വിരാട് കോലിയും സംഘവും ഏറ്റവും മികച്ച ഇന്ത്യൻ ക്രിക്കറ്റ് ടീമെന്ന് വിൻഡീസ് ഇതിഹാസം ക്ലൈവ് ലോയ്ഡ്; ഇന്ത്യയ്ക്ക് യുവതാരങ്ങളെ സൃഷ്ടിക്കുന്ന യന്ത്രമുണ്ടോയെന്ന് വിസ്മയിച്ച് ഇൻസമാം; ഇന്ത്യൻ ടീമിന്റെ 'പരീക്ഷണം' കയ്യൈടി നേടുമ്പോൾ

ലണ്ടൻ: വിരാട് കോലിയുടെ നേതൃത്വത്തിലുള്ളത് ഇതുവരെയുള്ളതിൽ വെച്ച് ഏറ്റവും മികച്ച ഇന്ത്യൻ ടീമെന്ന് മുൻ വെസ്റ്റിൻഡീസ് നായകനും ഇതിഹാസ താരവുമായ ക്ലൈവ് ലോയ്ഡ്.

തീർത്തും വിഷമകരമായ സാഹചര്യങ്ങളിൽ നിന്ന് ഓസ്ട്രേലിയൻ മണ്ണിലെ ഇന്ത്യയുടെ തിരിച്ചുവരവ് ഇതുവരെയുള്ളതിൽ വെച്ച് ഏറ്റവും മികച്ച ഇന്ത്യൻ ടീമാണ് ഇപ്പോഴുള്ളതെന്നും ലോയ്ഡ് അഭിപ്രായപ്പെട്ടു. നിലവിലെ ടീം ഇന്ത്യയുടെ ഫിറ്റ്നസ് ലെവലിന്റെ കാര്യത്തിലും തനിക്ക് അതിയായ മതിപ്പുണ്ടെന്നും അദ്ദേഹം വ്യക്തമാക്കി.

''അവർ വളരെ മികച്ച ടീമാണ്. കാരണം ആ ടീമിൽ വൈവിധ്യമുണ്ട്. കളിക്കാർ മികച്ച കായികക്ഷമതയുള്ളവരും കൂടുതൽ പ്രൊഫഷണലുമാണ്. ഓസ്ട്രേലിയയിൽ പലപ്പോഴും പിന്നിൽ നിന്നാണ് അവർ തിരിച്ചുവന്നത്. അത് മറക്കരുത്. ആ പരമ്പരയിലെ അവരുടെ പ്രകടനത്തെ വിലയിരുത്തിയാൽ ഇത് എക്കാലത്തെയും മികച്ച ഇന്ത്യൻ ടീമാണെന്ന് നിങ്ങൾക്ക് പറയാൻ കഴിയും.'' - ടെലഗ്രാഫിന് അനുവദിച്ച പ്രത്യേക അഭിമുഖത്തിൽ ലോയ്ഡ് പറയുന്നു.

അതേ സമയം എല്ലാ ഫോർമാറ്റിലും ഏറ്റവും മികച്ച യുവതാരങ്ങളെ സൃഷ്ടിക്കുന്ന എന്തെങ്കിലും യന്ത്രം ഇന്ത്യയ്ക്കുണ്ടോ എന്ന ചോദ്യവുമായി പാക്കിസ്ഥാന്റെ മുൻ നായകൻ  ഉൾ ഹഖ് രംഗത്തെത്തി. അരങ്ങേറ്റത്തിന് ഇറങ്ങുന്ന യുവതാരങ്ങളെല്ലാം തകർപ്പൻ പ്രകടനവുമായി ടീം ഇന്ത്യയ്ക്ക് വിജയം സമ്മാനിക്കുന്നതിൽ നിർണായക പങ്കുവഹിക്കുന്ന സാഹചര്യത്തിലാണ് തന്റെ യുട്യൂബ് ചാനലിലൂടെ ഇൻസമാം ഇത്തരമൊരു ചോദ്യമുയർത്തിയത്.

ഇംഗ്ലണ്ടിനെതിരായ ഒന്നാം ഏകദിനത്തിൽ ക്രുണാൽ പാണ്ഡ്യ, പ്രസിദ്ധ് കൃഷ്ണ എന്നീ അരങ്ങേറ്റക്കാർ ഉജ്വല പ്രകടനത്തോടെ ഇന്ത്യയ്ക്ക് വിജയം സമ്മാനിച്ചതിനു പിന്നാലെയാണ് ഇൻസമാം യുട്യൂബ് ചാനലിലൂടെ പ്രതികരണം നടത്തിയത്.

