അപ്രതീക്ഷിതമായി വാഹനത്തിന് മുന്നിലെത്തിയത് കരടി; പാഞ്ഞടുക്കുന്ന കാഴ്ച കണ്ട് കാർ പിന്നോട്ടെടുത്തു; യുവാവ് രക്ഷപ്പെട്ടത് തലനാരിഴയ്ക്ക്

ടോക്കിയോ: ജപ്പാനിലെ ഹോക്കൈഡോ ദ്വീപിൽ മൃഗങ്ങൾക്ക് ഭക്ഷണം നൽകാനെത്തിയ ഉദ്യോഗസ്ഥന്റെ കാറിന് നേരെ കരടി ആക്രമണം. കരടി വാഹനത്തിന് മുന്നിൽ പ്രത്യക്ഷപ്പെട്ടതോടെ ഡ്രൈവർ ഉടൻ തന്നെ വാഹനം പിന്നോട്ടെടുത്തു. എന്നാൽ, കരടി വാഹനത്തെ പിന്തുടർന്ന് ആക്രമിക്കുകയായിരുന്നു. ആക്രമണത്തിൽ വാഹനത്തിന്റെ മുൻഭാഗം ഭാഗികമായി തകർന്നു.

തലനാരിഴയ്ക്കാണ് ഉദ്യോഗസ്ഥൻ രക്ഷപ്പെട്ടതെന്നാണ് ദൃക്‌സാക്ഷികൾ പറയുന്നത്. മറ്റു നാശനഷ്ടങ്ങളൊന്നും റിപ്പോർട്ട് ചെയ്തിട്ടില്ല. കഴിഞ്ഞ കുറച്ച് മാസങ്ങളായി ജപ്പാനിലെ ഹോക്കൈഡോയിലും വടക്കുകിഴക്കൻ ഹോൺഷുവിലും കരടികളുടെ ആക്രമണങ്ങൾ വർധിച്ചുവരികയാണ്. ഈ വർഷം ഏപ്രിൽ മുതൽ രാജ്യത്ത് കരടി ആക്രമണത്തിൽ 13 പേർ മരിച്ചതായി ഔദ്യോഗിക കണക്കുകൾ വ്യക്തമാക്കുന്നു.

ഇതിനെത്തുടർന്ന്, സ്ഥിതിഗതികൾ നിയന്ത്രണവിധേയമാക്കാൻ ജപ്പാൻ സ്വയം പ്രതിരോധ സേനയെ പ്രദേശത്ത് വിന്യസിച്ചിട്ടുണ്ട്. ജനവാസ കേന്ദ്രങ്ങൾക്ക് ചുറ്റും വലിയ കെണികൾ സ്ഥാപിക്കുകയും ഉദ്യോഗസ്ഥർക്ക് ആവശ്യമായ സുരക്ഷാ ഉപകരണങ്ങളും കരടികളെ അകറ്റാനുള്ള സംവിധാനങ്ങളും ഉറപ്പാക്കിയിട്ടുണ്ട്. എന്നിരുന്നാലും, കരടികളെ വെടിവയ്ക്കാനോ കൊല്ലാനോ ഉദ്യോഗസ്ഥർക്ക് അനുമതിയില്ല.

ഇതിനിടെ, കരടികൾക്ക് അപകടസാധ്യതയുള്ള പ്രദേശങ്ങളെക്കുറിച്ച് താമസക്കാർക്കും വിനോദസഞ്ചാരികൾക്കും മുന്നറിയിപ്പ് നൽകുന്നതിനായി പരിസ്ഥിതി മന്ത്രാലയവും പ്രാദേശിക അധികാരികളും ചേർന്ന് പ്രത്യേക ഭൂപടം പുറത്തിറക്കി. ജനവാസ കേന്ദ്രങ്ങളിൽ നിന്ന് കരടികളെ തുരത്തുന്നതിനായി ഉച്ചഭാഷിണികളുള്ള ഡ്രോണുകൾ ഉപയോഗിക്കുന്നതും തുടരുകയാണ്. താമസക്കാരുടെ സുരക്ഷ ഉറപ്പാക്കാൻ സർക്കാർ അടിയന്തര നടപടികൾ സ്വീകരിക്കുമെന്ന് ജപ്പാൻ പ്രധാനമന്ത്രി ഫുമിയോ കിഷിദ അറിയിച്ചു.