മോഡലിന്റെ നഗ്നശരീരത്തിൽ മകന്റെ പെയിന്റിങ്; അഭിമാനമുഹൂർത്തമെന്ന് മഡോണ; മിലാനിലെ എക്‌സിബിഷൻ വീഡിയോ വൈറൽ
റോം: മകൻ റോക്കോ റിച്ചിയുടെ പെയിന്റിങ് വിഡിയോ പങ്കുവച്ച് പോപ് താരം മഡോണ. ഇറ്റലിയിലെ മിലനിൽ നടന്ന എക്‌സിബിഷൻ വേദിയിൽ നിന്നുള്ള ദൃശ്യങ്ങളാണ് താരം പങ്കുവെച്ചത്. അമേരിക്കൻ മോഡൽ ലിൻലി എയ്ലേഴ്‌സിന്റെ നഗ്‌നമേനിയിൽ പെയിന്റ് ചെയ്യുകയാണ് റിച്ചി. പശ്ചാത്തലത്തിൽ മനോഹരമായ സംഗീതവും മുഴങ്ങി കേൾക്കുന്നുണ്ട്. ന്യൂഡ് ബോഡി പെയിന്റിങ്ങിൽ അസാമാന്യ വൈദഗ്ധ്യമുള്ളയാളാണ് റോക്കോ റിച്ചി.
താനാണ് ഈ ലോകത്തിലെ ഏറ്റവും ഭാഗ്യവതിയായ അമ്മ എന്ന അടിക്കുറിപ്പോടെയാണ് മഡോണ മകന്റെ പെയിന്റിങ് വിഡിയോ പങ്കുവച്ചത്. വിഡിയോ ദൃശ്യങ്ങൾ ചുരുങ്ങിയ സമയത്തിനകം ശ്രദ്ധേയമായിക്കഴിഞ്ഞു. നിരവധി പേരാണ് പ്രതികരണങ്ങൾ അറിയിച്ചു രംഗത്തെത്തുന്നത്. മഡോണ മകനുമായി ഇത്രയേറെ അടുപ്പം കാത്തുസൂക്ഷിക്കുന്നുണ്ടെന്നു വെളിവാക്കപ്പെടുന്നതും ഇപ്പോഴാണ്.
മഡോണയുടെ നാല് മക്കളിൽ രണ്ടാമത്തെയാളാണ് 23കാരനായ റോക്കോ റിച്ചി. അഭിനേതാവ് കൂടിയാണ്. ലോർഡ്‌സ് ലിയോൺ, മേഴ്‌സി ജെയിംസ്, ഡേവിഡ് ബാന്ദ എന്നിവരാണ് മഡോണയുടെ മറ്റു മക്കൾ. ഇതിൽ ഏറ്റവും മുതിർന്നവളായ ലോർഡ്‌സ് ഫാഷൻ ലോകത്ത് സജീവമാണ്.
