എസ്ഐ എന്ന് പറഞ്ഞ് കട ഉടമയുമായി സൗഹൃദം സ്ഥാപിച്ചു; പണം സൂക്ഷിച്ച മേശപ്പൂട്ടി താക്കോല്‍ സമീപത്തുള്ള അറയില്‍ സൂക്ഷിച്ച് നിസ്‌കാരത്തിന് പോയി; തിരികെ വന്നപ്പോള്‍ 50,000 രൂപ മോഷണം പോയതായി അറിഞ്ഞു; ഉടന്‍ പോലീസില്‍ പരാതി; 48 മണിക്കൂറിനുള്ളില്‍ പ്രതിയെ പിടിച്ച് പോലീസ്
കൊല്ലം: കുണ്ടറ പെരുമ്പുഴയിലെ വ്യാപാരസ്ഥാപനത്തില്‍ നിന്ന് 50,000 രൂപ തട്ടിയെടുത്ത് കടന്ന പ്രതി പിടിയില്‍. കിഴക്കേ കല്ലട ഉപ്പൂട് ക്ലാച്ചേരത്ത് വീട്ടില്‍ ജോണ്‍സണ്‍ (48) ആണ് വ്യാജമായി കുണ്ടറ എസ്ഐ എന്നാണെന്ന് പറഞ്ഞ് പണം തട്ടിയെടുത്തതെന്ന് പോലീസ് അറിയിച്ചു. 48 മണിക്കൂറിനുള്ളില്‍ നടത്തിയ അന്വേഷണം ഫലപ്രദമായി, വ്യാഴാഴ്ച വൈകീട്ടോടെ തിരുവല്ലയില്‍ നിന്ന് പ്രതിയെ കുണ്ടറ പോലീസ് പിടികൂടി.
ചൊവ്വാഴ്ച വൈകീട്ട് 3:30ന് ആണ് മോഷണം നടന്നത്. ജങ്ഷനുസമീപം അബ്ദുള്‍ കലാമിന്റെ നാഷണല്‍ സ്റ്റോഴ്സില്‍ എത്തിയ പ്രതി, കട ഉടമയുമായി സൗഹൃദം സ്ഥാപിച്ചു. മരുമകന്റെ കടയിലേക്ക് സാധനങ്ങള്‍ വേണമെന്ന വ്യാജവാദവുമായി, ഉടമയുടെ വിശ്വാസം നേടി. എസ്‌ഐയാണെന്ന വിശ്വാസത്തില്‍, കട ഉടമ പണം സൂക്ഷിച്ച മേശപ്പൂട്ടി താക്കോല്‍ സമീപത്തുള്ള അറയില്‍ സൂക്ഷിച്ച് നിസ്‌കാരത്തിന് പള്ളിയിലേക്ക് പോയി. തിരിച്ചെത്തിയ ഉടമ, പണം നഷ്ടപ്പെട്ടതായി തിരിച്ചറിഞ്ഞ്, ഉടന്‍ കുണ്ടറ പോലീസില്‍ പരാതി നല്‍കി.
സിസിടിവി ദൃശ്യങ്ങള്‍ കേന്ദ്രീകരിച്ച് മൊബൈല്‍ ഫോണ്‍ ലൊക്കേഷന്‍ ഉപയോഗിച്ചാണ് അന്വേഷണം നടത്തിയത്. പണവുമായി പ്രതി ഓട്ടോറിക്ഷയില്‍ കുണ്ടറ പള്ളിമുക്കില്‍ ഇറങ്ങിയതായി കണ്ടെത്തി. അഞ്ചാലുംമൂട്ടിയിലും സമാന രീതിയില്‍ മോഷണം നടത്തിയിരുന്നതായി പരിശോധനയില്‍ വ്യക്തമായി. തിരുവല്ലയിലേക്ക് കടന്ന പ്രതിയെ കാവുംഭാഗത്ത് നിന്ന് പിടികൂടുകയായിരുന്നു.
കുണ്ടറ ഇന്‍സ്പെക്ടര്‍ പി. രാജേഷ്, സ്റ്റേഷന്‍ സബ് ഇന്‍സ്പെക്ടര്‍ പി.കെ. പ്രദീപ്, സിപിഒമാരായ കെ.വി. അനീഷ്, ആര്‍. രാജേഷ്, എസ്. ശ്രീജിത്ത് എന്നിവരുടെ നേതൃത്വത്തില്‍ പൊലീസ് സംഘം ആണ് പ്രതിയെ പിടികൂടിയത്. പോലീസ് വിശദമായ ചോദ്യം ചെയ്യല്‍ ആരംഭിച്ചു. മോഷണം നടത്തിയത് ആസൂത്രിതമായതാണോ? മറ്റ് കേസുകളിലേക്കും പ്രതിക്ക് ബന്ധമുണ്ടോ? എന്നതിനെക്കുറിച്ച് കൂടുതല്‍ അന്വേഷണം നടക്കുന്നു.