അമേരിക്കന് ഭീഷണിക്ക് മുന്നില് മുട്ടുമടക്കില്ലെന്ന് ഇറാന് പ്രസിഡന്റ്; തങ്ങളുടെ ഊര്ജ്ജ സ്രോതസ്സുകള് ആക്രമിക്കപ്പെട്ടാല് പശ്ചിമേഷ്യയിലെ മുഴുവന് എണ്ണക്കമ്പനികളും ഊര്ജ്ജ നിലയങ്ങളും നാമാവശേഷമാക്കുമെന്ന് പെസെഷ്കിയാന്; ഹോര്മുസ് കടലിടുക്കിലെ ഉപരോധം ആഗോള സമ്പദ്വ്യവസ്ഥയെ കനത്ത പ്രതിസന്ധിയിലാക്കുന്നു; ട്രംപിന്റെ അന്ത്യശാസനം ഇറാന് തള്ളി; പശ്ചിമേഷ്യയില് ഇനി എന്ത്?
ഹോര്മുസ് കടലിടുക്ക് ഉടനടി തുറന്നുനല്കണമെന്ന അമേരിക്കന് പ്രസിഡന്റ് ഡൊണാള്ഡ് ട്രംപിന്റെ അന്ത്യശാസനം ഇറാന് തള്ളിയതോടെ പശ്ചിമേഷ്യയില് യുദ്ധഭീതി പാരമ്യത്തിലെത്തി. ഞായറാഴ്ച അര്ദ്ധരാത്രിയോടെ ട്രംപ് നല്കിയ 48 മണിക്കൂര് സമയപരിധി അവസാനിച്ചതോടെ, മേഖലയില് വന് സൈനിക നീക്കങ്ങളാണ് നടക്കുന്നത്. കടലിടുക്കിലൂടെയുള്ള കപ്പല് ഗതാഗതം പുനഃസ്ഥാപിച്ചില്ലെങ്കില് ഇറാന്റെ ഊര്ജ്ജ നിലയങ്ങള് തകര്ക്കുമെന്നാണ് വൈറ്റ് ഹൗസിന്റെ മുന്നറിയിപ്പ്.
ഇറാന്റെ ഭാഗത്തുനിന്നുള്ള പ്രകോപനം തുടര്ന്നാല് രാജ്യം നേരിടാന് പോകുന്നത് 'സമ്പൂര്ണ്ണ നാശം' ആയിരിക്കുമെന്ന് ട്രംപ് ഇസ്രായേലി മാധ്യമത്തിന് നല്കിയ അഭിമുഖത്തില് വ്യക്തമാക്കി. ഇറാന്റെ ഏറ്റവും വലിയ വൈദ്യുതി നിലയങ്ങളെയായിരിക്കും അമേരിക്ക ആദ്യം ലക്ഷ്യം വെക്കുക. 47 വര്ഷമായി ഇറാന് തുടരുന്ന ശത്രുതയ്ക്ക് അറുതി വരുത്താന് സമയമായെന്നും അദ്ദേഹം കൂട്ടിച്ചേര്ത്തു.
അതേസമയം, അമേരിക്കന് ഭീഷണിക്ക് മുന്നില് മുട്ടുമടക്കില്ലെന്ന് ഇറാന് പ്രസിഡന്റ് മസൂദ് പെസെഷ്കിയാന് തിരിച്ചടിച്ചു. തങ്ങളുടെ ഊര്ജ്ജ സ്രോതസ്സുകള് ആക്രമിക്കപ്പെട്ടാല് പശ്ചിമേഷ്യയിലെ മുഴുവന് എണ്ണക്കമ്പനികളും ഊര്ജ്ജ നിലയങ്ങളും നാമാവശേഷമാക്കുമെന്ന് ഇറാന് മുന്നറിയിപ്പ് നല്കി. മേഖലയെയാകെ തകര്ക്കുന്ന രീതിയിലുള്ള തിരിച്ചടിയുണ്ടാകുമെന്നാണ് ഇറാന്റെ പക്ഷം.
ഹോര്മുസ് കടലിടുക്കിലെ ഉപരോധം ആഗോള സമ്പദ്വ്യവസ്ഥയെ കനത്ത പ്രതിസന്ധിയിലാക്കിയിരിക്കുകയാണ്. ലോകത്തിലെ എണ്ണ വ്യാപാരത്തിന്റെ 20 ശതമാനവും കടന്നുപോകുന്ന ഈ പാത അടഞ്ഞതോടെ അന്താരാഷ്ട്ര വിപണിയില് എണ്ണവില 50 ശതമാനത്തോളം വര്ദ്ധിച്ചു. ബാരലിന് 100 ഡോളറിന് മുകളിലെത്തിയ വില ഇനിയും ഇരട്ടിയാകാന് സാധ്യതയുണ്ടെന്നാണ് സാമ്പത്തിക വിദഗ്ധരുടെ വിലയിരുത്തല്.
