'പ്രേമം' എക്കാലത്തെയും പ്രിയപ്പെട്ട ചിത്രം; നിങ്ങളുടെ സിനിമകൾ ഞാൻ മിസ് ചെയ്യും'; അൽഫോൻസ് പുത്രൻ സിനിമ കരിയർ അവസാനിപ്പിക്കുന്നതിൽ ആശങ്ക സുധ കൊങ്കാര

ചെന്നൈ: അൽഫോൻസ് പുത്രൻ സിനിമ കരിയർ അവസാനിപ്പിക്കുന്നതിൽ ആശങ്ക അറിയിച്ച് സംവിധായിക സുധ കൊങ്കാര. അൽഫോൻസ് പുത്രന്റെ സിനിമകൾ താൻ മിസ് ചെയ്യുമെന്നും 'പ്രേമം' തന്റെ എക്കാലത്തെയും പ്രിയപ്പെട്ട സിനിമകളിൽ ഒന്നാണെന്നും സുധ കൊങ്കര ഇൻസ്റ്റഗ്രാമിൽ കുറിച്ചു.

കഴിഞ്ഞ ദിവസമാണ് തനിക്ക് ഓട്ടിസം സ്പെക്ട്രം ഡിസോഡർ ആണെന്ന് അൽഫോൻസ് പുത്രൻ വെളിപ്പെടുത്തിയത്. ആർക്കും ഒരു ഭാരമാകാൻ ആഗ്രഹിക്കുന്നില്ലെന്നും താരം സോഷ്യൽമീഡിയയിൽ പങ്കുവെച്ച കുറിപ്പിൽ പറഞ്ഞു. തനിക്ക് സിനിമ ഉപേക്ഷിക്കാൻ ആഗ്രഹമില്ല. എന്നാൽ മറ്റ് മാർഗ്ഗമില്ലെന്നും ഗാനങ്ങളും ഹ്രസ്വചിത്രങ്ങളും ചെയ്യുന്നത് തുടരുമെന്നും സംവിധായകൻ അൽഫോൻസ് പുത്രൻ അറിയിച്ചിരുന്നു.

മാനസികമായി തകർന്നിരിക്കുമ്പോൾ പ്രേമം തനിക്ക് ഉണർവു നൽകുമായിരുന്നു. താൻ ആ സിനിമ ഇടയ്ക്കിടെ കാണാറുണ്ടെന്നും ഏതു രൂപത്തിലായാലും താങ്കളുടെ കലാസൃഷ്ടി തുടരണമെന്നും അത് താൻ ഉറപ്പായും കാണുമെന്നും സുധ കൊങ്കാര കൂട്ടിച്ചേർത്തു.