ഈ സർക്കാരിന്റെ കാലത്തു മാത്രം പൂർത്തീകരിച്ചത് 50,650 വീടുകൾ; ലൈഫ് മിഷൻ കൂടുതൽ മികവോടെ മുന്നോട്ടുപോകുന്നുവെന്ന് മുഖ്യമന്ത്രി

തിരുവനന്തപുരം: കേരളത്തിന്റെ അഭിമാന പദ്ധതിയായ ലൈഫ് മിഷൻ കൂടുതൽ മികവോടെ മുന്നോട്ടുപോവുകയാണെന്ന് മുഖ്യമന്ത്രി പിണറായി വിജയൻ. ഈ സർക്കാരിന്റെ കാലത്തു മാത്രം പൂർത്തീകരിച്ചത് 50,650 വീടുകളാണ്. ഇതോടെ മൊത്തം വീടുകളുടെ എണ്ണം 3,13,725 ആയെന്നും മുഖ്യമന്ത്രി വ്യക്തമാക്കി.

9,521 കോടി രൂപ ഇതുവരെ പദ്ധതിക്കായി ചെലവഴിച്ചു. 2.5 ലക്ഷം ഭൂരഹിതർക്ക് ഭൂമി ലഭ്യമാക്കുന്നതിനായി നടപ്പാക്കുന്ന 'മനസ്സോടിത്തിരി മണ്ണ്' ക്യാമ്പെയ്നും വിജയപൂർവ്വം മുന്നേറുകയാണ്. ഈ സർക്കാരിന്റെ കാലത്ത് ഇതുവരെ 1766.311 സെന്റ് ഭൂമി ഈ പദ്ധതി വഴി ലഭ്യമാക്കാൻ സാധിച്ചു.

എല്ലാവർക്കും സുരക്ഷിതമായ പാർപ്പിടം സ്വന്തമായുള്ള നാടെന്ന ലക്ഷ്യത്തിലേയ്ക്ക് കേരളം നടന്നടുക്കുകയാണ്. ഓരോരുത്തരുടേയും പങ്കാളിത്തം ഉറപ്പുവരുത്തി ആ ലക്ഷ്യം നമുക്ക് സാക്ഷാൽക്കരിക്കാം- മുഖ്യമന്ത്രി പറഞ്ഞു