ലോസ് ഏഞ്ചല്‍സിനെ വിറപ്പിച്ച് താണ്ഡവമാടിയ കാട്ടുതീ ആദ്യം തീപ്പൊരിയായി പുകഞ്ഞുപടര്‍ന്നത് ചൊവ്വാഴ്ച രാവിലെ 10 ന്; ദൃശ്യങ്ങള്‍ പുറത്ത്; വന്‍ കാട്ടുതീയില്‍ പൊലിഞ്ഞത് അഞ്ചുജീവന്‍; ഹോളിവുഡ് താരങ്ങളുടെ അടക്കം ബംഗ്ലാവുകള്‍ ചാരമായി; വീടുകളെ കാര്‍ന്നുതിന്ന ഭീകരത
ലോസ് ഏഞ്ചല്‍സിലെ കാട്ടുതീയുടെ ഭീകരതയുടെ ദൃശ്യങ്ങള്‍
ലോസ് ഏഞ്ചല്‍സ്: ലോസ് ഏഞ്ചല്‍സില്‍ പടര്‍ന്ന് പിടിച്ച വന്‍ കാട്ടുതീ വരുത്തി വച്ച നാശനഷ്ടം ചില്ലറയല്ല. വമ്പന്‍ ഹോളിവുഡ് താരങ്ങളുടെ അടക്കം ബംഗ്ലാവുകളെ ചാരമാക്കിയിരിക്കുന്നു. നിരവധി വീഡിയോകളും ചിത്രങ്ങളും പുറത്തുവന്നതോടെ, കാട്ടുതീയുടെ താണ്ഡവത്തിന്റെ ഭീകരത കൂടുതല്‍ വെളിവായി.
സൗത്ത് കാലിഫോര്‍ണിയിലെ, ലോസ് ഏഞ്ചല്‍സിലെ വീടുകളുടെ അവശിഷ്ടങ്ങളുടെ ഡ്രോണ്‍ ദൃശ്യങ്ങള്‍ ശ്വാസമടക്കി പിടിച്ചുമാത്രമേ കാണാനാവൂം. ചില വീടുകളില്‍ ഇപ്പോഴും തീ കാര്‍ന്നുതിന്നുകൊണ്ടിരിക്കുന്നു. ഏതോ വീടിന്റെ പിന്‍വശത്ത് യാദൃശ്ചികമായി വീണ തീപ്പൊരി പടര്‍ന്നുകത്തിയതാണ് ഇത്രയും വലിയ തീപിടിത്തത്തിന് കാരണമെന്ന് ലോസ് ഏഞ്ചല്‍സ് അഗ്നിശമന സേനാ മേധാവി ക്രിസ്റ്റിന്‍ ക്രൗളി പറഞ്ഞു. തന്റെ ജീവിതത്തില്‍ ഇങ്ങനെയൊരു കാട്ടുതീ കണ്ടിട്ടില്ലെന്നും ക്രൗളി അതിശയം പ്രകടിപ്പിച്ചു. ചൊവ്വാഴ്ച രാവിലെ 10.40 ന് എല്‍ എയുടെ പ്രാന്തപ്രദേശത്ത് തീപ്പൊരി പുകഞ്ഞുകത്തി പടരുന്നതിന്റെ വീഡിയോയാണ് പ്രചരിക്കുന്നത്. അത് പിന്നെ വന്‍തീയായി പടര്‍ന്നപിടിച്ചതോടെ വരുത്തി വച്ച നാശനഷ്ടങ്ങള്‍ എത്രയോ!
കാലിഫോര്‍ണിയയിലെ ജനങ്ങള്‍ നൂറ്റാണ്ടിലെ തന്നെ വലിയ 'കാട്ടുതീ' യെയാണ് നേരിടുന്നത്. ഇതിനോടകം പ്രദേശങ്ങളില്‍ വന്‍ നാശനഷ്ടങ്ങളാണ് ഉണ്ടായിരിക്കുന്നത്. ലോസ് ആഞ്ചെലെസില്‍ പടരുന്ന കാട്ടുതീ വലിയ ആശങ്കയാണ് ഉണ്ടാക്കുന്നതെന്ന് അധികൃതരും വ്യക്തമാക്കി. അതിവേഗമുള്ള കാറ്റിനൊപ്പം ആളിപ്പടരുന്ന കാട്ടുതീ കാലിഫോര്‍ണിയ സംസ്ഥാനത്തെ ഒന്നടങ്കം വിറപ്പിക്കുകയാണ്.
