ചര്ച്ചകള് ഒന്നുപാളിയാല് ആ നിമിഷം മിസൈലുകള് ഇറാനിലെത്തും; ആണവ-മിസൈല് കേന്ദ്രങ്ങളെ തവിടുപൊടിയാക്കാന് ഇസ്രയേലുമായി സംയുക്ത ആക്രമണത്തിന് കോപ്പുകൂട്ടി അമേരിക്ക; ആഴ്ചകളോളം നീളുന്ന യുദ്ധം ഉണ്ടാകാന് 90% സാധ്യതയെന്ന് ട്രംപിന്റെ ഉപദേഷ്ടാവ്; സംയുക്ത നാവിക അഭ്യാസം പ്രഖ്യാപിച്ച് ഇറാനും റഷ്യയും; വീണ്ടുമൊരു മഹായുദ്ധമോ?
ചര്ച്ചകള് ഒന്നുപാളിയാല് ആ നിമിഷം മിസൈലുകള് ഇറാനിലെത്തും
വാഷിങ്ടണ്: ഇറാനെതിരെ ഒരു വമ്പന് സൈനിക നീക്കത്തിന്റെ വക്കിലാണ് അമേരിക്കയെന്ന് സൂചനകള്. നയതന്ത്ര ചര്ച്ചകള് പരാജയപ്പെടുകയാണെങ്കില് വരും ദിവസങ്ങളിലോ ആഴ്ചകള്ക്കുള്ളിലോ യുദ്ധം പൊട്ടിപ്പുറപ്പെട്ടേക്കാമെന്നാണ് രാജ്യാന്തര മാധ്യമങ്ങളിലെ റിപ്പോര്ട്ടുകള്.
ഇസ്രയേലുമായി സംയുക്തനീക്കം?
കഴിഞ്ഞ മാസം വെനസ്വേലയില് നടത്തിയ കൃത്യതയാര്ന്ന സൈനിക നീക്കത്തേക്കാള് വളരെ വലുതും ആഴ്ചകളോളം നീണ്ടുനില്ക്കുന്നതുമായ ഒരു ആക്രമണത്തിനാണ് അമേരിക്ക പദ്ധതിയൊരുക്കുന്നത്. ഇസ്രായേലുമായി സംയുക്തമായി നടത്തുന്ന ഈ നീക്കം ഇറാന്റെ ആണവ-മിസൈല് കേന്ദ്രങ്ങളെ ലക്ഷ്യമിട്ടുള്ളതായിരിക്കുമെന്ന് 'ആക്സിയോസ്' റിപ്പോര്ട്ട് ചെയ്യുന്നു.
ഇസ്രായേലിന്റെ മുന്നറിയിപ്പ്
മുന് ഐ.ഡി.എഫ് ഇന്റലിജന്സ് മേധാവി ആമോസ് യാദ്ലിന് നല്കുന്ന സൂചന പ്രകാരം യുദ്ധം അടുത്തു കഴിഞ്ഞു. 'കഴിഞ്ഞ ആഴ്ച ഞാന് മ്യൂണിക്ക് സുരക്ഷാ സമ്മേളനത്തിന് പോയിരുന്നു. എന്നാല് ഈ വാരാന്ത്യത്തില് വിദേശത്തേക്ക് പറക്കുന്നതിനെക്കുറിച്ച് ഞാന് രണ്ടുതവണ ചിന്തിക്കും,' അദ്ദേഹം പറഞ്ഞു. പ്രസിഡന്റ് ട്രംപ് യുദ്ധകാര്യത്തില് അതീവ ദൃഢനിശ്ചയത്തിലാണെന്നും എല്ലാ സൈനിക സജ്ജീകരണങ്ങളും പൂര്ത്തിയായതായും അദ്ദേഹം കൂട്ടിച്ചേര്ത്തു.
