ക്രിക്കറ്റ് താരം കെഎൽ രാഹുലിന്റെ വിവാഹം നാളെ; വധു സുനിൽ ഷെട്ടിയുടെ മകൾ; ക്ഷണം തിരഞ്ഞെടുത്ത നൂറ് പേർക്ക് മാത്രം; വിവാഹശേഷം സുഹൃത്തുക്കൾക്കായി ഗംഭീര പാർട്ടിയും

മുംബൈ: ഇന്ത്യൻ ക്രിക്കറ്റ് താരം കെ എൽ രാഹുൽ വിവാഹിതനാകുകയാണ്. ആരാധകർ കാത്തിരുന്ന വിവാഹം നാളെയാണ് തീരുമാനിച്ചിരിക്കുന്നത്. ബോളിവുഡ് താരം സുനിൽ ഷെട്ടിയുടെ മകൾ അതിയ ഷെട്ടിയാണ് വധു. ഏറെ നാളായി ഇരുവരും പ്രണയത്തിലായിരുന്നു. താര വിവാഹത്തെ കുറിച്ച് ഏറെ നാളായി വാർത്തകൾ പ്രചരിക്കുന്നുണ്ടെങ്കിലും ഇരു കുടുംബങ്ങളും മൗനം പാലിക്കുകയായിരുന്നു.

സുനിൽ ഷെട്ടിയുടെ ഖണ്ടാല ഫാംഹൗസിൽ വച്ചാണ് വിവാഹം എന്നാണ് റിപ്പോർട്ടുകൾ. ഫാം ഹൗസിലെ വിവാഹവേദിയുടെ ഫോട്ടോകൾ കഴിഞ്ഞ ദിവസം പുറത്തു വന്നിരുന്നു. നാളെയാണ് വിവാഹമെങ്കിലും ജനുവരി 21 ന് വിവാഹ ആഘോഷങ്ങൾ തുടങ്ങിയെന്നാണ് വിവിധ മാധ്യമങ്ങളിൽ വരുന്ന റിപ്പോർട്ടുകൾ. കെഎൽ രാഹുലിന്റേയും അതിയ ഷെട്ടിയുടേയും അടുത്ത ബന്ധുക്കളും സുഹൃത്തുക്കളും മാത്രം പങ്കെടുക്കുന്ന തീർത്തും സ്വാകര്യമായ ചടങ്ങിലാണ് വിവാഹം.

നൂറ് പേർക്ക് മാത്രമാണ് വിവാഹത്തിലേക്ക് ക്ഷണം. വിവാഹത്തിന്റെ ദൃശ്യങ്ങൾ മൊബൈലിൽ പകർത്തരുതെന്നാണ് താരങ്ങൾ അതിഥികളോട് അഭ്യർത്ഥിച്ചിരിക്കുന്നത്. വിവാഹശേഷം രാഹുലിന്റേയും അതിയയുടേയും സോഷ്യൽമീഡിയ അക്കൗണ്ടിലൂടെ ചിത്രങ്ങൾ പുറത്തുവിടുമെന്നാണ് സൂചന.

വിവാഹശേഷം സുഹൃത്തുക്കൾക്കായി ഗംഭീര പാർട്ടിയും നടക്കും. ക്രിക്കറ്റിലേയും ബോളിവുഡിലേയും നിരവധി സെലിബ്രിറ്റികൾ പങ്കെടുക്കുന്ന ഗംഭീര ചടങ്ങായിരിക്കും നടക്കുക.