സ്വകാര്യതയിലെ മൗലികാവകാശം ലംഘിക്കാൻ കേരളാ പൊലീസിനും കഴിഞ്ഞേക്കും; ചീഫ് സെക്രട്ടറി തല സമിതിയെ മറികടക്കാൻ സനൂപ്പിംങ് ബിൽ; കരടിലുള്ളത് ആരുടേയും അനുമതിയില്ലാതെ 48 മണിക്കൂർ ചോർത്തലിനുള്ള സാധ്യത; പെഗസ്സസിനെ എതിത്തവർ അറിയാൻ പിണറായി സർക്കാർ തയ്യാറാക്കുന്ന ബില്ലിന്റെ കഥ
തിരുവനന്തപുരം: പെഗസ്സസിൽ കേന്ദ്ര സർക്കാരിനെ പ്രതിക്കൂട്ടിൽ നിർത്തിയത് ഇടതുപക്ഷമാണ്. പിന്നീട് കോൺഗ്രസ് ഇത് ഏറ്റെടുത്തു. ഫോൺ ചോർത്തലായിരുന്നു പ്രശ്‌നം. ക്രിമിനലുകളെ അമർച്ച ചെയ്യാനല്ലാതെ ഫോൺ ചോർത്തിയില്ലെന്ന് കേന്ദ്രം ആവർത്തിച്ചെങ്കിലും ഇടതുപക്ഷം ഇപ്പോഴും പോർമുഖത്തിൽ. ഇതിനിടെ പെഗസ്സസിൽ ചർച്ച ചെയ്ത സ്വകാര്യതയെ അവഗണിക്കാനുള്ള നീക്കം കേരളാ പൊലീസിലും നടക്കുന്നു. ആരുടേയും ഫോൺ ചോർത്താനുള്ള നിയമപരമായ അനുമതി പൊലീസിന് നൽകാനുള്ളതാണ് ഈ നീക്കമെന്ന നിരീക്ഷണങ്ങൾ ശക്തമാണ്.
ഫോൺ ചോർത്തലിന് ഇപ്പോൾ നിരവധി മാനദണ്ഡങ്ങളുണ്ട്. ചീഫ് സെക്രട്ടറിയുടെ അനുമതിയോടെ മാത്രമേ കുറ്റകൃത്യം തെളിയിക്കാൻ പോലും ഫോൺ ചോർത്താവൂ എന്നതാണ് നിയമം. ഇതു കാരണം അന്യായമായ ഫോൺ ചോർത്തൽ പൊലീസിന് സാധ്യമല്ല. ഇതിന് മാറ്റമുണ്ടാക്കാനാണ് പുതിയ നിയമം. ആരുടേയും അനുമതിയില്ലാതെ കുറ്റകൃത്യങ്ങൾ തടയാൻ പൊലീസിന് ഫോൺ ചോർത്താൻ അനുമതി നൽകുന്ന നിയമം പണിപ്പുരയിലാണെന്ന് ദി ഹിന്ദു റിപ്പോർട്ട് ചെയ്യുന്നു.
പൊലീസിന് അമിതാധികാരം കൊടുക്കുന്ന മുഖ്യമന്ത്രിമാരുടെ ലിസ്റ്റിൽ കരുണാകരന്റെ മുകളിലാണോ താഴെയാണോ പിണറായി വരേണ്ടത് എന്നാണ് കോമ്പറ്റീഷൻ എന്നു തോന്നുന്നു. കഴിഞ്ഞ രണ്ടുവർഷത്തിൽ കേരളത്തിൽ പൊലീസിന്റെ അധികാര പരിധിക്ക് സംഭവിച്ച വികാസം ഭയാനകമാണ് അതിനു പുറമേ ആണിപ്പോൾ പുതിയ സ്‌നൂപ്പിങ് ബില്ലും . സ്വകാര്യത എന്ന മൗലികാവകാശം ലംഘിച്ച് വ്യക്തികളുടെ പേഴ്‌സണൽ ഡിവൈസിലോട്ടും കമ്മ്യൂണിക്കേഷനിലോട്ടും കടന്നു കയറാൻ ഒരുപാടായി കേരളപൊലീസ് ശ്രമിക്കുന്നു . ഒരുപാട് ഇത്തരം ശ്രമങ്ങൾ ആപ്പുകളായും മറ്റും നമ്മൾ കണ്ടതാണ് . അതിന്റെ തുടർച്ചയാണ് ഈ ശ്രമം.-ഇതാണ് സോഷ്യൽ മീഡിയയിൽ ഹിന്ദു വാർത്തയോട് ഉയരുന്ന വികാരം
കൺട്രോൾ ഓഫ് ഓർഗനൈസ്ഡ് ക്രൈം ആക്ട് എന്ന പേരിൽ ബിൽ തയ്യാറെടുക്കുന്നുവെന്നാണ് റിപ്പോർട്ട്. സംഘടിത കുറ്റകൃത്യങ്ങൾ കണ്ടെത്തി ഇല്ലാതാക്കാൻ ഫോൺ ചോർത്തലിന് പൊലീസിന് ഇതിലൂടെ കഴിയും. ചീഫ് സെക്രട്ടറിയുടെ പരിശോധനയിലാണ് ഈ ബിൽ. എഡിജിപി റാങ്കിൽ കുറയാത്ത ഉദ്യോഗസ്ഥന്റെ അനുമതിയോടെ ഫോൺ ചോർത്തലിന് പൊലീസിന് അനുമതി നൽകുന്ന തരത്തിലാണ് ചർച്ചകൾ. ഫോണും സോഷ്യൽ മീഡിയാ ആപ്പുകളിലുമെല്ലാം ഇടപെടൽ സാധ്യമാക്കുന്ന തരത്തിലാണ് ബിൽ തയ്യാറാകുന്നത്.
