ട്രംപ് കള്ളം പറയുന്നോ? ചര്ച്ച നടന്നിട്ടില്ലെന്ന് ഇറാന്; 'തിരിച്ചടിയെ ഭയന്ന് ട്രംപ് മുട്ടുകുത്തി എന്ന് പരിഹാസം; എണ്ണവില കുറയ്ക്കാനുള്ള തന്ത്രമെന്ന് വിദേശ മന്ത്രാലയം; വെടിനിര്ത്തലിന് പിന്നിലെ കളി എന്ത്? ഇറാനില് ഭരണമാറ്റം ഉണ്ടായെന്ന് അവകാശപ്പെട്ട് ട്രംപ്; യുഎസ് പ്രസിഡന്റിനെ വകവയ്ക്കാതെ ആക്രമണം തുടര്ന്ന് ഇസ്രയേല്; പ്രതികരിക്കാതെ നെതന്യാഹു
ട്രംപ് കള്ളം പറയുന്നോ? ചര്ച്ച നടന്നിട്ടില്ലെന്ന് ഇറാന്
വാഷിങ്ടണ്/ടെഹ്റാന്: യുഎസ് പ്രസിഡന്റ് അഞ്ച് ദിവസത്തെ വെടിനിര്ത്തല് പ്രഖ്യാപിച്ചതിന് പിന്നാലെ, യുദ്ധത്തില് ഡൊണാള്ഡ് ട്രംപ് 'പിന്വാങ്ങിയെന്ന്' അവകാശപ്പെട്ട് ഇറാന്. പശ്ചിമേഷ്യയിലെ യുദ്ധം അവസാനിപ്പിക്കാന് 'വളരെ നല്ല ചര്ച്ചകള്' നടന്നുവെന്ന് അവകാശപ്പെട്ടാണ് ട്രംപ് ഇന്ന് രാവിലെ ആക്രമണങ്ങള്ക്ക് താല്ക്കാലിക വിരാമം പ്രഖ്യാപിച്ചത്. എന്നാല്, ചര്ച്ചകള് നടക്കുന്നുണ്ടെന്ന ട്രംപിന്റെ അവകാശവാദം ഇറാന് വിദേശകാര്യ മന്ത്രാലയം തള്ളി. ഊര്ജ്ജ വില കുറയ്ക്കാനും സൈനിക നീക്കങ്ങള്ക്കായി സമയം കണ്ടെത്താനുമാണ് ട്രംപ് ശ്രമിക്കുന്നതെന്ന് മന്ത്രാലയം ആരോപിച്ചു.
'യുഎസ് പ്രസിഡന്റിന്റെ പ്രസ്താവനകള് ഊര്ജ്ജ വില കുറയ്ക്കുന്നതിനും അദ്ദേഹത്തിന്റെ സൈനിക പദ്ധതികള് നടപ്പിലാക്കാന് സമയം നേടുന്നതിനുമുള്ള ശ്രമങ്ങളുടെ ഭാഗമാണ്. സംഘര്ഷം ലഘൂകരിക്കാന് പ്രാദേശിക രാജ്യങ്ങളുടെ മുന്കൈയില് ശ്രമങ്ങള് നടക്കുന്നുണ്ട്. അവരോടുള്ള ഞങ്ങളുടെ മറുപടി വ്യക്തമാണ്: ഞങ്ങള് ഈ യുദ്ധം തുടങ്ങിയവരല്ല, ഈ ആവശ്യങ്ങളെല്ലാം വാഷിംഗ്ടണിലേക്കാണ് അയക്കേണ്ടത്.'- വിദേശ കാര്യമന്ത്രാലയം പ്രസ്താവനയില് പറഞ്ഞു.
ചര്ച്ചകളൊന്നും നടന്നിട്ടില്ലെന്നും ഹോര്മുസ് കടലിടുക്ക് തുറന്നില്ലെങ്കില് ഊര്ജ്ജ നിലയങ്ങള് ബോംബിട്ട് തകര്ക്കുമെന്ന 48 മണിക്കൂര് അന്ത്യശാസനത്തില് നിന്ന് ട്രംപ് ഭയന്ന് പിന്വാങ്ങുകയാണെന്നുമാണ് ഇറാനിയന് മാധ്യമങ്ങള് റിപ്പോര്ട്ട് ചെയ്യുന്നത്. 'ഇറാന്റെ തിരിച്ചടിയെ ഭയന്ന് ട്രംപ് തന്റെ 48 മണിക്കൂര് അന്ത്യശാസനത്തില് നിന്ന് പിന്വാങ്ങി' എന്ന് ഐആര്ഐബി (IRIB) സ്റ്റേറ്റ് ടെലിവിഷന് റിപ്പോര്ട്ട് ചെയ്തു.
