മഴക്കെടുതിയിൽ മരിച്ചവർക്ക് ആദരാഞ്ജലികൾ അർപ്പിച്ച് ഗവർണർ ആരിഫ് മുഹമ്മദ് ഖാൻ

തിരുവനന്തപുരം: കേരളത്തിൽ മഴക്കെടുതിയിൽ മരിച്ചവർക്ക് ആദരാഞ്ജലികൾ അർപ്പിച്ച് ഗവർണർ ആരിഫ് മുഹമ്മദ് ഖാൻ. ഉരുൾപൊട്ടലിലടക്കം ഒൻപത് മരണമാണ് ഇതുവരെ റിപ്പോർട്ട് ചെയ്തത്. .

കാറ് ഒഴുക്കിൽ പെട്ട് രണ്ട് പേരും ഉരുൾപൊട്ടലിൽ ഏഴ് പേരുമാണ് മരിച്ചത്. ദുരിതം അനുഭവിക്കുന്ന ഇവരുടെ കുടുംബാംഗങ്ങൾക്ക് അനുശോചനം അറിയിക്കുന്നതായി ആരിഫ് മുഹമ്മദ് ഖാൻ ട്വിറ്ററിൽ കുറിച്ചു. എല്ലാവരും ജാഗ്രത പുലർത്തണമെന്നും രക്ഷാപ്രവർത്തന സംഘത്തോട് പൂർണമായും സഹകരിക്കണമെന്നും അദ്ദേഹം നിർദ്ദേശിച്ചു.

വെള്ളിയാഴ്ച രാത്രി മുതൽ കേരളത്തിൽ ശക്തമായ മഴ തുടരുകയാണ്. കോട്ടയം, ഇടുക്കി ജില്ലകളിൽ മഴയേത്തുടർന്ന് വൻ നാശനഷ്ടങ്ങളാണ് സംഭവിച്ചത്. ഏഴ് വീടുകൾ പൂർണമായും നശിച്ചു. പത്ത് പേരെ കാണാതായി. ഇവർക്ക് വേണ്ടിയുള്ള തിരച്ചിലും വിവിധ ഭാഗങ്ങളിൽ പുരോഗമിക്കുകയാണ്. ഇന്ന് രാത്രിയിലും മഴ തുടരുമെന്നാണ് കാലാവസ്ഥാ നിരീക്ഷകർ മുന്നറിയിപ്പ് നൽകുന്നത്.