ഇനി പക്ഷങ്ങളില്ല; ബിജെപി സംസ്ഥാന സമിതിയിൽ നിന്ന് രാജിവെച്ച് അലി അക്‌ബർ; സംഘപ്പട്ടം കിട്ടിയ മുസ്ലീങ്ങൾ നേരിടുന്ന പ്രതിസന്ധികൾ പാർട്ടി നേതൃത്വമെങ്കിലും തിരിച്ചറിയണമെന്നും കുറ്റപ്പെടുത്തൽ; പുറത്തു പോകുന്നത് മലബാർ കലാപത്തെ പരിവാർ ആംഗിളിൽ കണ്ട സംവിധായകൻ
കോഴിക്കോട്: ബിജെപി സംസ്ഥാന സമിതിയിൽ നിന്ന് അലി അക്‌ബർ രാജിവച്ചു. തന്റെ ഫേസ്‌ബുക്ക് പേജിൽ പങ്കുവെച്ച കുറിപ്പിലുടെയാണ് രാജിക്കാര്യം അലി അക്‌ബർ അറിയിച്ചത്. സംസ്ഥാന ബിജെപി നേതൃത്വത്തിൽ ആഭ്യന്തരപ്രശ്നങ്ങൾ രൂക്ഷമാകുന്നതിനിടെയാണ് രാജി എന്നതും ശ്രദ്ധേയമാണ്.
ഒരു മുസൽമാൻ ഭാരതീയ ജനതാപാർട്ടിയിൽ നിലകൊള്ളുമ്പോൾ അനുഭവിക്കേണ്ടി വരുന്ന തെറിവിളികൾ, സ്വകുടുംബത്തിൽ നിന്നും സമുദായത്തിൽ നിന്നും നേരിടേണ്ടി വരുന്ന അവഹേളനം ഇതൊക്കെ സമാന്യ ജനങ്ങൾക്ക് മനസ്സിലായി എന്ന് വരില്ല. എന്നാൽ ഇത് രാഷ്ട്രീയ നേതൃത്വം മനസിലാക്കണമെന്നും അലി അക്‌ബർ പറയുന്നു.ചില ആനുകാലിക സംഭവങ്ങൾ തന്റെ ഹൃദയത്തെ വേട്ടയാടി അത് ഒന്ന് തീർക്കുന്നു.എല്ലാ ഉത്തരവാദിത്വങ്ങളുമൊഴിഞ്ഞു.പക്ഷങ്ങളില്ലാതെ മുൻപോട്ടു പോവാൻ തീരുമാനിച്ചതായും അലി അക്‌ബർ കുറിച്ചു
വാരിയം കുന്നൻ വിവാദത്തിൽ പരിവാറുകാരുടെ മറുപടി എന്ന കണക്കിന് മറ്റൊരു ചിത്രം സംവിധാനം ചെയ്യുകയാണ് അലി അക്‌ബർ.സിനിമ പൂർത്തിയാക്കാൻ ഇനിയും തുക ആവിശ്യമുണ്ടെന്നും സഹായം വേണമെന്നും കാണിച്ച് കഴിഞ്ഞ ദിവസമാണ് അലി അക്‌ബർ കുറിപ്പ് പങ്കുവെച്ചത്.ഇതിനു തൊട്ട് പിന്നാലെയാണ് ഇപ്പോൾ രാജിവെക്കുന്നതെന്നും ശ്രദ്ധേയമാണ്.ഇതിനോടകം ബിജെപിയുടെ പൊതുവേദിയിലെ നിറസാന്നിദ്ധ്യമായ അലി അക്‌ബർ ന്യൂനപക്ഷ വാദങ്ങൾക്കുള്ള ബിജെപിയുടെ മറുപടി കൂടിയായിരുന്നു.ഇത് കൂടിയാവും രാജിയിലുടെ ബിജെപി നഷ്ടമാകുക
കുറിപ്പിന്റെ പൂർണരൂപം
ഒരു മുസൽമാൻ ഭാരതീയ ജനതാപാർട്ടിയിൽ നിലകൊള്ളുമ്പോൾ അനുഭവിക്കേണ്ടി വരുന്ന തെറിവിളികൾ, സ്വകുടുംബത്തിൽ നിന്നും സമുദായത്തിൽ നിന്നും നേരിടേണ്ടി വരുന്ന അവഹേളനം ഇതൊക്കെ സമാന്യ ജനങ്ങൾക്ക് മനസ്സിലായി എന്ന് വരില്ല, പക്ഷെ രാഷ്ട്രീയ നേതൃത്വത്തിനു മനസ്സിലാവണം, അധികാരവും ആളനക്കവുമുള്ളപ്പോൾ ഉള്ളപ്പോൾ ഓടിക്കൂടിയ എന്നെപ്പോലുള്ളവരെക്കുറിച്ചല്ല ഞാൻ പറയുന്നത്, വർഷങ്ങൾക്കു മുൻപേ സംഘിപ്പട്ടം കിട്ടിയ മുസ്ലീങ്ങളെക്കുറിച്ചാണ്, അവരൊക്കെ കഴിഞ്ഞ പൗരത്വ വിഷയ സമയത്തൊക്കെ കേരളത്തിൽ ഓടി നടന്നു പ്രവർത്തിക്കുന്നതും കണ്ടു, ഒരുപാട് പേരെ എനിക്കറിയാം..
