ഒരു ബാല പീഡകനെ വിളിച്ചിരുത്തി അവനെ വെളുപ്പിക്കാന്‍ ഇന്റര്‍വ്യൂ എടുക്കാന്‍ ഉളുപ്പ് തോന്നാത്ത ചാനലാണ് ഇപ്പോള്‍ കുറച്ച് വോയ്‌സ് ക്ലിപ്പ് എടുത്ത് വീശി സദാചാരത്തിന്റെ സ്റ്റഡി ക്ലാസ് നടത്തുന്നത്; രാഹുല്‍ മാങ്കൂട്ടത്തിലിന്റെ കോഴിത്തരം അത്ര നികൃഷ്ടം അല്ല; അഞ്ജു പാര്‍വ്വതി പ്രബീഷ് എഴുതുന്നു
അഞ്ജു പാര്‍വ്വതി പ്രബീഷ് എഴുതുന്നു
അഞ്ജു പാര്‍വ്വതി പ്രബീഷ്
വാസവദത്തയുടെ ചാരിത്ര്യ പ്രസംഗം എന്ന് കേട്ടിട്ടുണ്ടോ. ഇല്ലെങ്കില്‍ മരം മുറി ചാനല്‍ കഴിഞ്ഞ മൂന്ന് ദിവസമായി പ്രവര്‍ത്തിച്ചുക്കൊണ്ടിരിക്കുന്ന അവിഹിത എഞ്ചിനിലേയ്ക്ക് ഒന്ന് നോക്കിയാല്‍ മതി. കുറേ വോയ്‌സ് ക്ലിപ്പുകളും ചാറ്റ് സ്‌ക്രീന്‍ഷോട്ടുകളും എടുത്ത് വീശി അവര്‍ സ്ത്രീ സുരക്ഷയുടെ സൈറണ്‍ മുഴക്കുന്നു. ബ്ലോക്ക് ബട്ടണ്‍ ഓപ്ഷന്‍ എന്തെന്ന് അറിയാത്ത ഏതൊക്കെയോ കുറേ സ്ത്രീകളുടെ മാനാഭിമാനങ്ങള്‍ക്ക് വേണ്ടി ഉച്ചത്തില്‍ എഞ്ചിന്‍ പ്രവര്‍ത്തിപ്പിക്കുന്നു. അതിന് എന്ത് ധാര്‍മ്മികതയാണ് ഈ ചാനലിന് ഉള്ളത്?
കേവലം ആറു വയസ്സ് മാത്രം ഉണ്ടായിരുന്ന വണ്ടിപ്പെരിയാറിലെ പൊടി കുഞ്ഞ് തൂങ്ങി നിന്നാടിയത് ഒരു കാമപിശാച്ചിന്റെ മനോ വൈകൃതം കൊണ്ടായിരുന്നു. മൂന്ന് വയസ്സ് മുതല്‍ ബിസ്‌കറ്റ് കൊടുത്ത് ആ പൊടി കുഞ്ഞിനെ വശത്താക്കി അതിന്റെ ഇളം മേനി കൊത്തിപ്പറിച്ച കഴുകന്‍ അര്‍ജ്ജുന്‍ ഒടുക്കം അതിനെ കൊന്ന് കെട്ടി തൂക്കി. അര്‍ജ്ജുന്‍ എന്ന റീസൈക്കിള്‍ കേരളയുടെ ഭാഗമായ സഖാവിനെ ആരും മറന്നിട്ടില്ല. രാഷ്ട്രീയ ഇടപെടല്‍ കൊണ്ട് ഒടുക്കം കൃത്യമായ തെളിവുകള്‍ നിരത്താതെ, വെറും പേരിന് മാത്രമുള്ള ഒരു പോക്‌സോ കേസായി അത് കോടതിക്ക് മുന്നില്‍ എത്തിക്കാന്‍ പ്രോസിക്യൂഷന് കഴിഞ്ഞു. ഒടുക്കം ഡിസംബര്‍ 2023 ല്‍ അവനെ കോടതി വെറുതെ വിട്ടു. ഇപ്പോള്‍ വീണ്ടും ആ കേസ് ഓപ്പണ്‍ ചെയ്തു എന്നറിയുന്നു.