ട്രംപിന്റെ പ്രഖ്യാപനത്തിന് പിന്നാലെ യൂറോപ്പിലുടനീളം ഓഹരി വിപണികള് ഉണരുകയും എണ്ണ, ഗ്യാസ് വിലകള് ഇടിയുകയും ചെയ്തു.
ട്രംപിനെ വകവയ്ക്കാതെ ഇസ്രയേല്
ട്രംപിന്റെ വെടിനിര്ത്തല് പ്രഖ്യാപനത്തിനിടെയും ടെഹ്റാനില് 'അടുത്ത ഘട്ട' ആക്രമണങ്ങള് ആരംഭിച്ച് ഇസ്രായേല് പ്രതിരോധ സേന (IDF). ഇറാനിലെ സൈനിക നീക്കങ്ങള് അഞ്ച് ദിവസത്തേക്ക് നിര്ത്തിവെക്കാന് യുഎസ് പ്രസിഡന്റ് ഡൊണാള്ഡ് ട്രംപ് ഉത്തരവിട്ടതിന് തൊട്ടുപിന്നാലെയാണ് ഇസ്രായേല് ആക്രമണം കടുപ്പിച്ചത്.
എക്സിലെ (X) ഔദ്യോഗിക കുറിപ്പിലൂടെ ഐഡിഎഫ് ഇക്കാര്യം സ്ഥിരീകരിച്ചു: 'ടെഹ്റാനില് അടുത്ത ഘട്ടം ആക്രമണങ്ങള്ക്ക് ഐഡിഎഫ് തുടക്കം കുറിച്ചു. ഇറാനിയന് ഭീകര ഭരണകൂടത്തിന്റെ ടെഹ്റാനിലുടനീളമുള്ള അടിസ്ഥാന സൗകര്യങ്ങള്ക്ക് നേരെയാണ് പുതിയ ആക്രമണ പരമ്പരകള് ആരംഭിച്ചിരിക്കുന്നത്.'
അതേസമയം, ട്രംപിന്റെ വെടിനിര്ത്തല് പ്രഖ്യാപനത്തെക്കുറിച്ച് ഇസ്രായേല് പ്രധാനമന്ത്രി ബെഞ്ചമിന് നെതന്യാഹു ഇതുവരെ ഔദ്യോഗികമായി പ്രതികരിച്ചിട്ടില്ല.
ഇറാനില് ഭരണമാറ്റം ഉണ്ടായെന്ന് ട്രംപ്
ഇറാനില് ഭരണകൂട മാറ്റം ഉണ്ടായതായി ഡൊണാള്ഡ് ട്രംപ് അവകാശപ്പെട്ടു. നിലവില് 'തികച്ചും വ്യത്യസ്തരായ ആളുകളാണ്' രാജ്യത്തെ നയിക്കുന്നതെന്ന് ട്രംപ് അവകാശപ്പെട്ടതായി സിഎന്ബിസി (CNBC) റിപ്പോര്ട്ട് ചെയ്യുന്നു. യുദ്ധം അവസാനിപ്പിക്കുന്നത് സംബന്ധിച്ച് ഇറാനുമായി 'ഫലപ്രദമായ' ചര്ച്ചകള് നടന്നുവെന്ന പ്രസ്താവനയ്ക്ക് പിന്നാലെയാണ് ട്രംപിന്റെ ഈ പുതിയ വെളിപ്പെടുത്തല്.
എന്നാല്, ചര്ച്ചകള് നടന്നിട്ടില്ലെന്ന് ഇറാന് ആവര്ത്തിക്കുമ്പോഴും ഭരണനേതൃത്വത്തിലെ വമ്പന് സ്രാവുകള് കൊല്ലപ്പെട്ടത് ഇറാനെ തളര്ത്തിയിട്ടുണ്ട്. 'ഓപ്പറേഷന് എപിക് ഫ്യൂറി' (Operation Epic Fury) ആരംഭിച്ച ആദ്യ മണിക്കൂറുകളില് തന്നെ പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ടിരുന്നു. ഇതിന് പിന്നാലെ ഇറാന്റെ സുരക്ഷാ തലവനും ഡിഫാക്ടോ നേതാവുമായ അലി ലാരിജാനി, രഹസ്യാന്വേഷണ മന്ത്രി ഇസ്മായില് ഖത്തീബ് എന്നിവരും കൊല്ലപ്പെട്ടതായി സ്ഥിരീകരിച്ചിട്ടുണ്ട്.
