മദ്യപാനിയായ ഭര്‍ത്താവിനെ വിഷം കൊടുത്തു കൊന്നു; പ്രായപൂര്‍ത്തിയാകാത്ത വിദ്യാര്‍ഥികളുടെ സഹായത്തോടെ മൃതദേഹം പെട്രോള്‍ ഒഴിച്ച് കത്തിച്ചു: 24കാരിയായ അധ്യാപിക അറസ്റ്റില്‍
മദ്യപാനിയായ ഭര്‍ത്താവിനെ വിഷം കൊടുത്തു കൊന്നു; 24കാരിയായ അധ്യാപിക അറസ്റ്റില്‍
മുംബൈ: മദ്യപാനിയായ ഭര്‍ത്താവിനെ വിഷം കൊടുത്ത് കൊലപ്പെടുത്തിയ ശേഷം മൃതദേഹം പെട്രോള്‍ ഒഴിച്ച് കത്തിച്ച കേസില്‍ ഭാര്യ അറസ്റ്റില്‍. സ്‌കള്‍ പ്രിന്‍സിപ്പലായ 24കാരിയാണ് ഭര്‍ത്താവിനെ കൊലപ്പെടുത്തിയ ശേഷം പ്രായപൂര്‍ത്തിയാകാത്ത വിദ്യാര്‍ഥികളുടെ സഹായത്തോടെ മൃതദേഹം കത്തിച്ചത്. നാഗ്പുര്‍ യവത്മാളിലെ സണ്‍റൈസ് ഇംഗ്ലിഷ് മീഡിയം സ്‌കൂളിലെ അധ്യാപകനായ ശാന്തനു ദേശ്മുഖാണ് (32) കൊല്ലപ്പെട്ടത്. ഇതേ സ്‌കൂളിലെ പ്രിന്‍സിപ്പലായ നിധി ദേശ്മുഖ് (24) കുറ്റം സമ്മതിച്ചെന്നു പൊലീസ് അറിയിച്ചു.
സംഭവത്തില്‍ ചോദ്യംചെയ്യലിനായി കുറ്റകൃത്യത്തില്‍ പങ്കുചേര്‍ന്ന വിദ്യാര്‍ഥികളെയും കസ്റ്റഡിയിലെടുത്തിട്ടുണ്ട്. മെയ് 13നാണ് ക്രൂര കൊലപാതകം നടന്നത്. കഴിഞ്ഞ 15നു ചൗസാല വനമേഖലയില്‍ നിന്നാണു തിരിച്ചറിയാനാകാത്തവിധം കത്തിക്കരിഞ്ഞ നിലയിലുള്ള മൃതദേഹം കണ്ടെത്തിയത്. ഫൊറന്‍സിക് അനാലിസിസ് അടക്കമുള്ള വിശദമായ പരിശോധനയിലൂടെയാണു മരിച്ചതു ശാന്തനുവാണെന്നു പൊലീസ് കണ്ടെത്തിയത്. തുടര്‍ന്ന്, ലോക്കല്‍ ക്രൈംബ്രാഞ്ച് നടത്തിയ അന്വേഷണത്തിലാണു ഭാര്യ പിടിയിലായത്.
അമിതമായി മദ്യപിച്ചിരുന്ന ശാന്തനുവിന്റെ പെരുമാറ്റത്തില്‍ അസ്വസ്ഥയായിരുന്ന നിധി 13നു രാത്രിയാണു കൊലപാതകം നടത്തിയത്. തുടര്‍ന്ന്, മൃതദേഹം ഉപേക്ഷിക്കാനായി മൂന്ന് ട്യൂഷന്‍ വിദ്യാര്‍ഥികളുടെ സഹായം തേടുകയായിരുന്നു. പിറ്റേന്ന് പുലര്‍ച്ചെ നാലുപേരും കൂടിയാണ് ആളൊഴിഞ്ഞ സ്ഥലത്തു മൃതദേഹം തള്ളിയത്. ആരെങ്കിലും തിരിച്ചറിയുമെന്ന ഭയം കാരണം അന്നു രാത്രി വീണ്ടും സ്ഥലത്തെത്തി മൃതദേഹത്തില്‍ പെട്രോള്‍ ഒഴിച്ച് കത്തിക്കുകയായിരുന്നു.