അന്വേഷണ ഉദ്യോഗസ്ഥൻ ആവശ്യം പരിഗണിച്ച് മതിയായ സാഹചര്യമുണ്ടെങ്കിൽ ചോർത്തലിന്ി എഡിജിപിക്ക് തന്നെ അനുമതി നൽകാം. സംസ്ഥാനത്തിന്റെ താൽപ്പര്യത്തിന്ി വിരുദ്ധമായ സംഘടിത കുറ്റകൃത്യങ്ങളുമായി ബന്ധപ്പെട്ട ഗൂഢാലോചനയിലാണ് ഈ സാഹചര്യം കടന്നു വരിക. വ്യക്തികളുടെ ആയുസിനും ജീവനും ഭീഷണിയുണ്ടാകുമെന്ന് തോന്നു തരത്തിലുള്ള പ്രവർത്തനങ്ങളെ നിയന്ത്രിക്കലാണ് ഇതിലൂടെ ലക്ഷ്യമിടുന്നതെന്ന് കരടു നിയമം വിശദീകരിക്കുന്നു.
പെഗസ്സസ് കേസിലെ ചോർത്തൽ വിവാദം സുപ്രീംകോടതിയുടെ പരിഗണനയിലാണ്. ഇതിന് സമാനമായ സാഹചര്യം കേരളത്തിലെ പുതിയ ബിൽ നീക്കവും ഉണ്ടാക്കുമെന്നാണ് വിലയിരുത്തൽ. പൊലീസിന് അമിത അധികാരം നൽകിയാൽ അവരുടെ താൽപ്പര്യം അനുസരിച്ച് ആരുടേയും സ്വകാര്യതയിലേക്ക് കടന്നു കയറുന്ന സ്ഥിതി വിശേഷമുണ്ടാകും. അതുകൊണ്ടു തന്നെ പലരുടേയും സ്വകാര്യതയെ ഈ ബിൽ ഹനിക്കുമെന്നാണ് വിലയിരുത്തൽ. അന്വേഷണ ഉദ്യോഗസ്ഥന് അനുമതിയില്ലാതെ തന്നെ ചോർത്തൽ തുടങ്ങാമെന്ന വ്യവസ്ഥയും ബില്ലിൽ ഉണ്ടെന്ന സൂചനകളും പുറത്തു വരുന്നുണ്ട്.
ഫോൺ നിരീക്ഷണം തുടങ്ങി 48മണിക്കൂറിനുള്ളിൽ എഡിജിപിയുടെ അനുമതി വാങ്ങിയാൽ മതി. ഇങ്ങനെ എഡിജിപി ഈ വിഷയം പരിശോധിക്കുമ്പോൾ ചോർത്തലിൽ കാര്യമില്ലെങ്കിൽ ഉടൻ അവസാനിപ്പിക്കണമെന്നതാണ് വ്യവസ്ഥ. അതായത് 48 മണിക്കൂറിൽ ആരുടേയും അനുമതിയില്ലാതെ നിരീക്ഷണമാകാം. ഇങ്ങനെ അനുമതിയോടെ എടുക്കുന്ന വിവരങ്ങൾ കേസ് അന്വേഷണത്തിൽ നിയമപരമായി ഭാഗഭാക്കാക്കാം. നിലവിൽ പല ചോർത്തലും രഹസ്യമായി നടത്തുന്നതു കൊണ്ട് തന്നെ അതിന് തെളിവ് മൂലം കിട്ടാറില്ല.
ചോർത്തുന്ന ഓഡിയോയും മറ്റും സൂക്ഷിക്കുകയും ചെയ്യാം. എന്നാൽ ഇത് എഡിറ്റിംഗിന് വിധേയമാക്കുന്നില്ലെന്ന് പൊലീസ് ഉദ്യോഗസ്ഥർ ഉറപ്പാക്കണമെന്ന് മാത്രം. സാധാരണ സാഹചര്യത്തിൽ കേസ് അന്േഷണത്തിന്റെ മേൽനോട്ടം വഹിക്കുന്ന ജില്ലാ പൊലീസ് മേധാവി ചോർത്തലിന് അപീക്ഷ ചീഫ് സെക്രട്ടറിയുടെ സമിതിക്ക് നൽകണം. അവർ പരിശോധിച്ച് അനുമതി നൽകുന്നത് മാത്രമേ നിലവിൽ ചോർത്തലിന് വിധേയമാക്കാനാവൂ. ഇതിന് മാറ്റം വരുത്തുന്ന നിയമ നിർമ്മാണമാണ് സംസ്ഥാന സർക്കാരിന്റെ പരിഗണനയിലുള്ളത്.
