പട്ടികജാതി വിഭാഗത്തിൽപ്പെട്ട വീട്ടമ്മയെ പീഡിപ്പിക്കാൻ ശ്രമിച്ചുവെന്ന്; എതിർത്തപ്പോൾ ജാതിപ്പേര് വിളിച്ചുവെന്നും ആരോപണം; ക്ഷേത്ര പൂജാരിക്കെതിരേ കേസ് എടുത്തു

കോഴഞ്ചേരി: പട്ടികജാതി വിഭാഗത്തിൽപ്പെട്ട വീട്ടമ്മയെ പീഡിപ്പിക്കാൻ ശ്രമിക്കുകയും എതിർത്തപ്പോൾ ജാതിപ്പേര് വിളിക്കുകയും ചെയ്തുവെന്ന് ആരോപിച്ച് നൽകിയ പരാതിയിൽ ക്ഷേത്രപൂജാരിക്കെതിരേ ആറന്മുള പൊലീസ് കേസെടുത്തു. കടമ്മനിട്ട ദേവീക്ഷേത്രത്തിലെ പൂജാരി മഹേഷിനെതിരേയാണ് കേസ്.

കഴിഞ്ഞ 13 ന് ഉച്ചയ്ക്ക് 12.30 നാണ് സംഭവം. പരാതിക്കാരിയുടെ ഗൃഹപ്രവേശവുമായി ബന്ധപ്പെട്ട് കൊണ്ടു വന്ന വിളക്കും മറ്റു സാമഗ്രികളും തിരികെ എടുക്കാൻ ചെന്നപ്പോഴാണ് പീഡന ശ്രമമെന്ന് പറയുന്നു. പൂജാരിയുടെ പിടിയിൽ നിന്ന് കുതറി ഓടിയപ്പോഴാണ് ജാതിപ്പേര് വിളിച്ചതെന്നും പരാതിയിലുണ്ട്. ശനിയാഴ്ച വൈകിട്ടാണ് പൊലീസ് കേസെടുത്തത്.