ഇസ്രായേലിലെ ഡിമോണ ആണവനിലയത്തിന് സമീപം ഇറാന് നടത്തിയ മിസൈല് ആക്രമണമാണ് നിലവിലെ സംഘര്ഷം രൂക്ഷമാക്കിയത്. ആക്രമണത്തില് 70 കുട്ടികളടക്കം 160 ഓളം പേര്ക്ക് പരിക്കേറ്റിരുന്നു. ഇറാന്റെ ആണവ കേന്ദ്രമായ നടാന്സിനു നേരെ ഇസ്രായേല് നടത്തിയ ആക്രമണത്തിനുള്ള തിരിച്ചടിയായിരുന്നു ഇത്. ഇസ്രായേലിനെ ലക്ഷ്യം വെച്ച് ഇറാന് ഇതുവരെ 400 ഓളം ബാലിസ്റ്റിക് മിസൈലുകള് പ്രയോഗിച്ചതായാണ് കണക്കുകള്.
ലോകം ഒരു ആണവ ദുരന്തത്തിന്റെ മുനമ്പിലാണെന്ന് ലോകാരോഗ്യ സംഘടന മുന്നറിയിപ്പ് നല്കി. ഇരുവിഭാഗവും സംയമനം പാലിക്കണമെന്നും ആണവ നിലയങ്ങളെ ലക്ഷ്യം വെക്കുന്നതില് നിന്ന് പിന്തിരിയണമെന്നും ഡയറക്ടര് ജനറല് ടെഡ്രോസ് അദാനോം ഗെബ്രിയേസസ് അഭ്യര്ത്ഥിച്ചു. യുദ്ധം നാലാം വാരത്തിലേക്ക് കടക്കുമ്പോള് സാഹചര്യം നിയന്ത്രണാതീതമാകുകയാണെന്നും അദ്ദേഹം പറഞ്ഞു.
ഇറാന്റെ പ്രധാന എണ്ണക്കയറ്റുമതി കേന്ദ്രമായ ഖാര്ഗ് ദ്വീപ് പിടിച്ചെടുക്കാന് അമേരിക്ക പദ്ധതിയിടുന്നതായി റിപ്പോര്ട്ടുകളുണ്ട്. ആയിരക്കണക്കിന് യുഎസ് മറീനുകള് ഇതിനോടകം തന്നെ മേഖലയിലേക്ക് തിരിച്ചു കഴിഞ്ഞു. ഖാര്ഗ് ദ്വീപ് പിടിച്ചെടുക്കുന്നതിലൂടെ ഇറാന്റെ സാമ്പത്തിക അടിത്തറ തകര്ത്ത് അവരെ ചര്ച്ചയ്ക്ക് പ്രേരിപ്പിക്കാനാണ് വാഷിംഗ്ടണ് ലക്ഷ്യമിടുന്നത്.
ഖത്തറിലെ ദോഹയില് നിന്ന് ജനങ്ങളോട് എത്രയും വേഗം ഒഴിഞ്ഞുപോകാണമെന്ന് ഇറാന്റെ റെവല്യൂഷണറി ഗാര്ഡ് നിര്ദ്ദേശം നല്കിയിട്ടുണ്ട്. അമേരിക്കന് സൈനിക താവളങ്ങള് സ്ഥിതി ചെയ്യുന്നതിനാല് ദോഹയെ തങ്ങളുടെ ലക്ഷ്യസ്ഥാനമായി കണക്കാക്കുമെന്നാണ് ഇറാന്റെ മുന്നറിയിപ്പ്. സൗദി അറേബ്യയുടെ തലസ്ഥാനത്തിന് നേരെയും കഴിഞ്ഞ ദിവസം മിസൈല് ആക്രമണ ശ്രമങ്ങളുണ്ടായി.
ഇറാന്റെ ഉന്നത നേതാക്കളെയും സൈനിക കേന്ദ്രങ്ങളെയും ലക്ഷ്യം വെച്ചുള്ള ആക്രമണം ഇനിയും തുടരുമെന്ന് ഇസ്രായേല് പ്രധാനമന്ത്രി ബെഞ്ചമിന് നെതന്യാഹു വ്യക്തമാക്കി. ഇറാന്റെ റെവല്യൂഷണറി ഗാര്ഡിനെ 'കുറ്റവാളികളുടെ സംഘം' എന്ന് വിശേഷിപ്പിച്ച അദ്ദേഹം, അവരുടെ സാമ്പത്തിക സ്രോതസ്സുകളെ ഇല്ലാതാക്കുമെന്നും പ്രഖ്യാപിച്ചു. ഇസ്രായേല് സൈന്യം നിലവില് പകുതി ലക്ഷ്യം മാത്രമാണ് പൂര്ത്തിയാക്കിയിട്ടുള്ളതെന്നും ആക്രമണം ഇനിയും ആഴ്ചകളോളം നീളുമെന്നും സൈനിക മേധാവി എയല് സാമിര് പറഞ്ഞു.
ഇറാഖിലെ ബാഗ്ദാദ് വിമാനത്താവളത്തിന് സമീപമുള്ള അമേരിക്കന് കേന്ദ്രങ്ങള്ക്ക് നേരെയും ഡ്രോണ് ആക്രമണങ്ങള് റിപ്പോര്ട്ട് ചെയ്തിട്ടുണ്ട്. പശ്ചിമേഷ്യയാകെ യുദ്ധത്തിന്റെ കരിനിഴലിലായതോടെ ലോകരാജ്യങ്ങള് ആശങ്കയിലാണ്. ട്രംപ് നല്കിയ സമയം അവസാനിച്ചതോടെ ലോകം ഉറ്റുനോക്കുന്നത് ഹോര്മുസ് കടലിടുക്കിലേക്കാണ്.