കൊച്ചി: ടൊവീനോ തോമസിനെ നായകനാക്കി രോഹിത് വി എസ്. ഒരുക്കുന്ന 'കള' സിനിമയ്ക്ക് എ സർട്ടിഫിക്കറ്റ്. വയലൻസ് രംഗങ്ങൾ ഉൾപ്പട്ടതുകൊണ്ടാണ് ചിത്രത്തിന് എ സർട്ടിഫിക്കറ്റ് നൽകിയതെന്ന് സിനിമയോട് അടുത്തവൃത്തങ്ങൾ പറയുന്നു. മാർച്ച് 25നാണ് ചിത്രം റിലീസ് ചെയ്യുന്നത്.

'കള കഠിനമാണ്, അതികഠിനം. എന്നാൽ സിനിമയോടുള്ള അടങ്ങാത്ത സ്‌നേഹമാണ് ഈ ചിത്രം സാധ്യമാക്കിയത്. ഈ ടീമിന്റെ ആ ഇഷ്ടം കളയെയും മറ്റൊരു തലത്തിലെത്തിക്കുമെന്ന എനിക്ക് ഉറപ്പുണ്ട്.'കള എന്ന സിനിമയെക്കുറിച്ച് ടൊവീനോ പറയുന്നതിങ്ങനെ. രോഹിതിനൊപ്പം യദു പുഷ്പാകരനും കളയുടെ രചയിതാവാണ്. അഖിൽ ജോർജ് ആണ് ക്യമറ. ലാൽ, ദിവ്യാ പിള്ള, സുമേഷ് എന്നിവർക്കൊപ്പം ബാസിഗർ എന്ന പേരുള്ള നായയും ചിത്രത്തിൽ പ്രധാന കഥാപാത്രമാണ്. മനുഷ്യനും പ്രകൃതിയുമാണ് സിനിമയുടെ തീം. ജുവിസ് പ്രൊഡക്ഷൻസാണ് നിർമ്മാണം.

അഡ്വഞ്ചേഴ്സ് ഓഫ് ഓമനക്കുട്ടൻ, ഇബിലീസ് എന്നീ ചിത്രങ്ങൾക്കു ശേഷം രോഹിത് സംവിധാനം ചെയ്യുന്ന 'കള' ടൊവിനോയുടെ കരിയറിലെ നിർണായക സിനിമകളിലൊന്നായിട്ടാണ് വിലയിരുത്തപ്പെടുന്നത്. ഈ സിനിമയുടെ ആക്ഷൻ രംഗങ്ങൾ ചിത്രീകരണത്തിനിടെ ടൊവിനോ തോമസിന് പരുക്കേറ്റിരുന്നു. പിന്നീട് ആഴ്ചകൾ നീണ്ട വിശ്രമത്തിനു ശേഷമാണ് ഷൂട്ടിങ് പൂർത്തീകരിച്ചത്.

 

എ സർട്ടിഫിക്കറ്റ്കളടൊവിനോ തോമസ്മലയാളം സിനിമരോഹിത് വി എസ്