എന്നോട് ഇനി മുതല്‍ ഞാന്‍ ക്യാപ്റ്റന്‍ ആയിക്കൊള്ളാന്‍ ധോണി പറഞ്ഞു; ഞാന്‍ അത്ഭുതപ്പെട്ടുപോയി; ഒരു മുന്നൊരുക്കങ്ങളും ഇല്ലാതെ അത്തരത്തില്‍ ഒരു ഉത്തരവാദിത്വം ഏറ്റെടുക്കുക ബുദ്ധിമുട്ടായിരുന്നു; എന്നാല്‍ അദ്ദേഹം നല്‍കിയ പിന്തുണ വലുതായിരുന്നു; ഋതുരാജ് ഗെയ്ക്വാദ്
ചെന്നൈ സൂപ്പര്‍ കിങ്‌സിന്റെ നായക സ്ഥാനത്തേക്കെത്തിയ സംഭവത്തെക്കുറിച്ചുള്ള തന്റെ ഓര്‍മ പങ്കുവെച്ച് ഋതുരാജ് ഗെയ്ക്വാദ്. ഏവരെയും ഞെട്ടിച്ചുകൊണ്ടായിരുന്നു ധോണി താന്‍ ടീമിനെ നയിക്കാന്‍ ഇല്ലെന്നും പകരം ഋതുരാജ് ടീമിന്റെ നായകന്‍ ആകുമെന്നും ഉള്ള വാര്‍ത്ത ഏവരും അറിഞ്ഞത്. തന്റെ കീഴില്‍ ഒരു മികച്ച നായകനെ വളര്‍ത്തിയെടുക്കുക എന്നത് ആവശ്യമാണ് എന്നത് നന്നായി അറിയാവുന്ന ധോണി ആ തീരുമാനം എടുക്കുക ആയിരുന്നു. എന്തായാലും ഈ സംഭവത്തെക്കുറിച്ച് ഋതുരാജ് പറഞ്ഞത് ഇങ്ങനെ:
''കഴിഞ്ഞ വര്‍ഷം ടൂര്‍ണമെന്റിന് ഒരു ആഴ്ച മുമ്പ് എം എസ് ധോണി എന്നോട് ഇനി മുതല്‍ ഞാന്‍ ക്യാപ്റ്റന്‍ ആയിക്കൊള്ളുക, അദ്ദേഹം നയിക്കുന്നില്ല എന്ന് പറഞ്ഞു. സത്യത്തില്‍ ഞാന്‍ അത്ഭുതപ്പെട്ടുപോയി. കാരണം ഒരു മുന്നൊരുക്കങ്ങളും ഇല്ലാതെ അത്തരത്തില്‍ ഒരു ഉത്തരവാദിത്വം ഏറ്റെടുക്കുക ബുദ്ധിമുട്ടായിരുന്നു. എന്നാല്‍ അദ്ദേഹം നല്‍കിയ പിന്തുണയുടെ ബലത്തില്‍ ഞാന്‍ ക്യാപ്റ്റന്‍സി ഏറ്റെടുക്കാന്‍ തീരുമാനിക്കുക ആയിരുന്നു,''
ഇന്ത്യന്‍ പ്രീമിയര്‍ ലീഗിന്റെ ആദ്യ സീസണ്‍ മുതല്‍ എല്ലാ സീസണിലും കളിച്ചിട്ടുള്ള, ഏറ്റവും കൂടുതല്‍ മത്സരങ്ങള്‍ കളിച്ചിട്ടുള്ള താരമായ ധോണി ചെന്നൈ സൂപ്പര്‍ കിങ്‌സിനെ 5 ഐപിഎല്‍ കിരീടത്തിലേക്ക് നയിച്ചിട്ടുണ്ട്. ചെന്നൈ നായകസ്ഥാനം ഏറ്റെടുത്ത ശേഷം 212 മത്സരങ്ങള്‍ കളിച്ച അദ്ദേഹത്തെ 128 ജയങ്ങള്‍ നേടികൊടുക്കുകയും ചെയ്തിട്ടുണ്ട്. ഏറ്റവും കൂടുതല്‍ തവണ പ്ലേ ഓഫ് കളിച്ച ടീമും, ഫൈനല്‍ കളിച്ച ടീമും എല്ലാം ചെന്നൈ തന്നെയാണ്.
മറുവശത്ത് നായകനായ ആദ്യ സീസണില്‍ തന്നെ ചെന്നൈയെ അഞ്ചാം സ്ഥാനത്ത് ഫിനിഷ് ചെയ്യാന്‍ സഹായിച്ച ഋതുരാജ് ഭേദപ്പെട്ട പ്രകടനമാണ് കാഴ്ചവെച്ചത്.