കോവിഡ് വ്യാപനത്താൽ റദ്ദാക്കിയ സി.ബി.എസ്.ഇ പത്താംക്ലാസ് പരീക്ഷ ഫലം ജൂണിൽ; സ്‌കൂളുകൾക്ക് മാർക്ക് അപ്ലോഡ് ചെയ്യാനുള്ള പോർട്ടൽ തുറന്നു
ന്യൂഡൽഹി: പത്താം ക്ലാസ്സ് വിദ്യാർത്ഥികളുടെ മാർക്ക് സ്‌കൂളുകൾക്ക് നേരിട്ട് അപ്ലോഡ് ചെയ്യാൻ കഴിയുന്ന ഇ-പരീക്ഷ പോർട്ടൽ തുറന്ന് സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ. ജൂൺ അഞ്ചിനകം എല്ലാ സ്‌കൂളുകളും മാർക്ക് അപ്ലോഡ് ചെയ്യണം. ഒരിക്കൽ അപ്ലോഡ് ചെയ്ത ഫലം പിന്നീട് തിരുത്താൻ കഴിയില്ല.
മെയ്‌ ഒന്നാം തീയതി പ്രഖ്യാപിച്ച മാർഗനിർദേശ പ്രകാരം എല്ലാ സ്‌കൂളുകൾക്കും 10-ാം ക്ലാസ്സ് വിദ്യാർത്ഥികളുടെ മാർക്കുകൾ https://www.cbse.gov.in/newsite/reg2021.html എന്ന വിലാസം വഴിയാണ് പോർട്ടലിൽ അപ്ലോഡ് ചെയ്യേണ്ടത്.
ജൂൺ മൂന്നാവാരത്തോടെയാകും ഫലപ്രഖ്യാപനം. വിദ്യാർത്ഥികൾക്ക് ഇ-പരീക്ഷാ പോർട്ടലിൽ ലോഗിൻ ചെയ്ത് ഫലം പരിശോധിക്കാം. ഫലപ്രഖ്യാപനത്തിന് പിന്നാലെ ഒബ്ജക്ടീവ് രീതിയിലുള്ള കംപാർട്ട്‌മെന്റ് പരീക്ഷയും നടത്തുമെന്ന് സി.ബി.എസ്.ഇ അറിയിച്ചു.
കോവിഡ്-19 രോഗബാധ മൂലം പത്താക്ലാസ്സ് വിദ്യാർത്ഥികളുടെ പരീക്ഷ റദ്ദാക്കിയ സി.ബി.എസ്.ഇ, പ്രത്യേക മൂല്യനിർണയ സംവിധാനമുപയോഗിച്ച് ഫലം പ്രഖ്യാപിക്കുമെന്ന് നേരത്തെ വ്യക്തമാക്കിയിരുന്നു. ഇതിനായാണ് വിദ്യാർത്ഥികൾ വർഷം മുഴുവൻ എഴുതിയ പരീക്ഷയുടെ മാർക്കും ഇന്റേണൽ അസെസ്‌മെന്റുകളുടെ മാർക്കും അപ്ലോഡ് ചെയ്യാൻ സ്‌കൂളുകളോട് ആവശ്യപ്പെട്ടത്. ആകെ 100 മാർക്കിലാകും ഫലം.
