് അദ്ദേഹത്തോടൊപ്പമുള്ള വീഡിയോ പങ്കുവെച്ചത്. യുവാക്കളുമായി വളരെ സൗഹൃദപരമായി സംസാരിക്കുകയും അവരോടൊപ്പം ചിത്രങ്ങൾ എടുക്കുകയും ചെയ്യുന്ന പ്രണവിന്റെ വീഡിയോ ഇതിനോടകം തന്നെ വൈറലായി കഴിഞ്ഞു. 'രാജാവിന്റെ മകൻ... ദ് പ്രിൻസ്' എന്ന അടിക്കുറിപ്പോടെയാണ് യുവാക്കൾ ഈ വീഡിയോ സോഷ്യൽ മീഡിയയിൽ പങ്കുവെച്ചിരിക്കുന്നത്. പ്രണവിനോടൊപ്പം സമയം ചെലവഴിക്കാൻ കഴിഞ്ഞതിന്റെ സന്തോഷം അവരുടെ മുഖങ്ങളിൽ വ്യക്തമായി കാണാം.

വീഡിയോ കണ്ട ആരാധകർ പ്രണവിന്റെ ലാളിത്യത്തെയാണ് പ്രധാനമായും പ്രശംസിക്കുന്നത്. 'ഇങ്ങനെയൊക്കെയുള്ള മനുഷ്യരുണ്ടോ?' എന്ന് അത്ഭുതത്തോടെ പലരും ചോദിക്കുന്നു. 'പുതിയ പടം ഇറങ്ങുന്നത് അറിഞ്ഞോ എന്തോ,' എന്ന തരത്തിലുള്ള ആകാംഷ നിറഞ്ഞ കമന്റുകളും ഉയരുന്നുണ്ട്. 'ഒരു താരജാഡയുമില്ലാത്ത രാജാവിന്റെ മകൻ' എന്നാണ് ഒരാരാധകൻ പ്രണവിനെ വിശേഷിപ്പിച്ചത്. പ്രണവിനെ നേരിട്ട് കാണാൻ താല്പര്യമുണ്ടെന്നും പലരും കമന്റ് ചെയ്തിട്ടുണ്ട്.

പ്രണവ് മോഹൻലാൽ നായകനാകുന്ന പുതിയ ചിത്രം 'ഡീസ്‌ ഐറേ' (Dies Iraé) ഒക്ടോബർ 31ന് തിയേറ്ററുകളിലെത്തുമെന്നാണ് റിപ്പോർട്ടുകൾ. 'ഭ്രമയുഗം', 'ഭൂതകാലം' എന്നീ വിജയകരമായ ഹൊറർ ത്രില്ലറുകൾക്ക് ശേഷം സംവിധായകൻ രാഹുൽ സദാശിവൻ ഒരുക്കുന്ന ചിത്രമാണിത്. ചിത്രത്തിന്റെ ടീസർ ഇതിനോടകം തന്നെ പ്രേക്ഷകശ്രദ്ധ നേടിക്കഴിഞ്ഞു.