കാത്തിരിപ്പ് അവസാനിച്ചു; പന്ത്രണ്ട് വർഷത്തെ ഇടവേളക്ക് ശേഷം ഷാജി കൈലാസും മോഹൻലാലും ഒന്നിക്കുന്നു; ചിത്രം ഒക്ടോബറിൽ ആരംഭിക്കുമെന്ന് മോഹൻലാലിന്റെ കുറിപ്പ്

തിരുവനന്തപുരം: 12 വർഷത്തിന് ശേഷം സംവിധായകൻ ഷാജി കൈലാസിനൊപ്പമുള്ള ചിത്രം പ്രഖ്യാപിച്ച് മോഹൻലാൽ. വീണ്ടും സിനിമയിൽ ഒന്നിക്കുന്നതിന്റെ സന്തോഷവും ആവേശവും പങ്കുവച്ചാണ് താരത്തിന്റെ കുറിപ്പ്. രാജേഷ് ജയറാം തിരക്കഥയെഴുതുന്ന ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കും. 2009ൽ പുറത്തിറങ്ങിയ റെഡ് ചില്ലീസിലാണ് ഇരുവരും അവസാനമായി ഒന്നിച്ചത്.

മോഹൻലാലിന്റെ കുറിപ്പ്

കാത്തിരിപ്പ് അവസാനിച്ചു!
2021 ഒക്ടോബറിൽ ആരംഭിക്കുന്ന ഷാജി കൈലാസിനൊപ്പമുള്ള എന്റെ അടുത്ത പ്രൊജക്റ്റ് ഞാൻ പ്രഖ്യാപിക്കുന്നത് വളരെ ആവേശത്തോടും സന്തോഷത്തോടും കൂടിയാണ്. രാജേഷ് ജയറാം തിരക്കഥയെഴുതുന്ന ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ഈ ചിത്രത്തിൽ 12 വർഷങ്ങൾക്ക് ശേഷമാണ് ഞാനും ഷാജിയും ഒന്നിക്കുന്നത്. ഇത് കാത്തിരിക്കേണ്ടതാണെന്ന് ഉറപ്പാണ്!