നയതന്ത്രം വഴിമുട്ടുന്നു
ജനീവയില് അമേരിക്കന് ഉപദേശകരായ ജാരെഡ് കുഷ്നറും സ്റ്റീവ് വിറ്റ്കോഫും ഇറാന്റെ വിദേശകാര്യ മന്ത്രി അബ്ബാസ് അരാഗ്ചിയുമായി മൂന്ന് മണിക്കൂര് ചര്ച്ച നടത്തി. ചര്ച്ചകളില് പുരോഗതിയുണ്ടെന്ന് ഇരുപക്ഷവും അവകാശപ്പെടുമ്പോഴും പ്രധാന വ്യത്യാസങ്ങള് പരിഹരിക്കാന് സാധിക്കാത്തതില് അമേരിക്കന് ഉദ്യോഗസ്ഥര് ആശങ്കാകുലരാണ്. പ്രസിഡന്റ് നിശ്ചയിച്ച 'റെഡ് ലൈനുകള്' അംഗീകരിക്കാന് ഇറാന് തയ്യാറാകാത്ത പക്ഷം നയതന്ത്രം അതിന്റെ സ്വാഭാവിക അന്ത്യത്തിലെത്തിയേക്കാമെന്ന് യുഎസ് വൈസ് പ്രസിഡന്റ് ജെ.ഡി. വാന്സ് പറഞ്ഞു.
സൈനിക സജ്ജീകരണം
പശ്ചിമേഷ്യയില്, അമേരിക്കന് സാന്നിധ്യം ശക്തമാണ്. രണ്ട് വിമാനവാഹിനിക്കപ്പലുകള്, ഡസന് കണക്കിന് യുദ്ധക്കപ്പലുകള്, നൂറുകണക്കിന് യുദ്ധവിമാനങ്ങള് (F-35, F-22, F-16 DÄs¸sS), വ്യോമ പ്രതിരോധ സംവിധാനങ്ങള് എന്നിവ വിന്യസിച്ചുകഴിഞ്ഞു. കഴിഞ്ഞ ആഴ്ചകളില് മാത്രം ആയുധങ്ങളുമായി 150-ലധികം ചരക്ക് വിമാനങ്ങള് മേഖലയിലെത്തി.
90% സാധ്യത
ട്രംപിന്റെ ഒരു ഉപദേഷ്ടാവ് വ്യക്തമാക്കുന്നത് പ്രകാരം, അടുത്ത ഏതാനും ആഴ്ചകള്ക്കുള്ളില് സൈനിക നടപടി ഉണ്ടാകാന് 90% സാധ്യതയുണ്ട്. ഭരണമാറ്റം ലക്ഷ്യമിട്ടുള്ള ആക്രമണത്തിനായി ഇസ്രായേലും സജ്ജമാണ്. 2025 ജൂണില് ഇറാന് നടത്തിയ മിസൈല് ആക്രമണത്തില് ഇസ്രായേലിലെ ഹോളോണില് 32 പേര് കൊല്ലപ്പെടുകയും മൂവായിരത്തിലധികം പേര്ക്ക് പരിക്കേല്ക്കുകയും ചെയ്തിരുന്നു. ഇതിന്റെ പശ്ചാത്തലത്തില് ഇസ്രായേല് പൊതുജനങ്ങളും അധികൃതരും യുദ്ധത്തിനായി തയ്യാറെടുത്തു കഴിഞ്ഞു.
ഇറാന്റെ നീക്കം
ഇതിനിടെ, ഒമാന് കടലിലും ഇന്ത്യന് മഹാസമുദ്രത്തിന്റെ വടക്കന് ഭാഗങ്ങളിലും ഇറാനും റഷ്യയും സംയുക്ത നാവിക അഭ്യാസം പ്രഖ്യാപിച്ചു. തന്ത്രപ്രധാനമായ ഹോര്മുസ് കടലിടുക്ക് ഏതാനും മണിക്കൂറുകള് ഭാഗികമായി അടച്ചുകൊണ്ട് ഇറാനിയന് റെവല്യൂഷണറി ഗാര്ഡും സൈനികാഭ്യാസം നടത്തി.