മൂന്നുവിക്കറ്റുമായി രവി ബിഷ്ണോയിയും കണ്‍ക്കഷന്‍ സബ് ഹര്‍ഷിത് റാണയും; പകരക്കാരനായെത്തി ടോപ്പ് സ്‌കോററായും കണ്‍ക്കഷന്‍ സബിന് വഴിയൊരുക്കിയും ശിവം ദുബെ; നാലാം ടി20യില്‍ ഇംഗ്ലണ്ടിനെ 15 റണ്‍സിന് തോല്‍പ്പിച്ച് ഇന്ത്യ; ജയത്തോടെ പരമ്പരയും സ്വന്തം
ഇംഗ്ലണ്ടിനെതിരായ ടി20 പരമ്പര ഇന്ത്യക്ക്
പൂനെ:ഇംഗ്ലണ്ടിനെതിരായ ടി20 പരമ്പര ഇന്ത്യക്ക്.പൂനെ, മഹാരാഷ്ട്ര ക്രിക്കറ്റ് അസോസിയേഷന്‍ സ്റ്റേഡിയത്തില്‍ നടന്ന നാലാം ടി20യില്‍
15 റണ്‍സിന് സന്ദര്‍ശകരെ തോല്‍പ്പിച്ച് മത്സരവും പരമ്പരയും ഇന്ത്യ സ്വന്തമാക്കി.ടോസ് നഷ്ടപ്പെട്ട് ബാറ്റിംഗിനെത്തിയ ഇന്ത്യ നിശ്ചിത ഓവറില്‍ ഒമ്പത് വിക്കറ്റ് നഷ്ടത്തില്‍ 181 റണ്‍സാണ് നേടിയത്.മറുപടി ബാറ്റിംഗില്‍ ഇംഗ്ലണ്ടിന് 19.4 ഓവറില്‍ 166 റണ്‍സെടുക്കാന്‍ മാത്രമാണ് സാധിച്ചത്.മൂന്ന് വിക്കറ്റ് വീതം നേടിയ ഹര്‍ഷിത് റാണ, രവി ബിഷ്ണോയ് എന്നിവരാണ് ഇംഗ്ലണ്ടിനെ തകര്‍ത്തത്.
ഇതില്‍ ഹര്‍ഷിത് കണ്‍ക്കഷന്‍ സബ്ബായിട്ടാണ് ടീമിലെത്തിയത്.പകരക്കാരനായെത്തി ഇന്നത്തെ ടോപ്സ്‌കോററാവുകയും കണ്‍ക്കഷന്‍ സബ്ബിന് അവസരമൊരുക്കുകയും ചെയ്ത ശിവംദുബെ മത്സരത്തില്‍ നിര്‍ണ്ണായകമായി.ബാറ്റ് ചെയ്യുന്നതിനിടെ ഇന്ത്യന്‍ താരം ദുബെയ്ക്ക് പകരം ഹര്‍ഷിത് ഇറങ്ങുകയായിരുന്നു.ഇംഗ്ലണ്ടിനെതിരായ ട്വന്റി20 പരമ്പരയില്‍ ഇത്തവണ ടോസ് ഭാഗ്യം അനുഗ്രഹിച്ച ഇംഗ്ലണ്ട് നായകന്‍ ജോസ് ബട്‌ലര്‍ ഇന്ത്യയെ ബാറ്റിങ്ങിന് അയയ്ക്കുകയായിരുന്നു.ആദ്യം ബാറ്റ് ചെയ്ത ഇന്ത്യ സാഖിബ് മഹ്‌മൂദിനു മുന്നില്‍ തകരുകയായിരുന്നു.3 വിക്കറ്റുകള്‍ എളുപ്പം നഷ്ടപ്പെട്ട ഇന്ത്യയെ, ഹാര്‍ദിക് പാണ്ഡ്യയ്‌ക്കൊപ്പം ശിവം ദുബെയും റിങ്കു സിങ്ങും ചേര്‍ന്നാണ് മികച സ്‌കോറില്‍ എത്തിച്ചത്. ഒരു ഘട്ടത്തില്‍ മൂന്നിന് 12 റണ്‍സ് എന്ന നിലയില്‍ തകര്‍ന്ന ശേഷമായിരുന്നു ഇന്ത്യയുടെ തകര്‍പ്പന്‍ തിരിച്ചുവരവ്.
