മംഗലൂരുവിലെ രോഗിക്ക് നിപ ഇല്ല; കർണാടകയിലെ കാർവാർ സ്വദേശിയുടെ പരിശോധനാഫലം നെഗറ്റീവ്

മംഗലൂരു : മംഗലൂരുവിൽ ചികിൽസയിലുള്ള കർണാടക സ്വദേശിക്ക് നിപ ഇല്ലെന്ന് പരിശോധനാഫലം. കർണാടകയിലെ കാർവാർ സ്വദേശിയുടെ പരിശോധനാ ഫലം നെഗറ്റീവ് ആണ്. പൂണെ എൻഐവിയിലാണ് സ്രവം പരിശോധിച്ചത്.

കഴിഞ്ഞദിവസമാണ് നിപ രോഗലക്ഷണങ്ങളോടെ ഇയാളെ മംഗലൂരുവിലെ ആശുപത്രിയിൽ പ്രവേശിപ്പിച്ചത്. കേരളത്തിൽ നിന്ന് മടങ്ങിയെത്തിയ ഒരാളുമായി ലാബ് ടെക്നീഷ്യനായ ഇയാൾ സമ്പർക്കം പുലർത്തിയിരുന്നതായും റിപ്പോർട്ടുണ്ടായിരുന്നു.

ഏതാനും ദിവസം മുൻപ് ഗോവയിലേക്ക് ഇയാൾ യാത്ര നടത്തുകയും ചെയ്തിരുന്നു. നിപ രോഗബാധ സംശയത്തെത്തുടർന്ന് കേരളത്തിൽ നിന്ന് എത്തുന്നവരെ നിരീക്ഷിക്കണം എന്ന് കർണാടക ആരോഗ്യവകുപ്പ് മംഗളൂരുവിലെ ആരോഗ്യ വകുപ്പ് ഉദ്യോഗസ്ഥർക്ക് നിർദേശവും നൽകിയിരുന്നു.