മുൻപ് പറഞ്ഞ സാമൂഹിക വേട്ടയാടലിനെ കൂസാക്കാതെ ധർമ്മത്തെ അറിഞ്ഞു പുൽകിയവർ... രാഷ്ട്രം എന്ന വികാരത്തോടെ ചലിച്ചവർ... അത്തരത്തിൽ ചിലരെ വേട്ടയാടുന്നത് കണ്ടു... വേദനയുണ്ട്. ഒരുവനു നൊന്താൽ അത് പറയണം, പ്രതിഫലിപ്പിക്കണം അത് സമാന്യ യുക്തിയാണ്, പൂട്ടിട്ട് പൂട്ടിവയ്ക്കാൻ യന്ത്രമല്ല... അതിനെ അത്തരത്തിൽ കാണാതെ അംശവടികൊണ്ട് തടവലല്ല പരിഹാരം, കാണുന്ന കാഴ്ചയും, കേൾക്കുന്ന കേഴ്‌വിയും ഒരു മനുഷ്യനിൽ ചലനം സൃഷ്ടിക്കും അതുകൊണ്ടാണല്ലോ ആർജ്ജുനൻ അധർമ്മികളായ ബന്ധു ജനങ്ങൾക്കിടയിൽ വില്ലുപേക്ഷിക്കാൻ തയ്യാറായപ്പോൾ ഭാഗവാന് ഉപദേശം നൽകേണ്ടിവന്നത്..
കൃഷ്ണൻ അർജ്ജുനനെ മാറ്റിനിറുത്തി മറ്റൊരാളെ യുദ്ധത്തിന് പ്രേരിപ്പിക്കയല്ല ചെയ്തത്..
മഹാഭാരത കഥ ഓർമ്മിപ്പിച്ചു എന്നേയുള്ളു...കൃഷ്ണ പക്ഷം നിന്നു വേണം പ്രതിസന്ധികളെ നേരിടാൻ,ഒച്ചയില്ലാത്തവന്റെ ആയുധമാണ് അക്ഷരങ്ങൾ.. അത് കുറിക്കാൻ വിരൽ ആവശ്യപ്പെടും.. ആര് പൊട്ടിച്ചെറിഞ്ഞാലും ധർമ്മവാദികളെ ഒന്നും ബാധിക്കയില്ല അത് ധർമ്മത്തോടൊപ്പം ഒറ്റയ്ക്കാണെങ്കിലും സഞ്ചരിക്കും,
ചില ആനുകാലിക സംഭവങ്ങൾ ഹൃദയത്തെ വേട്ടയാടി അത് ഒന്ന് തീർക്കുന്നു.
എല്ലാ ഉത്തരവാദിത്വങ്ങളുമൊഴിഞ്ഞു, പക്ഷങ്ങളില്ലാതെ മുൻപോട്ടു പോവാൻ തീരുമാനിച്ചു...എന്ത് കർത്തവ്യമാണോ ഭഗവാൻ എന്നിലർപ്പിച്ചത് അത് യജ്ഞ ഭാവത്തോടെ ചെയ്യാൻ ഭഗവാൻ സഹായിക്കട്ടെ.
