1984 മുതല്‍ കഴിഞ്ഞ തെരഞ്ഞെടുപ്പു വരെ വോട്ട് ചെയ്തു; 2002ലെ തിരിച്ചറിയല്‍ കാര്‍ഡും കൈയ്യിലുണ്ട്; വോട്ടര്‍ പട്ടികയില്‍ മാത്യു ടി. തോമസിന്റെ പേരില്ല; ഞെട്ടലുണ്ടാക്കിയെന്ന് എംഎല്‍എ; തിരഞ്ഞെടുപ്പ് കമ്മീഷന് പരാതി നല്‍കും
വോട്ടര്‍ പട്ടികയില്‍ മാത്യു ടി. തോമസിന്റെ പേരില്ല
പത്തനംതിട്ട: മുന്‍ മന്ത്രിയും തിരുവല്ല എംഎല്‍എയുമായ മാത്യു ടി. തോമസിന്റെ പേര് വോട്ടര്‍ പട്ടികയില്‍ നിന്ന് നീക്കം ചെയ്യപ്പെട്ടതായി പരാതി. പേര് ഉള്‍പ്പെടാത്തതിനെ തുടര്‍ന്ന് അദ്ദേഹം തിരഞ്ഞെടുപ്പ് കമ്മീഷന് പരാതി നല്‍കാന്‍ തീരുമാനിച്ചു.
സംഭവിച്ചത് എന്ത്?
മാത്യു ടി. തോമസ് വോട്ടര്‍ പട്ടിക പരിശോധിച്ചപ്പോഴാണ് പേര് ഉള്‍പ്പെട്ടിട്ടില്ലെന്ന് ശ്രദ്ധയില്‍പ്പെട്ടത്. വോട്ടര്‍ പട്ടികയില്‍നിന്ന് പേര് നീക്കം ചെയ്ത നടപടിയില്‍ വിശദീകരണം തേടി എംഎല്‍എ തിരഞ്ഞെടുപ്പ് കമ്മീഷന് ഔദ്യോഗികമായി പരാതി നല്‍കും.
വോട്ടര്‍ പട്ടികയുടെ സൂക്ഷ്മ പരിശോധനയില്‍ സംഭവിച്ച പിഴവാണിതെന്നാണ് പ്രാഥമിക നിഗമനം. 2002ലെ വോട്ടര്‍ പട്ടികയിലാണ് തിരുവല്ല എംഎല്‍യുടേയും ഭാര്യയുടെയും പേര് ഇല്ലാത്തത്. എസ്ഐആര്‍ നടപ്പാക്കുന്നിതിന്റെ ഭാഗമായി ബിഎല്‍ഒയാണ് ഇക്കാര്യം അറിയിച്ചിരിക്കുന്നത്.
എസ്ഐആര്‍ ഫോം പൂരിപ്പിക്കുന്നതിനായി നടത്തിയ പരിശോധനയിലാണ് ബിഎല്‍ഒ ഇക്കാര്യം കണ്ടെത്തിയത്. 2002ലെ വോട്ടര്‍ പട്ടിക അടിസ്ഥാനത്തിലാണ് എസ്ഐആര്‍ നടപ്പാക്കുന്നത്. 1984 മുതല്‍ കഴിഞ്ഞ തെരഞ്ഞെടുപ്പു വരെ താനും ഭാര്യ അച്ചാമ്മ അലക്സും വോട്ട് ചെയ്തിരുന്നതായി മാത്യു ടി തോമസ് പറഞ്ഞു. 2002ലെ തിരിച്ചറിയല്‍ കാര്‍ഡുകളും കൈയ്യിലുണ്ട്. എന്നാല്‍ സാങ്കേതികമായി പേര് ഉള്‍പ്പെടുത്താന്‍ കഴിയുന്നില്ല എന്നാണ് ബിഎല്‍ഒ പറയുന്നതെന്നും മാത്യു ടി തോമസ് പറഞ്ഞു.
'ഇത് ഞെട്ടലുണ്ടാക്കി. ആറ് തവണ നിയമസഭയിലേക്ക് മത്സരിക്കുകയും അഞ്ച് തവണ എംഎല്‍എ ആവുകയും ഒരു തവണ പാര്‍ലമെന്റിലേക്ക് മത്സരിക്കുകയും ചെയ്ത രാഷ്ട്രീയ പശ്ചാത്തലമുള്ള വ്യക്തിയാണ് ഞാന്‍. എന്നാല്‍, നിലവിലെ പരിശോധനയില്‍ 2002ലെ വോട്ടര്‍ പട്ടികയില്‍ പേര് കാണുന്നില്ലെന്നാണ് ഉദ്യോഗസ്ഥര്‍ അറിയിച്ചിട്ടുള്ളത്. സംഭവം സംബന്ധിച്ച് തിരഞ്ഞെടുപ്പ് കമ്മിഷനു പരാതി നല്‍കും'' മാത്യു ടി.തോമസ് പറഞ്ഞു.