'ഇന്സ്റ്റഗ്രാം വഴി പരിചയപ്പെട്ട കൊറിയന് യുവാവ് ജനുവരി 19-ന് മരിച്ചു; ആ വേര്പാടില് മനംനൊന്ത് ആത്മഹത്യ ചെയ്യുന്നു': സ്കൂളിലേക്കെന്ന് പറഞ്ഞ് ഇറങ്ങിയ പ്ലസ് വണ്കാരി പാറമടയില് ജീവനൊടുക്കി; കരയില് സ്കൂള് ബാഗ് ഇരിക്കുന്നത് കണ്ട് സംശയം തോന്നി തിരച്ചില് നടത്തി നാട്ടുകാര്; ചോറ്റാനിക്കര പോലീസിനെ കുഴക്കി ആത്മഹത്യാക്കുറിപ്പും
കൊറിയന് യുവാവിന്റെ മരണത്തില് മനംനൊന്ത് പ്ലസ് വണ് വിദ്യാര്ത്ഥിനി ആത്മഹത്യ ചെയ്തു
കൊച്ചി: ഇന്സ്റ്റഗ്രാം വഴി പരിചയപ്പെട്ട കൊറിയന് യുവാവിന്റെ മരണത്തില് മനംനൊന്ത് പ്ലസ് വണ് വിദ്യാര്ത്ഥിനി ആത്മഹത്യ ചെയ്തു. തിരുവാങ്കുളം മാമല കക്കാട് സ്വദേശി മഹേഷ്-രമ്യ ദമ്പതികളുടെ ഏകമകള് ആദിത്യ (16) ആണ് മരിച്ചത്. ചൊവ്വാഴ്ച രാവിലെ ഒന്പത് മണിയോടെ വീടിന് സമീപത്തെ ശാസ്താംമുകള് ഭാഗത്തുള്ള പാറമടയിലെ വെള്ളക്കെട്ടിലാണ് മൃതദേഹം കണ്ടെത്തിയത്.
സംഭവത്തെക്കുറിച്ച് പോലീസ് പറയുന്നത്:
രാവിലെ പതിവുപോലെ സ്കൂള് യൂണിഫോം ധരിച്ച്, ഉച്ചഭക്ഷണവും കരുതി സ്കൂളിലേക്ക് പോകുകയാണെന്ന് പറഞ്ഞാണ് ആദിത്യ വീട്ടില് നിന്നിറങ്ങിയത്. പാറമടയുടെ കരയില് സ്കൂള് ബാഗ് ഇരിക്കുന്നത് കണ്ട് സംശയം തോന്നിയ നാട്ടുകാരാണ് പരിശോധന നടത്തിയത്. തുടര്ന്ന് വെള്ളത്തില് മൃതദേഹം കണ്ടെത്തുകയായിരുന്നു.
ആദിത്യയുടെ ബാഗില് നിന്നും പോലീസ് ആത്മഹത്യാക്കുറിപ്പ് കണ്ടെടുത്തു. ഇന്സ്റ്റഗ്രാം വഴി പരിചയപ്പെട്ട കൊറിയന് യുവാവ് ജനുവരി 19-ന് മരിച്ചെന്നും ആ വേര്പാടില് മനംനൊന്താണ് താന് ആത്മഹത്യ ചെയ്യുന്നതെന്നുമാണ് കുറിപ്പിലുള്ളത്.
ചോറ്റാനിക്കര പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. ആദിത്യയുടെ ഫോണ് പോലീസ് ശാസ്ത്രീയ പരിശോധനയ്ക്ക് വിധേയമാക്കും.
കുട്ടി പറഞ്ഞ കൊറിയന് യുവാവ് യഥാര്ത്ഥത്തില് മരിച്ചിട്ടുണ്ടോ? ഈ സൗഹൃദത്തിന് പിന്നില് മറ്റാരെങ്കിലും ഉണ്ടോ? മരണത്തിലേക്ക് നയിച്ച മറ്റ് പ്രേരണകള് എന്തെങ്കിലും ഉണ്ടോ? തുടങ്ങിയ കാര്യങ്ങളാണ് പോലീസ് പ്രധാനമായും അന്വേഷിക്കുന്നത്. മൃതദേഹം പോസ്റ്റ്മോര്ട്ടത്തിനായി കളമശ്ശേരി മെഡിക്കല് കോളേജിലേക്ക് മാറ്റി.