എം എസ് ധോണിയുടെ ജീവിതത്തെ ആസ്പദമാക്കി അനിമേഷൻ വെബ് സീരിസ്; 'ക്യാപ്റ്റൻ 7' ആദ്യ എപ്പിസോഡ് 2022ൽ

ന്യൂഡൽഹി: ഇന്ത്യൻ ക്രിക്കറ്റ് ടീം മുൻ നായകൻ മഹേന്ദ്ര സിങ് ധോണിയുടെ ജീവിതത്തെ ആസ്പദമാക്കി അനിമേഷൻ വെബ് സീരിസ്. ക്യാപ്റ്റൻ 7 എന്ന പേരിലാണ് സീരിസ് എത്തുന്നത്. 2022ൽ വെബ്‌സീരിസിന്റെ ആദ്യ എപ്പിസോഡ് പുറത്ത് വരും.

ധോണിയുടെ ജേഴ്‌സി നമ്പറിനെ ഓർമിപ്പിച്ചാണ് സീരിസിന് ധോണി 7 എന്ന പേര് നൽകിയിരിക്കുന്നതെന്ന് അണിയറ പ്രവർത്തകർ അറിയിച്ചു. ധോണിയും ഭാര്യ സാക്ഷിയും ചേർന്ന് നടത്തുന്ന നിർമ്മാണ കമ്പനിയായ ധോണി പ്രൊഡക്ഷൻ ഹൗസും ബ്ലാക്ക് വൈറ്റ് ഓറഞ്ച് ബ്രാൻഡും ചേർന്നാണ് വെബ്‌സീരിസ് നിർമ്മിക്കുന്നത്.

ധോണിയെ കുറിച്ചുള്ള അനിമേഷൻ ഫിക്ഷൻ സ്‌റ്റോറിയെന്നാണ് ഭാര്യ സാക്ഷിയുടെ വെബ്‌സീരിസിനെ കുറിച്ചുള്ള കമന്റ്. ധോണിയുടെ നിർമ്മാണ കമ്പനിയുമായുള്ള കരാർ സ്വപ്നസമാനമാണെന്ന് ബ്ലാക്ക് വൈറ്റ് ഓറഞ്ച് ബ്രാൻഡും പ്രതികരിച്ചു.