ഇപ്പോഴിതാ, ആളിക്കത്തുന്ന കാട്ടുതീയില്‍ അഞ്ചു മരണം സ്ഥിരീകരിച്ചിരിക്കുകയാണ്. 10,600 ഏക്കറോളം സ്ഥലത്ത് കാട്ടുതീ പടര്‍ന്നു പിടിച്ചതായാണ് റിപ്പോര്‍ട്ട്. അഗ്നിരക്ഷാസേനാ അംഗങ്ങള്‍ ഉള്‍പ്പെടെ നിരവധിപേര്‍ക്ക് ഗുരുതരമായി പൊള്ളലേറ്റിട്ടുണ്ട്. കാട്ടുതീ പടരുന്ന സാഹചര്യത്തില്‍ പ്രദേശവാസികളായ 30,000ല്‍ അധികം ആളുകളെ ഇതിനോടകം മാറ്റിപ്പാര്‍പ്പിച്ചിട്ടുണ്ട്.
സംഭവത്തില്‍ കാലിഫോര്‍ണിയ സംസ്ഥാനത്ത് ഗവര്‍ണര്‍ ഗാവിന്‍ ന്യൂസം അടിയന്തരാവസ്ഥ പ്രഖ്യാപിച്ചിട്ടുണ്ട്. മഴ കൃത്യമായി പെയ്യാത്തതും വരണ്ട കാലാവസ്ഥയും ഉണക്കമരങ്ങളുമാണ് തീ പെട്ടെന്ന് വ്യാപകമായി പടര്‍ന്നുപിടിക്കാന്‍ കാരണമായത്. ഹോളിവുഡ് താരങ്ങള്‍ താമസിക്കുന്ന പസഫിക് പാലിസേഡ്സിലും കാട്ടുതീ അതിരൂക്ഷമായി പടര്‍ന്നുപിടിക്കുകയാണ്.
തുടര്‍ന്ന് ഹോളിവുഡ് ഹില്‍സില്‍ വീണ്ടും തീപിടിത്തം നടന്നതായി വിവരങ്ങള്‍ ഉണ്ട്. പ്രദേശത്ത് വെള്ളം വര്‍ഷിച്ച് തീകെടുത്താന്‍ ശ്രമം തുടരുകയാണെന്ന് അഗ്നിശമനസേനാ വിഭാഗം മേധാവി ക്രിസ്റ്റിന്‍ ക്രൗലി പറഞ്ഞു.
രണ്ട് സ്‌കൂളുകള്‍ പൂര്‍ണമായും കത്തി നശിച്ചതായി ലോസ്ആഞ്ചലിസ് യൂണിഫൈഡ് സ്‌കൂള്‍ സൂപ്രണ്ട് ആര്‍ബെര്‍ട്ടോ കാര്‍വല്‍ഹോ വ്യക്തമാക്കി. കുട്ടികള്‍ക്ക് ഭക്ഷണം വിതരണം ചെയ്യാനായി എട്ട് കേന്ദ്രങ്ങള്‍ തുറക്കുകയും ചെയ്തിട്ടുണ്ട്. അപകടസാഹചര്യം നിലനില്‍ക്കുന്നതിനാല്‍ പ്രദേശത്തെ സ്‌കൂളുകള്‍ക്ക് അവധി പ്രഖ്യാപിച്ചിട്ടുണ്ട്. അധികൃതരുടെ നിര്‍ദ്ദേശങ്ങള്‍ വളരെ കൃത്യമായി പാലിക്കണമെന്ന് ജനങ്ങള്‍ക്ക് നിര്‍ദ്ദേശം നല്‍കിയിട്ടുണ്ട്.
അതേസമയം, സാന്‍ ഗബ്രിയേല്‍ കുന്നുകളുടെ താഴ്വാരത്ത് 177 ഏക്കറില്‍ സ്ഥിതി ചെയ്യുന്ന നാസയുടെ ജെറ്റ് പ്രൊപല്‍ഷ്യന്‍ ലബോററ്ററി താല്‍ക്കാലികമായി അടച്ചു. ലാബിനോട് വളരെ ചേര്‍ന്ന് കാറ്റ് ചില കേടുപാടുകള്‍ സൃഷ്ടിക്കുകയും ചെയ്തിട്ടുണ്ട്. എന്നതൊഴിച്ചാല്‍ ജെപിഎല്ലില്‍ കാട്ടുതീ അപകടമൊന്നും ഇതുവരെ സൃഷ്ടിച്ചില്ല.
അതേസമയം നൂറുകണക്കിന് ജീവനക്കാര്‍ വീടുകള്‍ ഒഴിഞ്ഞു. നിരവധി പേര്‍ക്ക് വീടുകള്‍ നഷ്ടമായി. ദുരിതാശ്വാസ പ്രവര്‍ത്തകര്‍ക്ക് പ്രത്യേക നന്ദി അറിയിക്കുകയാണ്, എല്ലാവരും സുരക്ഷിതരായിക്കുവാന്‍ ശ്രദ്ധിക്കുക എന്നും ജെറ്റ് പ്രൊപല്‍ഷ്യന്‍ ലബോററ്ററി ഡയറക്ടര്‍ ലൗറി ലെഷിന്‍ എക്‌സിലൂടെ വ്യക്തമാക്കി.