തദ്ദേശത്തില് സീറ്റുകള് കുറഞ്ഞെങ്കിലും ഗോവയില് ബിജെപി തന്നെ വലിയ ഒറ്റക്കക്ഷി; കോണ്ഗ്രസിന് വന് തിരിച്ചുവരവ്; കഴിഞ്ഞ തവണ വെറും 4 സീറ്റിലൊതുങ്ങിയ കോണ്ഗ്രസ് ഇത്തവണ 10 സീറ്റുകള് പൊരുതി നേടി; ബാലറ്റ് പേപ്പറില് വോട്ടെടുപ്പ് നടന്നത് കൊണ്ട് കോണ്ഗ്രസിന് ഇവിഎമ്മിനെ പഴിക്കാനാവില്ലെന്ന് ബിജെപി പരിഹാസം; ജില്ലാ പരിഷത്ത് തിരഞ്ഞെടുപ്പ് ജയത്തില് അഭിനന്ദനവുമായി മോദി
തദ്ദേശത്തില് സീറ്റുകള് കുറഞ്ഞെങ്കിലും ഗോവയില് ബിജെപി തന്നെ വലിയ കക്ഷി;
പനാജി: ഗോവയിലെ ഗ്രാമമനസ്സ് ബിജെപിക്കൊപ്പമെന്ന് ഉറപ്പിച്ച് ജില്ലാ പഞ്ചായത്ത് പരിഷത്ത് ഫലം. ആകെയുള്ള 50 സീറ്റുകളില് 32 എണ്ണത്തിലും ബിജെപി-എംജിപി സഖ്യം വിജയിച്ചു. ബാലറ്റ് പേപ്പര് ഉപയോഗിച്ച് നടന്ന തിരഞ്ഞെടുപ്പില് ബിജെപി നേടിയ ഈ വിജയം ഇവിഎം അട്ടിമറി ആരോപിക്കുന്ന കോണ്ഗ്രസിനുള്ള ശക്തമായ മറുപടിയാണെന്ന് മുഖ്യമന്ത്രി പ്രമോദ് സാവന്ത് അവകാശപ്പെട്ടു. പ്രധാനമന്ത്രി നരേന്ദ്ര മോദി ഗോവയിലെ ജനങ്ങള്ക്ക് നന്ദി അറിയിക്കുകയും പ്രവര്ത്തകരെ അഭിനന്ദിക്കുകയും ചെയ്തു.
ബാലറ്റ് പേപ്പറിലും ബിജെപി മാജിക്
ഇത്തവണത്തെ ഫലം ഗോവ ബിജെപിക്ക് ഇരട്ടി മധുരമാണ് നല്കുന്നത്. ബിജെപി 29 സീറ്റുകളിലും സഖ്യകക്ഷിയായ മഹാരാഷ്ട്രവാദി ഗോമന്തക് പാര്ട്ടി (MGP) 3 സീറ്റുകളിലും വിജയിച്ചു.
സീറ്റുകളുടെ എണ്ണത്തില് ബിജെപി മുന്നിലാണെങ്കിലും കോണ്ഗ്രസ് വന് തിരിച്ചുവരവ് നടത്തി. കഴിഞ്ഞ തവണ വെറും 4 സീറ്റിലൊതുങ്ങിയ കോണ്ഗ്രസ് ഇത്തവണ 10 സീറ്റുകള് പിടിച്ചെടുത്തു.ആം ആദ്മി പാര്ട്ടി (AAP) ഒരു സീറ്റ് നിലനിര്ത്തിയപ്പോള്, റെവല്യൂഷണറി ഗോവന്സ് പാര്ട്ടി (RGP) ഒരു സീറ്റില് അക്കൗണ്ട് തുറന്നു. അഞ്ച് സ്വതന്ത്രരും വിജയിച്ചു.
തോല്വിക്ക് കാരണം വോട്ട് ഭിന്നതയെന്ന് കോണ്ഗ്രസ്
പ്രതിപക്ഷ വോട്ടുകള് വിഭജിക്കപ്പെട്ടതാണ് ബിജെപിയുടെ വിജയത്തിന് കാരണമെന്ന് കോണ്ഗ്രസ് ആരോപിച്ചു. പല സീറ്റുകളിലും ബിജെപി ജയിച്ചത് വളരെ ചെറിയ മാര്ജിനാണെന്നും പ്രതിപക്ഷം ഒരുമിച്ച് നിന്നിരുന്നെങ്കില് ഫലം മറ്റൊന്നാകുമായിരുന്നുവെന്നും കോണ്ഗ്രസ് എംഎല്എ കാര്ലോസ് അല്വാരസ് ഫെരേര പറഞ്ഞു. എങ്കിലും കഴിഞ്ഞ തവണത്തേക്കാള് കൂടുതല് സീറ്റുകള് നേടാനായത് കോണ്ഗ്രസ് ക്യാമ്പിന് ആവേശം നല്കുന്നുണ്ട്.
