ബ്രഹ്‌മാവിൽ നിന്ന് വരം നേടി രണ്ട് അസുരന്മാർ ജനങ്ങളെ കൊന്നൊടുക്കിയപ്പോൾ ഇവരെ നശിപ്പിക്കാൻ അവതാരമെടുത്ത ഉഗ്ര സ്വരൂപണിയായ കൈതചാമുണ്ഡി; തെയ്യത്തിനിടെ ഉണ്ടായത് ഉന്തും തള്ളും മാത്രം; തില്ലങ്കേരി വിവാദത്തിൽ കോലധാരിക്ക് പറയാനുള്ളത്
കണ്ണൂർ:തില്ലങ്കേരിയിൽ തെയ്യം കെട്ടിയയാൾക്ക് നാട്ടുകാരുടെ മർദ്ദനമേറ്റ സംഭവത്തിൽ വിശദീകരണവുമായി ക്ഷേത്ര കമ്മിറ്റിയും കോലധാരിയും രംഗത്തെത്തി. പേരാവൂർ പ്രസ് ഫോറത്തിൽ നടത്തിയ വാർത്താ സമ്മേളനത്തിലാണ് ഈക്കാര്യം വ്യക്തമാക്കിയത്. തെയ്യം ആചാരനുഷ്ഠാനങ്ങൾ നടക്കുന്നതിനിടെ വെറും ഉന്തും തള്ളും മാത്രമാണ് ഉണ്ടായതെന്നും കൈതച്ചാമുണ്ഡി തെയ്യത്തിനിടെ ഇത് പതിവാണെന്നും തെയ്യം കെട്ടിയ മുകേഷ് പണിക്കർ പറഞ്ഞു.
തെയ്യത്തെ കണ്ട് ഭയന്നോടിയവർക്ക് പരിക്കേറ്റതോടെയാണ് കഴിഞ്ഞ ദിവസം തില്ലങ്കേരിയിൽ പ്രശ്‌നങ്ങളുണ്ടായത്. പെരിങ്ങാനം ഉദയംകുന്ന് മടപ്പുര ഉത്സവത്തിനിടെ തെയ്യക്കോലം കെട്ടിയ ആളെയാണ് നാട്ടുക്കാരിൽ ചിലർ തല്ലിയത്. രൗദ്ര ഭാവത്തിൽ ആളുകളെ പേടിപ്പിക്കുന്ന തെയ്യമായ കൈതച്ചാമുണ്ഡി കെട്ടിയാടിയത് മുകേഷ് പണിക്കരായിരുന്നു. ആളുകളെ പിന്തുടർന്ന് പേടിപ്പിക്കുന്നതാണ് തെയ്യത്തിന്റെ രീതി. ഇതിനിടയിൽ ചിലർക്ക് പരിക്ക് പറ്റിയത്തൊടെയാണ് സംഘർഷമായത്.
എന്നാൽ അത് വെറും അഞ്ച് മിനിറ്റ് നീണ്ട പ്രശ്‌നമെന്നും ക്രൂര മർദ്ദനം ഏറ്റെന്ന റിപ്പോർട്ട് ശരിയല്ലെന്നും മുകേഷ് പണിക്കരുടെ വിശദീകരണം. സംഭവത്തിന് ശേഷവും ചടങ്ങുകൾ പതിവുപോലെ നടന്നെന്നും ചില കേന്ദ്രങ്ങൾ വ്യാജ പ്രചാരണം നടത്തിയെന്നുമാണ് ക്ഷേത്ര കമ്മിറ്റിയും പറയുന്നത്. ആചാരം അടിയിലേക്ക് പോയതോടെ പൊലീസ് സ്ഥലത്ത് എത്തിയിരുന്നു. ആർക്കും പരാതി ഇല്ലാത്തതിനാൽ കേസ് എടുത്തിരുന്നില്ല.
സാമൂഹിക മാധ്യമങ്ങളിൽ ദൃശ്യങ്ങൾ വൈറലായതോടെ തല്ലിനെ ന്യായീകരിച്ചും തള്ളിയും പ്രതികരണങ്ങളും വ്യാപകമായിരുന്നു. ആചാരം അതിരുവിടരുതെന്നു ചിലർ കുറിച്ചപ്പോൾ, കൈതചാമുണ്ഡി തെയ്യത്തിന്റെ രീതി അറിയാത്തതിന്റെ പ്രശ്‌നമെന്ന് ഒരു വിഭാഗം വാദിക്കുന്നു. അതിനിടയിലാണ് കോലധാരിയുടെ വിശദീകരണം. പുറത്തുവന്നത്. കണ്ണൂർജില്ലയിലെ ചുരുക്കം ചില ക്ഷേത്രങ്ങളിൽ മാത്രം കെട്ടിയാടുന്ന ഉഗ്രസ്വരൂപിണിയായ തെയ്യമാണ് കൈത ചാമുണ്ഡി തെയ്യം.
ബ്രഹ്‌മാവിൽ നിന്ന് വരം നേടി രണ്ട് അസുരന്മാർ ജനങ്ങളെ കൊന്നൊടുക്കിയപ്പോൾ ഇവരെ നശിപ്പിക്കാൻ അവതാരമെടുത്ത ഉഗ്ര സ്വരൂപണിയായി കൈത ചാമുണ്ഡി അവതരിച്ചു എന്നതാണ് ഈ തെയ്യത്തിന്റെ ഐതിഹ്യം. ഈ തെയ്യം കെട്ടിയാടുന്ന എല്ലായിടത്തും കർശന നിയന്ത്രണങ്ങളുണ്ടാവും. ജനങ്ങളെ പേടിപ്പിച്ചും പുറകെ ഓടിയും ഈ തെയ്യം കെട്ടിയാടുമ്പോൾ അതൊരു ആസ്വാദനത്തിനപ്പുറം വേറൊരു ചിന്തയും അവിടെ തെയ്യം കാണാൻ വന്നവർക്കോ തെയ്യം നടത്തുന്നവർക്കോ ഉണ്ടാവാറില്ല.
അങ്ങനെ ഇവിടെ തെയ്യം കെട്ടിയാടി കൊണ്ടിരിക്കേ ഓടുന്നിനിടയിൽ ഒരു കുട്ടി താഴെ വീഴുകയും പരിക്ക് പറ്റുകയും ചെയ്തു. അതിന്റെ ഭാഗമായി ചെറിയ രീതിയിൽ ഉന്തും തള്ളും നടക്കുകയും അത് തെയ്യം നടത്തിപ്പുകാരും നാട്ടുകാരും ചേർന്ന് ആ നിമിഷം തന്നെ ആ പ്രശ്‌നം പരിഹരിക്കുകയും അതിനുശേഷം മണിക്കൂറുകളോളം ആ തെയ്യം കെട്ടിയാടുകയും വളരെ നല്ല രീതിയിൽ തെയ്യം അവസാനിക്കുകയും ചെയ്തതിനു ശേഷം സോഷ്യൽ മീഡിയയിൽ ഇതിന്റെ ദൃശ്യങ്ങൾ പ്രചരിച്ചതിനു ശേഷമാണ് സംഭവം വിവാദമായത്.