ആദ്യമായി ഒരു ബാല പീഡകനെ വിളിച്ചിരുത്തി ഇന്റര്‍വ്യു എടുപ്പിക്കാന്‍, അവനെ വെളുപ്പിക്കാന്‍ തക്ക തൊലിക്കട്ടി ഒരു ചാനലിനും ജീര്‍ണ്ണലിസ്റ്റിനും ഉണ്ടായതിന്റെ ചിത്രമാണ് മുകളില്‍. വെറും ആറു വയസ്സുള്ള ഒരു കുഞ്ഞിനെ ഇല്ലാതാക്കിയ, എട്ടും പൊട്ടും തിരിയാത്ത മൂന്ന് വയസ്സ് മാത്രമുള്ള കുഞ്ഞിനെ തുടര്‍ച്ചയായി പീഡിപ്പിച്ചു കൊണ്ടിരുന്ന ഒരുത്തന്റെ ഇന്റര്‍വ്യൂ എടുക്കാന്‍ ഉളുപ്പ് തോന്നാത്ത ചാനലാണ് ഇപ്പോള്‍ കുറച്ച് വോയ്‌സ് ക്ലിപ്പ് എടുത്ത് വീശി സദാചാരത്തിന്റെ സ്റ്റഡി ക്ലാസ് നടത്തുന്നത്. ക്രാ ത്ഫൂ
രാഹുല്‍ മാങ്കൂട്ടത്തില്‍ എന്ന രാഷ്ട്രീയ നേതാവിന്റെ കോഴിത്തരം എന്തായാലും മുകളില്‍ കണ്ടത് പോലെ നികൃഷ്ടം അല്ല. അയാള്‍ ആരുടെ വീട്ടിലും കടന്ന് ചെന്ന് റേപ്പ് ചെയ്തിട്ടില്ല, പ്രായപൂര്‍ത്തി ആവാത്ത കുട്ടികളെ വേട്ട ആടിയിട്ടില്ല. ഒരു ചൂണ്ട ഇട്ട് നോക്കി, അതില്‍ ആരെങ്കിലും കൊത്തിയാല്‍ കിട്ടി, അല്ലെങ്കില്‍ ചട്ടി എന്ന രീതിയാണ് ചെയ്തത്. പെണ്ണ് തന്നെ വേണ്ട വിധം കൈകാര്യം ചെയ്താല്‍ തീരുന്ന ടൈപ്പ് ഞരമ്പിസം. അതിന് അയാള്‍ സ്വന്തം പ്രസ്ഥാനം , പദവി, എന്നിവ കരുവാക്കി എന്നത് തെറ്റ്.
പതിനെട്ട് വയസ്സ് കഴിഞ്ഞ ആണിനും പെണ്ണിനും ഉഭയ കക്ഷി സമ്മതത്തോടെ ബന്ധപ്പെടാന്‍ റൈറ്റ് ഉണ്ടെന്നിരിക്കെ, അയാളും മറ്റൊരു സ്ത്രീയും തമ്മില്‍ ഉണ്ടായ ലൈംഗിക ബന്ധത്തെ, ഇനി ഒരുപാട് സ്ത്രീകളുമായി അയാള്‍ ബന്ധപ്പെട്ടു എന്ന് തന്നെയിരിക്കട്ടെ അതൊക്കെ ബലാത്സംഗം ആണെങ്കില്‍ അല്ലേ ക്രൈം ആവുള്ളു. പിന്നെ ഗര്‍ഭ ചിദ്രം, അതുമായി ബന്ധപ്പെട്ട കാര്യങ്ങള്‍, അതില്‍ അപ്പുറത്തെ വശത്തു നിന്ന് ശബ്ദ സാന്നിധ്യം അല്ലാത്ത ബോഡി പ്രെസെന്‍സ് ഇല്ലെന്നിരിക്കെ, അവര്‍ നിയമപരമായി മുന്നോട്ട് പോവാതെ ഇരിക്കുവോളം അത് അവര്‍ രണ്ട് പേരുടെ മാത്രം സ്വകാര്യത അല്ലേ? സോഷ്യല്‍ മീഡിയയില്‍ ആവട്ടെ, മൊബൈലില്‍ ആവട്ടെ അനാവശ്യ ചാറ്റും കോളുകളും തടയാന്‍ ഫോണില്‍ ത്തന്നെ സംവിധാനമുണ്ട്, എന്നിട്ടും ഉപയോഗിച്ചില്ല എന്ന് വരുമ്പോള്‍ പുരുഷന്‍ മാത്രം വില്ലന്‍ ആവുമോ? അത് മാത്രമല്ല, രണ്ട് പേര്‍ തമ്മിലുള്ള റിലേഷന്‍ഷിപ്പ്, അത് പ്രണയമോ സൗഹൃദമോ എന്തോ ആവട്ടെ, അതില്‍ വിശ്വാസ വഞ്ചന നടത്തി എന്നതിന്റെ തെളിവ് ആണല്ലോ റെക്കോര്‍ഡ് ചെയ്തു പുറത്തുവിടല്‍. അപ്പോള്‍ അതില്‍ എന്ത് ധാര്‍മ്മിക ശുദ്ധിയാണുള്ളത്?
ഇത് ഒരുത്തനെയും വെളുപ്പിക്കാന്‍ ഉള്ള പോസ്റ്റ് അല്ല. തെറ്റ് ചെയ്തവന്‍ വെള്ളം കുടിക്കണം കുടിക്കട്ടെ ലിറ്റര്‍ കണക്കിന്. അത് കേവലം ഒരുത്തന്‍ മാത്രമല്ല, കുടിക്കുമ്പോള്‍ എല്ലാവനും കുടിക്കണം. കലോത്സവം റിപ്പോര്‍ട്ട് ചെയ്യാന്‍ പോയിട്ട് കൊച്ച് പിള്ളേരെ നോക്കി വെള്ളം ഇറക്കിയവനും ആ കൊതി കണ്ട് സ്റ്റുഡിയോ ഫ്‌ലോറില്‍ നിന്ന് ആവേശം പകര്‍ന്നവനും ഒക്കെ തെമ്മാടികള്‍ തന്നെയാണ്. സ്വന്തം ഉമ്മറത്ത് കിടക്കുന്ന അപ്പിയില്‍ ചവിട്ടാതെ അപ്പുറത്ത് പറമ്പില്‍ കിടക്കുന്ന കാക്ക കാട്ടം കണ്ട് അയ്യേ എന്ന് വിളിക്കുന്ന ഓരോരുത്തന്മാരോടും പുച്ഛം മാത്രം.