തിയേറ്ററിന് ഉത്സവഛായ പകരാൻ ആറാട്ടെത്തുന്നു; ചിത്രത്തിന്റെ റീലീസ് തീയ്യതി പ്രഖ്യാപിച്ച് ബി ഉണ്ണികൃഷ്ണൻ; ഇനി മൂന്നുമാസത്തെ കാത്തിരിപ്പ്

തിരുവനന്തപുരം: സിനിമാ പ്രേക്ഷകർ ആവേശത്തോടെ കാത്തിരിക്കുന്ന മോഹൻലാൽ ചിത്രം 'ആറാട്ട്' ന്റെ റിലീസ് തീയ്യതി പ്രഖ്യാപിച്ചു.ഫെബ്രുവരി 10നാണ് ചിത്രം തിയറ്ററുകളിലെത്തുക. തിയറ്ററുകളിൽ പ്രേക്ഷകർക്ക് ആവേശത്തോടെ കാണാൻ കഴിയുന്ന എന്റർടെയ്‌നർ ചിത്രമായിരിക്കും ആറാട്ടെന്ന് സംവിധായകൻ ബി. ഉണ്ണികൃഷ്ണനും ഉറപ്പുതരുന്നു. മരക്കാർ എത്തിയില്ലെങ്കിൽ ബിഗ് ബ്രദറിനു ശേഷം തിയറ്ററുകളിൽ റിലീസ് ചെയ്യുന്ന മോഹൻലാൽ ചിത്രം കൂടിയാവും ആറാട്ട്.

നെയ്യാറ്റിൻകര ഗോപൻ എന്ന കഥാപാത്രമായാണ് 'ആറാട്ടി'ൽ മോഹൻലാൽ എത്തുന്നത്. കോമഡിക്കു പ്രാധാന്യം നൽകി ഒരുക്കുന്ന സിനിമയിൽ മികച്ച ആക്ഷൻ രംഗങ്ങളുമുണ്ട്. ഉണ്ണിക്കൃഷ്ണൻ സംവിധാനം ചെയ്യുന്ന ചിത്രത്തിന്റെ രചന നിർവഹിച്ചിരിക്കുന്നത് ഉദയകൃഷ്ണയാണ്. ചിത്രത്തിൽ മോഹൻലാൽ ഉപയോഗിക്കുന്ന കറുത്ത ബെൻസ് കാറും ശ്രദ്ധ നേടിയിട്ടുണ്ട്. ''മൈ ഫോൺ നമ്പർ ഈസ് 2255'' എന്ന 'രാജാവിന്റെ മകനി'ലെ ഡയലോഗ് ഓർമിപ്പിക്കും വിധം കാറിനും 2255 എന്ന നമ്പറാണു നൽകിയിരിക്കുന്നത്.

ശ്രദ്ധ ശ്രീനാഥാണു നായിക. നെടുമുടി വേണു, സായ്കുമാർ, സിദ്ദിഖ്, വിജയരാഘവൻ, ജോണി ആന്റണി, ഇന്ദ്രൻസ്, രാഘവൻ, നന്ദു, ബിജു പപ്പൻ, ഷീല, സ്വാസിക, മാളവിക, രചന നാരായണൻകുട്ടി തുടങ്ങിയവരാണ് മറ്റു താരങ്ങൾ. ക്യാമറ: വിജയ് ഉലകനാഥ്, എഡിറ്റർ: സമീർ മുഹമ്മദ്. സംഗീതം: രാഹുൽ രാജ്. കലാസംവിധാനം: ജോസഫ് നെല്ലിക്കൽ. വസ്ത്രാലങ്കാരം: സ്റ്റെഫി സേവ്യർ.