അപകടത്തിൽപെട്ട കാറിനുള്ളിൽ കഞ്ചാവ് പൊതികൾ; ആലപ്പുഴയിൽ മൂന്നുപേർ അറസ്റ്റിൽ

ആലപ്പുഴ: അപകടത്തിൽപ്പെട്ട കാറിൽ നിന്ന് പിടികൂടിയത് എട്ട് കിലോയോളം കഞ്ചാവ്. ചെങ്ങന്നൂർ മുളക്കുഴയിൽ ആണ് സംഭവം. കാറിലുണ്ടായിരുന്ന മൂന്നു പേരെ പൊലീസ് അറസ്റ്റ് ചെയ്തു. അടൂർപഴകുളം സ്വദേശികളായ ഷൈജു, ഫൈസൽ, നെടുമങ്ങാട് സ്വദേശി മഹേഷ് എന്നിവരെയാണ് ചെങ്ങന്നൂർ പൊലീസ് അറസ്റ്റു ചെയ്തത്. കാറിലുണ്ടായിരുന്ന ഒരാൾ രക്ഷപെട്ടു.

തിരുവനന്തപുരത്തുനിന്ന് കോട്ടയത്തേക്ക് പോകുകയായിരുന്ന കാർ നിയന്ത്രണം വിട്ട് മറിയുകയായിരുന്നു. രക്ഷാപ്രവർത്തനത്തിനെത്തിയ നാട്ടുകാരാണ് വാഹനത്തിൽ കഞ്ചാവ് പൊതികൾ കണ്ടത്. പരിക്കേറ്റവർ പൊതികൾ എടുക്കാൻ ശ്രമിച്ചതോടെ സംശയം തോന്നി നാട്ടുകാർ നോക്കിയപ്പോഴാണ് കഞ്ചാവാണെന്ന് മനസിലായത്. ഉടൻ പൊലീസിൽ വിവരമറിയിക്കുകയായിരുന്നു. അറസ്റ്റിലായ ഷൈജു പത്തനംതിട്ട, നൂറനാട്, അടൂർ തുടങ്ങിയ പൊലീസ് സ്റ്റേഷനുകളിൽ വധശ്രമം ഉൾപ്പെടെ നിരവധി കേസുകളിൽ പ്രതിയാണ്.