ഒരു കൊളുത്തിന്റെ ബലത്തിൽ ആളുകളെ ഇരുത്തി ആട്ടം; കാൽ കൊണ്ട് പ്രവര്‍ത്തിപ്പിച്ച് രീതി; പൊടുന്നനെ ഉഗ്ര ശബ്ദം; ആളുകൾ കുതറിയോടി; കൂറ്റന്‍ ഊഞ്ഞാൽ ത‍കർന്ന് അപകടം; വീഡിയോ വൈറൽ
റായ്‌സെൻ: മധ്യപ്രദേശിലെ റായ്‌സെൻ ജില്ലയിൽ നവരാത്രി ആഘോഷത്തിനിടെ സ്ഥാപിച്ചിരുന്ന കൂറ്റൻ ഊഞ്ഞാൽ പ്രവർത്തിക്കുന്നതിനിടെ തകർന്നു വീണു. ഖണ്ഡേര ധാം ക്ഷേത്രത്തിൽ നടന്നുവന്ന ആഘോഷങ്ങളുടെ ഭാഗമായി ഒരുക്കിയ ഭീമാകാരമായ ഊഞ്ഞാലിന്റെ ഒരു ഭാഗം പൊട്ടിത്തെറിച്ചതാണ് അപകടത്തിന് കാരണം. ഊഞ്ഞാലിൽ ഉണ്ടായിരുന്നവരെ പോലീസ് ഉദ്യോഗസ്ഥരുടെയും നാട്ടുകാരുടെയും സഹായത്തോടെ സുരക്ഷിതമായി താഴെയിറക്കി. ഈ അപകടത്തിൽ ആർക്കും കാര്യമായ പരിക്കുകളില്ല എന്നത് ആശ്വാസകരമാണ്.
സംഭവത്തിന്റെ ദൃക്‌സാക്ഷികൾ പറയുന്നതനുസരിച്ച്, ഊഞ്ഞാൽ പ്രവർത്തിച്ചുകൊണ്ടിരിക്കെ പെട്ടെന്ന് ഒരു കൊളുത്ത് പൊട്ടിത്തെറിക്കുകയായിരുന്നു. ഇതോടെ ഊഞ്ഞാലിൽ ഉണ്ടായിരുന്നവർ പരിഭ്രാന്തരായി നിലവിളിക്കാൻ തുടങ്ങി. എന്നാൽ, ആഘോഷങ്ങളുടെ ഭാഗമായി ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥരും പ്രദേശവാസികളും ഉടൻ ഇടപെട്ട് ഊഞ്ഞാലിൽ കുടുങ്ങിയവരെ സുരക്ഷിതമായി താഴെയിറക്കി. ദേവനഗർ പോലീസ് സ്റ്റേഷൻ ഇൻ-ചാർജ് അറിയിച്ചതനുസരിച്ച്, "കാലുകൊണ്ട് പ്രവർത്തിപ്പിച്ചിരുന്ന ഒരു ഊഞ്ഞാലായിരുന്നു ഇത്. കൊളുത്ത് പൊട്ടിയതാണ് തകരാൻ കാരണം. നിലവിൽ ഊഞ്ഞാൽ സ്ഥലത്ത് നിന്ന് നീക്കം ചെയ്തിട്ടുണ്ട്."
നവരാത്രിയോടനുബന്ധിച്ച് ക്ഷേത്ര പരിസരത്ത് നൂറുകണക്കിന് സ്റ്റാളുകൾ സ്ഥാപിച്ചിരുന്നു. അപകടസമയത്ത് ആയിരക്കണക്കിന് ആളുകൾ ക്ഷേത്ര പരിസരത്തുണ്ടായിരുന്നു. പോലീസ് ഉദ്യോഗസ്ഥരും നാട്ടുകാരും ചേർന്ന് ഊഞ്ഞാലിൽ കുടുങ്ങിയവരെ രക്ഷപ്പെടുത്തിയതിനെത്തുടർന്ന് ക്ഷേത്ര പരിസരം സാധാരണ നിലയിലേക്ക് നീങ്ങി.
അപകടത്തിന് പിന്നാലെ ഊഞ്ഞാൽ ഒരു ഭാഗത്തേക്ക് ചരിഞ്ഞിരിക്കുന്നതും ആളുകൾ പരിഭ്രാന്തരായി രക്ഷപ്പെടാൻ ശ്രമിക്കുന്നതിന്റെയും ദൃശ്യങ്ങൾ സമൂഹ മാധ്യമങ്ങളിൽ വൈറലായി. പോലീസ് ഉദ്യോഗസ്ഥർ ഊഞ്ഞാലിന് മുകളിലേക്ക് കയറി ആളുകളെ രക്ഷപ്പെടുത്തുന്നതിന്റെ വീഡിയോകളും പ്രചരിക്കുന്നുണ്ട്.