ട്രംപിന്റെ പ്രഖ്യാപനം 'മനഃശാസ്ത്രപരമായ യുദ്ധം' ആണെന്ന് ഇറാനിയന് ഉദ്യോഗസ്ഥന്
ടെഹ്റാനുനേരെയുള്ള ആക്രമണങ്ങള് നിര്ത്താന് താന് ഉത്തരവിട്ടെന്ന ഡോണള്ഡ് ട്രംപിന്റെ ട്രൂത്ത് സോഷ്യല് (Truth Social) പ്രഖ്യാപനത്തെ ഇറാനിയന് സുരക്ഷാ ഉദ്യോഗസ്ഥന് വിമര്ശിച്ചു. ഇത് വെറും 'മനഃശാസ്ത്രപരമായ യുദ്ധം' മാത്രമാണെന്ന് അദ്ദേഹം ആരോപിച്ചതായി സര്ക്കാര് അനുകൂല വാര്ത്താ ഏജന്സിയായ ഫാര്സ് ന്യൂസ് (Fars News) റിപ്പോര്ട്ട് ചെയ്യുന്നു.
ടെലിഗ്രാമിലൂടെ പുറത്തുവിട്ട സന്ദേശത്തില്, അമേരിക്കയും ഇറാനും തമ്മില് യാതൊരുവിധ ചര്ച്ചകളും നടന്നിട്ടില്ലെന്നും നിലവില് നടക്കുന്നില്ലെന്നും പേര് വെളിപ്പെടുത്താത്ത ഈ മുതിര്ന്ന ഉദ്യോഗസ്ഥന് വ്യക്തമാക്കി. ട്രംപിന്റെ പ്രസ്താവനകളെ 'മനഃശാസ്ത്ര യുദ്ധം' എന്ന് വിശേഷിപ്പിച്ച അദ്ദേഹം, ഈ പ്രഖ്യാപനം കൊണ്ട് ഹോര്മുസ് കടലിടുക്കിലെ (Strait of Hormuz) സ്ഥിതിഗതികള് യുദ്ധത്തിന് മുമ്പുള്ള അവസ്ഥയിലേക്ക് മാറില്ലെന്നും ഊര്ജ്ജ വിപണിയെ ശാന്തമാക്കാന് ഇത് സഹായിക്കില്ലെന്നും പറഞ്ഞു. ഇറാന് തുടര്ന്നും 'പ്രതിരോധം തുടരുമെന്നും രാജ്യത്തെ വിപുലമായി സംരക്ഷിക്കുമെന്നും' അദ്ദേഹം കൂട്ടിച്ചേര്ത്തതായി ഫാര്സ് റിപ്പോര്ട്ട് ചെയ്തു.
അഞ്ചുദിവസത്തെ വെടിനിര്ത്തല് ട്രംപ് പ്രഖ്യാപിച്ചത് ഇങ്ങനെ:
തന്റെ സോഷ്യല് മീഡിയ പ്ലാറ്റ്ഫോമായ ട്രൂത്ത് സോഷ്യലിലൂടെയാണ് (Truth Social) ഇറാനുമായുള്ള സൈനിക ആക്രമണങ്ങള്ക്ക് അഞ്ച് ദിവസത്തെ ഇടവേള ഡൊണാള്ഡ് ട്രംപ് പ്രഖ്യാപിച്ചത്,
'കഴിഞ്ഞ രണ്ട് ദിവസങ്ങളായി, പശ്ചിമേഷ്യയിലെ നമ്മുടെ ശത്രുത പൂര്ണ്ണമായും അവസാനിപ്പിക്കുന്നതിനെക്കുറിച്ച് അമേരിക്കയും ഇറാനും തമ്മില് വളരെ നല്ലതും ഫലപ്രദവുമായ സംഭാഷണങ്ങള് നടന്നിട്ടുണ്ട്,' എന്ന് ട്രംപ് തന്റെ പോസ്റ്റില് കുറിച്ചു.
ഇറാനിലെ വൈദ്യുതി നിലയങ്ങള്ക്കും ഊര്ജ്ജ അടിസ്ഥാന സൗകര്യങ്ങള്ക്കും നേരെയുള്ള എല്ലാ സൈനിക ആക്രമണങ്ങളും മാറ്റിവെക്കാന് താന് യുഎസ് പ്രതിരോധ വകുപ്പിന് (Department of War) നിര്ദ്ദേശം നല്കിയതായും ട്രംപ് പറഞ്ഞു.
ഹോര്മുസ് കടലിടുക്ക് (Strait of Hormuz) പൂര്ണ്ണമായും തുറന്നുനല്കാന് ഇറാനോട് ശനിയാഴ്ച അദ്ദേഹം 48 മണിക്കൂര് അന്ത്യശാസനം നല്കിയിരുന്നു. ഇതിന് പിന്നാലെയാണ് പുതിയ പ്രഖ്യാപനം. ട്രംപിന്റെ പ്രസ്താവന വന്നതോടെ ഓഹരി വിപണികള് ഉണരുകയും എണ്ണവില കുത്തനെ ഇടിയുകയും ചെയ്തു.