ഒമാനിൽ അഞ്ച് കോവിഡ് മരണങ്ങൾ കൂടി; രാജ്യത്ത് ഇതുവരെ മരിച്ചത് 1,488 വൈറസ് ബാധിതർ

മസ്‍കറ്റ്: ഒമാനിൽ അഞ്ച് പേർ കൂടി കോവിഡ് ബാധിച്ച് മരിച്ചു. 648 പേർക്ക് കൂടി പുതിയതായി രോഗം സ്ഥിരീകരിച്ചതായി ആരോഗ്യ മന്ത്രാലയം അറിയിച്ചു. വാരാന്ത്യ ദിനങ്ങളായ വെള്ളി, ശനി ദിവസങ്ങളിലെ കൂടി കണക്കുകൾ ഒരുമിച്ചാണ് ഇന്ന് ആരോഗ്യ മന്ത്രാലയം പറുത്തുവിട്ടത്. രാജ്യത്ത് ഇതുവരെ കോവിഡ് സ്ഥിരീകരിക്കപ്പെട്ടവരുടെ എണ്ണം 127,667 ആയി. ആകെ 1488 പേരാണ് കോവിഡ് ബാധിച്ച് മരണപ്പെട്ടത്.

കഴിഞ്ഞ 72 മണിക്കൂറിനുള്ളിൽ 565 പേർക്ക് കൂടി രോഗം ഭേദമായിട്ടുണ്ട്. ഇതുവരെ 1,19,574 പേർ രോഗമുക്തരായിട്ടുണ്ട്. രാജ്യത്തെ രോഗമുക്തി നിരക്ക് ഇപ്പോൾ 93.7 ശതമാനമാണ്. കഴിഞ്ഞ 24 മണിക്കൂറിനിടെ 15 പേരെയാണ് ആശുപത്രികളിൽ പ്രവേശിപ്പിച്ചത്. ഇപ്പോൾ 102 പേർ ആശുപത്രികളിൽ ചികിത്സയിലുണ്ട്. ഇവരിൽ 42 പേർ ഗുരുതരാവസ്ഥയിലാണ്.