പരിശീലനത്തിനിടെ മറ്റൊരു വിദ്യാർത്ഥി എറിഞ്ഞ ജാവലിൻ തലയിൽ തുളച്ചുകയറി; സ്‌കൂൾ വിദ്യാർത്ഥിക്ക് ദാരുണാന്ത്യം

മുംബൈ: മഹാരാഷ്ട്രയിൽ പരിശീലനത്തിനിടെ ജാവലിൻ തലയിൽ തുളച്ചുകയറി സ്‌കൂൾ വിദ്യാർത്ഥിക്കു ദാരുണാന്ത്യം. ബുധനാഴ്ച ഉച്ചയ്ക്കു ശേഷം റായ്ഗഡിൽ പരിശീലനത്തിനിടെ മറ്റൊരു വിദ്യാർത്ഥി എറിഞ്ഞ ജാവലിൻ തലയിൽ തുളച്ചുകയറി ഹുജേഫ ദവാരെ എന്ന വിദ്യാർത്ഥിയാണു മരിച്ചത്. പരിശീലനത്തിന്റെ സമയത്ത് ഒരു ജാവലിൻ എറിഞ്ഞ ശേഷം ഷൂ ലേസ് കെട്ടി എഴുന്നേറ്റു നിൽക്കുന്നതിനിടെയാണു വിദ്യാർത്ഥിയുടെ തലയിൽ ജാവലിൻ വീണത്.

താലൂക്ക്തല കായിക മത്സരത്തിനെത്തിയ വിവിധ സ്‌കൂളുകളിൽനിന്നുള്ള വിദ്യാർത്ഥികൾ പരിശീലിക്കുമ്പോഴാണ് അപകടമുണ്ടായതെന്ന് ഗോർഗാവ് അസിസ്റ്റന്റ് പൊലീസ് ഇൻസ്‌പെക്ടർ ശ്രീകൃഷ്ണ നവാലെ വ്യക്തമാക്കി. ജാവലിൻ എറിഞ്ഞ വിദ്യാർത്ഥിയെ കണ്ടെത്താനായി സിസിടിവി ദൃശ്യങ്ങൾ പരിശോധിക്കുകയാണെന്നും പൊലീസ് അറിയിച്ചു.