ചെറുപുഴയിൽ നിയന്ത്രണം വിട്ട ബസ് മൺതിട്ടയിലിടിച്ച് നിരവധി പേർക്ക് പരുക്ക്; വൻ ദുരന്തം ഒഴിവായത് ഡ്രൈവറുടെ മനസ്സാന്നിധ്യത്താൽ

ചെറുപുഴ: കണ്ണൂർ ജില്ലയിലെ മലയോര ഹൈവേയിലെ മഞ്ഞക്കാട് കല്ലങ്കോട് നിയന്ത്രണം വിട്ട ബസ് മൺതിട്ടയിലിടിച്ച് നിരവധി പേർക്ക് പരിക്ക്. ഇന്ന് രാവിലെ ഒൻപതേ കാലിനാണ് അപകടമുണ്ടായത്. ഇരിട്ടിയിൽ നിന്നും ചെറുപുഴ വഴി പാണത്തൂരേക്ക് പോകുന്ന മന്നാടിയേൽ ബസാണ് അപകടത്തിൽപ്പെട്ടത്.

കല്ലങ്കോട് ഇറക്കത്തിൽ വച്ചാണ് ബസിന്റെ നിയന്ത്രണം നഷ്ടപെട്ടത്. ബസ് ഡ്രൈവറുടെ മനസാന്നിധ്യം കൊണ്ടാണ് വൻ ദുരന്തം ഒഴിവായത്. പരിക്കേറ്റവരെ ചെറുപുഴയിലെ വിവിധ സ്വകാര്യ ആശുപത്രിയിൽ പ്രവേശിപ്പിച്ചു. ആരുടെയും പരുക്ക് ഗുരുതരമല്ലെന്നാണ് വിവരം. പൊലിസും നാട്ടുകാരും ഫയർഫോഴ്‌സും രക്ഷാപ്രവർത്തനം നടത്തി.