തകര്‍ത്തടിച്ച് അര്‍ധസെഞ്ചറി നേടിയ ഹാര്‍ദിക് പാണ്ഡ്യ, ശിവം ദുബെ എന്നിവരാണ് ഇന്ത്യയുടെ ടോപ് സ്‌കോറര്‍മാര്‍.പാണ്ഡ്യ 30 പന്തില്‍ നാലു വീതം സിക്സും ഫോറും സഹിതം 53 റണ്‍സെടുത്തു. ദുബെ 34 പന്തില്‍ ഏഴു ഫോറും രണ്ടു സിക്സും സഹിതം 53 റണ്‍സെടുത്ത് അവസാന പന്തില്‍ റണ്ണൗട്ടായി.സഞ്ജുവും സൂര്യയുമടക്കമുള്ള മുന്‍നിര താരങ്ങള്‍ കൂട്ടത്തോടെ നിരാശപ്പെടുത്തിയതോടെ കൂട്ടത്തകര്‍ച്ചയിലേക്കു നീങ്ങിയ ഇന്ത്യയ്ക്ക്, ഹാര്‍ദിക് പാണ്ഡ്യയുടെ അര്‍ധസെഞ്ചറിക്കു പുറമേ പരമ്പരയിലാദ്യമായി അവസരം ലഭിച്ച റിങ്കു സിങ്, ശിവം ദുബെ എന്നിവരുടെ ഇന്നിങ്സുകളുമാണ് കരുത്തായത്.അതില്‍ത്തന്നെ, പിരിയാത്ത ആറാം വിക്കറ്റില്‍ പാണ്ഡ്യ ദുബെ സഖ്യം കൂട്ടിച്ചേര്‍ത്ത അര്‍ധസെഞ്ചറി കൂട്ടുകെട്ട് നിര്‍ണായകമായി.
44 പന്തുകള്‍ നേരിട്ട ഇരുവരും ഇന്ത്യന്‍ സ്‌കോര്‍ബോര്‍ഡില്‍ എത്തിച്ചത് 87 റണ്‍സാണ്.ശിവം ദുബെ 30 പന്തില്‍ ആറു ഫോറും മൂന്നു സിക്സും സഹിതം 49 റണ്‍സോടെയും പുറത്താകാതെ നിന്നു.റിങ്കു സിങ് 26 പന്തില്‍ നാലു ഫോറും ഒരു സിക്സും സഹിതം 30 റണ്‍സെടുത്തു.19 പന്തില്‍ നാലു ഫോറും ഒരു സിക്സും സഹിതം 29 റണ്‍സെടുത്ത അഭിഷേക് ശര്‍മയുടെ പ്രകടനവും നിര്‍ണായകമായി.
മാര്‍ക്ക് വുഡിനു പകരക്കാരനായി ഇംഗ്ലണ്ട് ടീമില്‍ ഉള്‍പ്പെടുത്തിയ സാഖിബ് മഹ്‌മൂദിന്റെ ആദ്യ ഓവറാണ് ഇന്ത്യന്‍ മുന്‍നിരയുടെ നടുവൊടിച്ചത്.ഈ ഓവറിലെ ആദ്യ പന്തില്‍ ഒരു റണ്‍സെടുത്ത സഞ്ജു സാംസണിനെയും രണ്ടാം പന്തില്‍ റണ്‍സെടുക്കുന്നതിന് മുന്‍പ് തിലക് വര്‍മയേയും,അവസാന പന്തില്‍ സൂര്യകുമാര്‍ യാദവിനെയും പുറത്താക്കിയാണ് സാഖിബ് ഇംഗ്ലണ്ടിന് മികച്ച തുടക്കം സമ്മാനിച്ചത്.
ഇംഗ്ലണ്ടിനായി സാഖിബ് നാല് ഓവറില്‍ 35 റണ്‍സ് വഴങ്ങി മൂന്നുവിക്കറ്റ് വീഴ്ത്തിയപ്പോള്‍ ബ്രൈഡന്‍ കാഴ്സ്,ജെയ്മി ഓവര്‍ട്ടന്‍,ആദില്‍ റഷീദ് എന്നിവര്‍ക്ക് ഓരോ വിക്കറ്റ് ലഭിച്ചു.
