വാക്കിലും നോട്ടത്തിലും സ്ത്രീവിരുദ്ധത നിറഞ്ഞ കഥാപാത്രം; സമൂഹമാധ്യമങ്ങളിൽ വാസു അണ്ണൻ മാസ്സ് ഡാ, വാസു അണ്ണൻ ഹീറോ ഡാ എന്ന പേരിലുള്ള വൃത്തികേടുകൾ ആഘോഷിക്കപ്പെടുകയാണ്; എന്ത് പോക്രിത്തരമാണ് ഈ കാണിക്കുന്നത്; ട്രോളുണ്ടാക്കിയവന്മാർ റേപ്പിസ്റ്റുകൾ; വാസു അണ്ണൻ ട്രോളിൽ പ്രതികരിച്ച് നടി രേവതി

ദിവസങ്ങളായി സോഷ്യൽ മീഡിയ ഏറ്റെടുക്കുന്നത് വാസു അണ്ണൻ ട്രോളുകളാണ്. കുഞ്ഞിക്കൂനൻ സിനിമയിലെ സായികുമാർ കഥാപാത്രമായിരുന്നു വാസു അണ്ണൻ. കണ്ണ് ചുവന്ന് ഭീകരലുക്കുള്ള ഗുണ്ടയായിട്ടാണ് വാസു അണ്ണൻ കഥാപാത്രം സിനിമയിൽ നിറഞ്ഞ് നിന്നത്.സായിക്കുമാർ അവതരിപ്പിച്ച ഗരുഡൻ വാസു എന്ന കഥാപാത്രത്തെ റൊമാന്റിക്കായി അവതരിപ്പിക്കുകയാണ് ട്രോളന്മാർ. ചിത്രത്തിൽ മന്യ അഭിനയിച്ച പ്രിയ ലക്ഷ്മി എന്ന കഥാപാത്രത്തെ വിവാഹം കഴിച്ച് ജീവിക്കുന്ന വാസുവിനെയാണ് ഇതിൽ കാണുന്നത്. എന്നാൽ അതിനിടെ വാസു അണ്ണൻ ട്രോളുകൾക്കെതിരെ വിമർശനവുമായി ഒരു വിഭാ?ഗം രം?ഗത്തെത്തുന്നുണ്ട്. നടിയും സാമൂഹിക പ്രവർത്തകയുമായ രേവതി സമ്പത്തിന്റെ കുറിപ്പാണ് ശ്രദ്ധ നേടുന്നത്.

വാക്കിലും നോട്ടത്തിലും സ്ത്രീവിരുദ്ധത നിറഞ്ഞ കഥാപാത്രത്തെ ആഘോഷിക്കുന്നത് പോക്രിത്തരം ആണെന്നാണ് രേവതി തന്റെ കുറിപ്പിൽ പറയുന്നത്. 'റേപ്പ് കൾച്ചർ ആഘോഷമാക്കുന്ന സാമൂഹിക പശ്ചാത്തലത്തിൽ നിന്നു വരുന്ന ഈ ഗ്ലോറിഫൈഡ് റേപ്പ് ജോക്കുകളുടെ അപകടം എന്ത് മാത്രം ഹീനവും നികൃഷ്ടവുമാണ്. പീഡിപ്പിക്കാൻ വന്ന ആളിൽ പ്രണയം കുത്തിനിറക്കുക, കല്യാണത്തിലും , കുട്ടികളിലും വരെ എത്തിച്ചു ട്രോൾ ഉണ്ടാക്കിയ ആ വിഭാഗം ആണ് നിസ്സംശയം റേപ്പിസ്റ്റുകൾ'- രേവതി കുറിച്ചു.