ഇവിഎം വിവാദം തള്ളി ബിജെപി
തിരഞ്ഞെടുപ്പ് ജയിക്കുമ്പോള് ഇവിഎമ്മിനെ പഴിപറയുന്നവര്ക്ക് ഇതിലും വലിയ മറുപടി നല്കാനില്ല' എന്നായിരുന്നു ഗോവ ബിജെപി അധ്യക്ഷന് ദാമോദര് നായിക്കിന്റെ പ്രതികരണം. ബാലറ്റ് പേപ്പറില് വോട്ട് രേഖപ്പെടുത്തിയിട്ടും ജനങ്ങള് ബിജെപിയെ തിരഞ്ഞെടുത്തത് സര്ക്കാരിന്റെ വികസന പ്രവര്ത്തനങ്ങള്ക്കുള്ള അംഗീകാരമാണെന്ന് അദ്ദേഹം കൂട്ടിച്ചേര്ത്തു.
സീറ്റുകളുടെ കണക്ക് ഒറ്റനോട്ടത്തില്
മുന്നണി/പാര്ട്ടി ലഭിച്ച സീറ്റുകള്
ബിജെപി (BJP)29
എംജിപി (MGP)03
കോണ്ഗ്രസ് (INC)10
സ്വതന്ത്രര്05
എഎപി (AAP)01
ആര്ജിപി (RGP)01
ജിഎഫ്പി (GFP)01
വടക്കന് ഗോവയില് 72.6 ശതമാനവും തെക്കന് ഗോവയില് 68.9 ശതമാനവും എന്നിങ്ങനെ വളരെ ഉയര്ന്ന പോളിംഗാണ് രേഖപ്പെടുത്തിയത്. 2005-ല് നടന്ന ആദ്യ ജില്ലാ പഞ്ചായത്ത് തിരഞ്ഞെടുപ്പില് 51.2 ശതമാനം മാത്രമായിരുന്നു പോളിംഗ്. ഇതിനുമുമ്പ് ഏറ്റവും ഉയര്ന്ന പോളിംഗ് രേഖപ്പെടുത്തിയത് 2015-ലാണ് (66.4%). 50 ജില്ലാ പഞ്ചായത്ത് സീറ്റുകളിലേക്കായി ആകെ 226 സ്ഥാനാര്ത്ഥികളാണ് മത്സരരംഗത്തുണ്ടായിരുന്നത്.
പ്രതിപക്ഷ വോട്ടുകള് വിഭജിക്കപ്പെട്ടതാണ് കഴിഞ്ഞ തവണത്തേക്കാള് സീറ്റുകള് കുറഞ്ഞിട്ടും ബിജെപിയെ ഏറ്റവും വലിയ ഒറ്റകക്ഷിയാകാന് സഹായിച്ചതെന്ന് ഗോവയിലെ മുതിര്ന്ന മാധ്യമപ്രവര്ത്തകന് കിഷോര് ഗോയങ്കര് നിരീക്ഷിച്ചു. ബിജെപിയുടെ വിജയികളില് പലരും കോണ്ഗ്രസില് നിന്ന് വന്ന ശക്തരായ വ്യക്തിഗത സ്വാധീനമുള്ള നേതാക്കളാണെന്നും അദ്ദേഹം ചൂണ്ടിക്കാട്ടി.
'സീറ്റുകള് ഉറപ്പിക്കാന് ബിജെപി ഇപ്പോഴും വ്യക്തിഗത നേതാക്കളെയാണ് ആശ്രയിക്കുന്നത്. ഇതില് പലരും അഴിമതി ആരോപണങ്ങള് നേരിടുന്നവരും രാഷ്ട്രീയമായി പ്രതിച്ഛായ നഷ്ടപ്പെട്ടവരുമാണ്. എങ്കിലും വലിയ തോതില് വിഭവങ്ങള് സമാഹരിച്ച് മുന്പത്തെപ്പോലെ തിരഞ്ഞെടുപ്പ് വിജയിക്കാന് അവര്ക്ക് സാധിച്ചു. ഈ തിരഞ്ഞെടുപ്പ് നല്കുന്ന പ്രധാന സൂചന, സംസ്ഥാനത്തെ ബിജെപി ഭരണത്തിന് നിലവില് ഭീഷണികളൊന്നുമില്ല എന്നതാണ്. എന്നാല് അഴിമതിക്കാരായ നേതാക്കളെ അധികകാലം ആശ്രയിക്കാന് ബിജെപിക്ക് കഴിയില്ല, അത് പാര്ട്ടിയുടെ പ്രഖ്യാപിത തത്വങ്ങള്ക്ക് വിരുദ്ധമാണ്,' ഗോയങ്കര് പറഞ്ഞു.
ഗ്രാമപ്രദേശങ്ങളിലെ ജനവികാരം അളക്കുന്നതില് ഈ പ്രാദേശിക ഭരണകൂട തിരഞ്ഞെടുപ്പ് നിര്ണ്ണായകമായിരുന്നു. 25 പേരുടെ ജീവന് എടുത്ത ഹോട്ടല് തീപിടുത്തം, തൊഴില് തട്ടിപ്പുകള്, ഗുണ്ടാ സംഘങ്ങള് തമ്മിലുള്ള പോരാട്ടം, ആക്ടിവിസ്റ്റുകള്ക്ക് നേരെയുള്ള ആക്രമണം തുടങ്ങിയ ഗൗരവതരമായ പ്രശ്നങ്ങള്ക്കിടയിലാണ് തിരഞ്ഞെടുപ്പ് നടന്നത് എന്നത് ശ്രദ്ധേയമാണ്.