മറുപടി ബാറ്റിങ്ങ് ആരംഭിച്ച ഇംഗ്ലണ്ടിനു പരമ്പരയിലെ തന്നെ ഏറ്റവും മികച്ച തുടക്കമായിരുന്നു ലഭിച്ചത്.ഒരു മത്സരത്തിന്റെ ഇടവേളയ്ക്കു ശേഷം ടീമില്‍ തിരിച്ചെത്തിയ അര്‍ഷ്ദീപ് സിങ്ങിനെ ഇംഗ്ലണ്ട് ഓപ്പണര്‍മാര്‍ മികച്ച രീതിയില്‍ കൈകാര്യം ചെയ്തത് നിര്‍ണായകമായി. ഓപ്പണിങ് വിക്കറ്റില്‍ അര്‍ധസെഞ്ചറി കൂട്ടുകെട്ട് തീര്‍ത്ത ബെന്‍ ഡക്കറ്റ് ഫില്‍ സോള്‍ട്ട് സഖ്യം വേര്‍പിരിഞ്ഞത് പവര്‍പ്ലേയിലെ അവസാന പന്തില്‍. 19 പന്തില്‍ 39 റണ്‍സെടുത്ത ബെന്‍ ഡക്കറ്റിനെ പുറത്താക്കി രവി ബിഷ്ണോയിയാണ് കൂട്ടുകെട്ട് പൊളിച്ചത്. 36 പന്തില്‍ ഇരുവരും അടിച്ചുകൂട്ടിയത് 62 റണ്‍സ്.
ആദ്യ വിക്കറ്റ് നഷ്ടമായതിനു പിന്നാലെ ഇംഗ്ലണ്ടിന് തുടര്‍ച്ചയായി നഷ്ടമായത് രണ്ടു വിക്കറ്റ്.21 പന്തില്‍ 23 റണ്‍സെടുത്ത ഫില്‍ സോള്‍ട്ടിനെ അക്ഷര്‍ പട്ടേല്‍ പുറത്താക്കി.പിന്നാലെ ജോസ് ബട്ലറിനെയും രവി ബിഷ്ണോയ് പുറത്താക്കിയതോടെ ഇംഗ്ലണ്ട് വിക്കറ്റ് നഷ്ടം കൂടാതെ 62 റണ്‍സ് എന്ന നിലയില്‍നിന്ന് മൂന്നിന് 67 റണ്‍സ് എന്ന നിലയിലേക്ക് പതിച്ചു.ട്വന്റി20യില്‍ ആദ്യമായി കണ്‍കഷന്‍ സബ്ബായി എത്തിയ ഹര്‍ഷിത് റാണ രണ്ടാം പന്തില്‍ ലിയാം ലിവിങ്സ്റ്റനെ പുറത്താക്കി ഇംഗ്ലണ്ടിന് അടുത്ത പ്രഹരമേല്‍പ്പിച്ചു.13 പന്തില്‍ ഒന്‍പതു റണ്‍സാണ് ലിവിങ്ങ്സ്റ്റണ്‍ നേടിയത്.പരമ്പരയിലാദ്യമായി ഫോം കണ്ടെത്തിയ ഹാരി ബ്രൂക്ക് ഒരറ്റത്ത് തകര്‍ത്തടിച്ച് അര്‍ധസെഞ്ചറി നേടിയതോടെ ഇംഗ്ലണ്ടിന് പ്രതീക്ഷയായി.26 പന്തില്‍ അഞ്ച് ഫോറും രണ്ടു സിക്സും സഹിതം 52 റണ്‍സെടുത്ത ബ്രൂക്കിനെ, വരുണ്‍ ചക്രവര്‍ത്തി പുറത്താക്കിയത് മത്സരത്തിലെ തന്നെ വഴിത്തിരിവായി.
ജേക്കബ് ബെത്തല്‍ (ഒന്‍പതു പന്തില്‍ ആറ്), ബ്രൈഡന്‍ കാഴ്സ് (0), ജോഫ്ര ആര്‍ച്ചര്‍ (0) എന്നിവരും നിരാശപ്പെടുത്തിയതോടെ ഇംഗ്ലണ്ട് വീണ്ടും തകര്‍ന്നു.ഒടുവില്‍ ഇംഗ്ലണ്ടിന്റെ മറുപടി 19.4 ഓവറില്‍ 166 റണ്‍സില്‍ അവസാനിച്ചു.പരമ്പരയില്‍ ആദ്യമായി അര്‍ധസെഞ്ചറി നേടിയ ഹാരി ബ്രൂക്കാണ് ഇംഗ്ലണ്ടിന്റെ ടോപ് സ്‌കോറര്‍.ഇന്ത്യയ്ക്കായി ശിവം ദുബെയുടെ കണ്‍കഷന്‍ സബ്ബായി കളത്തിലിറങ്ങിയ ഹര്‍ഷിത് റാണയും രവി ബിഷ്ണോയിയും മൂന്നു വിക്കറ്റ് വീതം വീഴ്ത്തി. വരുണ്‍ ചക്രവര്‍ത്തിക്ക് രണ്ടും അക്ഷര്‍ പട്ടേല്‍, അര്‍ഷ്ദീപ് സിങ് എന്നിവര്‍ക്ക് ഓരോ വിക്കറ്റും ലഭിച്ചു.