രേവതിയുടെ കുറിപ്പിന്റെ പൂർണരൂപം:-

'വാസു അണ്ണന്റെ ഫാമിലി' എന്ന അശ്ലീലം ആണിപ്പോൾ എവിടെയും

കുഞ്ഞിക്കൂനൻ എന്ന സിനിമയിലെ വാസു എന്ന കഥാപാത്രം ലക്ഷ്മി എന്ന കഥാപാത്രത്തിനോട് ചെയ്യുന്നത് പീഡനമാണ്. ലക്ഷ്മി എന്ന സ്ത്രീയെ കൊലപ്പെടുത്തുന്നവനാണ് 'ഗരുഡൻ വാസു'. വാക്കിലും നോട്ടത്തിലും സ്ത്രീവിരുദ്ധത നിറഞ്ഞ കഥാപാത്രം. സമൂഹമാധ്യമങ്ങളിൽ വാസു അണ്ണൻ മാസ്സ് ഡാ, വാസു അണ്ണൻ ഹീറോ ഡാ എന്ന പേരിലുള്ള വൃത്തികേടുകൾ ആഘോഷിക്കപ്പെടുകയാണ്.

എന്തൊരു പോക്രിത്തരം ആണിത്

റേപ്പ് കൾച്ചർ ആഘോഷമാക്കുന്ന സാമൂഹിക പശ്ചാത്തലത്തിൽ നിന്നു വരുന്ന ഈ ഗ്ലോറിഫൈഡ് റേപ്പ് ജോക്കുകളുടെ അപകടം എന്ത് മാത്രം ഹീനവും നികൃഷ്ടവുമാണ്. പീഡിപ്പിക്കാൻ വന്ന ആളിൽ പ്രണയം കുത്തിനിറക്കുക, കല്യാണത്തിലും , കുട്ടികളിലും വരെ എത്തിച്ചു ട്രോൾ ഉണ്ടാക്കിയ ആ വിഭാഗം ആണ് നിസ്സംശയം റേപ്പിസ്റ്റുകൾ. പെട്ടെന്നൊരു ദിവസം ആകാശത്തുനിന്ന് താഴേക്ക് വീണതല്ല ഈ പോക്രിത്തരങ്ങൾ.

മുകളിൽ പറഞ്ഞ വിഭാഗത്തിന്റെ തലയിലും മനസിലുമുള്ള വിഷമാണിതൊക്കെയും. സിനിമയെ സിനിമയായി കാണണമെന്നും, ട്രോളുകളെ ട്രോളുകൾ ആയി കണ്ടങ്ങ് ചിരിച്ചു വിടണമെന്ന നിസാരവത്കരണം എന്തിനും ഏതിനും സ്ഥിരം ആക്കി കൈയടിച്ച് പാസാക്കി വിടുന്ന കുറേ അലവലാതികളും കൂടെ.

എന്തുകൊണ്ടാണ് പീഡനങ്ങൾ ഇവിടെ നോർമലൈസ് ചെയ്യപ്പെടുന്നത്, റേപ്പ് സർവൈവേഴ്സിനു മുകളിൽ കുറ്റങ്ങൾ ചാർത്തപ്പെടുന്നത്, സ്ത്രീ ക്രൂശിക്കപ്പെടുന്നത് എന്നതിന് ഇതിൽപരം സംശയമില്ല. എത്രയധികം കണക്കിൽ വരുന്ന ആളുകളാണ് ഇതിനെ 'തഗ് ലൈഫ് 'ആക്കി ആഘോഷമാക്കിയത് എന്നത് ചൂണ്ടികാണിക്കുന്നത് ഈ സമൂഹം പീഡനങ്ങളെ തിരിച്ചറിയാൻ പോലുമാകാത്ത തരത്തിൽ എത്രമേൽ ജീർണിച്ചുപോയി എന്നതാണ്.

ഇതിനെ ഗ്ലോറിഫൈ ചെയ്യുന്നവർ റേപ്പിസ്റ്റുകളെ പോലെ തന്നെ കുറ്റവാളികളാണ്. അവർ റേപ്പിസ്റ്റുകൾ തന്നെയാണ്...അലവലാതികളെ അലവലാതികൾ എന്ന് അഭിസംബോധന ചെയ്യാനേ സൗകര്യമുള്ളൂ