കഴിഞ്ഞ ആറു മാസത്തിനിടെ ഒരു ഡസനോളം പുതിയ താരങ്ങളാണ് രാജ്യാന്തര വേദിയിൽ ഇന്ത്യയ്ക്കായി ശ്രദ്ധേയമായ രീതിയിൽ അരങ്ങേറ്റം കുറിച്ചത്. ശുഭ്മൻ ഗിൽ, അക്ഷർ പട്ടേൽ, സൂര്യകുമാർ യാദവ്, ക്രുണാൽ പാണ്ഡ്യ, ഇഷൻ കിഷൻ, വാഷിങ്ടൻ സുന്ദർ, നവ്ദീപ് സെയ്‌നി, പ്രസിദ്ധ് കൃഷ്ണ, ടി.നടരാജൻ തുടങ്ങിയവരെല്ലാം അവരുടെ ആദ്യ മത്സരങ്ങളിലോ ആദ്യ പരമ്പരയിലോ കരുത്തുറ്റ പ്രകടനം പുറത്തെടുത്തവരാണ്.

'ഏറ്റവും മികച്ച യുവതാരങ്ങളെ സൃഷ്ടിക്കാൻ ഇന്ത്യ എന്തോ ഒരു യന്ത്രം രൂപപ്പെടുത്തിയിട്ടുണ്ടോയെന്നാണ് എന്റെ സംശയം. ഇക്കഴിഞ്ഞ മത്സരത്തിലും അരങ്ങേറ്റം കുറിച്ച രണ്ടു പേരുണ്ടായിരുന്നു. അവരുടെ പ്രകടനം നോക്കൂ. ടീമിലെ സ്ഥാനം നിലനിർത്താൻ ഏറ്റവും മികച്ച പ്രകടനം പുറത്തെടുക്കണമെന്ന് സീനിയർ താരങ്ങൾക്കുള്ള മുന്നറിയിപ്പു കൂടിയാണ് ഇവരുടെ പ്രകടനം' ഇൻസമാം അഭിപ്രായപ്പെട്ടു.

ഇന്ത്യയുടെ ഓസ്‌ട്രേലിയൻ പര്യടനം മുതൽ ടീമിനായി യുവതാരങ്ങൾ നടത്തുന്ന മികച്ച പ്രകടനം താൻ ശ്രദ്ധിച്ചുകൊണ്ടിരിക്കുകയാണെന്ന് ഇൻസമാം വ്യക്തമാക്കി.

'ഇന്ത്യയുടെ ഓസ്‌ട്രേലിയൻ പര്യടനം മുതൽ ഇക്കാര്യം ഞാൻ ശ്രദ്ധിച്ചുകൊണ്ടിരിക്കുകയായിരുന്നു. ഓരോ മത്സരത്തിലും അല്ലെങ്കിൽ ഫോർമാറ്റിലും ഏതെങ്കിലുമൊക്കെ യുവതാരം വന്ന് മികച്ച പ്രകടനത്തിലൂടെ ടീമിന്റെ വിജയത്തിൽ നിർണായക പങ്കുവഹിക്കും. സീനിയർ താരങ്ങൾക്ക് തീർച്ചയായും അവരുടെ ഉത്തരവാദിത്തവും റോളുമുണ്ട്. പക്ഷേ, യുവതാരങ്ങൾ ഇത്ര ശക്തമായ പ്രകടനം നടത്തുമ്പോൾ ആ ടീമിന്റെ ശക്തി മറ്റൊരു തലത്തിലാണെന്ന് നമുക്കു ബോധ്യമാകും. കഴിഞ്ഞ ആറു മാസമായി ഇന്ത്യ രാജ്യാന്തര തലത്തിൽ ഇത്രമാത്രം ശോഭിക്കാൻ പ്രധാന കാരണം അവരുടെ യുവതാരങ്ങളാണ്' ഇൻസമാം പറഞ്ഞു.

ഇംഗ്ലണ്ടിനെതിരായ ട്വന്റി20 പരമ്പരയിൽ തകർപ്പൻ പ്രകടനവുമായി കയ്യടി നേടിയ സൂര്യകുമാർ യാദവ്, ഇഷൻ കിഷൻ എന്നിവർക്കു പിന്നാലെ, ആദ്യ ഏകദിനത്തിൽ പ്രസിദ്ധ് കൃഷ്ണ ക്രുണാൽ പാണ്ഡ്യ എന്നിവരും മാച്ച് വിന്നിങ് പ്രകടനവുമായി തിളങ്ങി. ഇംഗ്ലണ്ടിനെതിരായ ടെസ്റ്റ് ട്വന്റി 20 പരമ്പരകൾ സ്വന്തമാക്കിയ ഇന്ത്യ ഒന്നാം ഏകദിന മത്സരത്തിൽ 66 റൺസിന്റെ തകർപ്പൻ ജയത്തോടെ പരമ്പരയിൽ മുന്നിട്ടു നിൽക്കുകയാണ്.