കൊച്ചി: വെള്ളവും വൈദ്യുതിയും അടിസ്​ഥാന സൗകര്യങ്ങളാണെന്ന് ഹൈക്കോടതി. അപേക്ഷ ലഭിച്ചാൽ ഒരു മാസത്തിനകം കണക്​ഷൻ നൽകാൻ വൈദ്യുതി ബോർഡ്​ ബാധ്യസ്​ഥരാണെന്നും​ ഹൈക്കോടതി വ്യക്തമാക്കി. 300 ചതുരശ്ര അടി മാത്രം വലുപ്പമുള്ള വീട്ടിലേക്ക്​ വൈദ്യുതി കണക്​ഷൻ നൽകാനുള്ള വൈദ്യുതി ഓംബുഡ്​സ്​മാ​ന്റെ ഉത്തരവ്​ പാലിക്കാത്തതിനെ തുടർന്ന്​ നടപടി നേരിട്ട രണ്ട്​ ഉദ്യോഗസ്​ഥരുടെ ഹർജി തള്ളിയാണ്​ ജസ്​റ്റിസ്​ മുരളി പുരുഷോത്തമ​ന്റെ ഉത്തരവ്​. .

എടരിക്കോട്​ വൈദ്യുതി ഡിവിഷനിൽ 2013 ​മെയ്​ 20ന്​ കുറ്റിപ്പാല സ്വദേശി പി. സൈനുദ്ദീൻ നൽകിയ അ​പേക്ഷ ലോ ടെൻഷൻ വൈദ്യുതി ലൈനിൽനിന്ന്​ മൂന്ന്​ മീറ്റർ അകലം പാലിച്ചില്ലെന്ന്​ ചൂണ്ടിക്കാട്ടി നിരസിച്ചിരുന്നു. ലൈൻ മാറ്റിയാലേ കണക്​ഷ​ൻ നൽകാനാവൂ​വെന്ന്​ എ.ഇ മറുപടി നൽകി. ഇതിനെതിരെ ഇലക്​ട്രിസിറ്റി​ ഓംബുഡ്​സ്​മാന്​ അപേക്ഷകൻ പരാതി നൽകി. അസി. എക്​സി. എൻജിനീയറും അസി. എൻജിനീയറും സ്​ഥലം സന്ദർശിച്ച്​ സ്​കെച്ച്​ തയാറാക്കി ലോടെൻഷൻ ലൈൻ മാറ്റാൻ ​ ഓംബുഡ്​സ്​മാൻ നിർദ്ദേശിച്ചു. 21 ദിവസത്തിനകം കണക്​ഷൻ നൽകാനും ഉത്തരവിട്ടു. എന്നാൽ, ഉത്തരവ്​ പാലിച്ചില്ല.

തുടർന്ന്​ റെഗുലേറ്ററി കമ്മിഷൻ മുമ്പാകെ പരാതി നൽകി.​ ഉത്തരവ്​ നടപ്പാക്കാത്തതിന്​ മലപ്പുറം കോട്ടക്കൽ അസി. എക്​സി. എൻജിനീയർ കെ.എൻ. രവീന്ദ്രനാഥന്​ 50,000 വും അസി. എൻജിനീയർ കെ. കീരന്​ 25000 വും രൂപ പിഴ വിധിച്ചു. ഇതിനെതിരെയാണ്​ ഇരുവരും കോടതിയെ സമീപിച്ചത്​. വൈദ്യുതി ആക്​ടിലെ 43(1) വകുപ്പ്​ പ്രകാരം അപേക്ഷ ലഭിച്ചാൽ ഒരു മാസത്തിനകം ​വിതരണ ഏജൻസി വൈദ്യുതി നൽകാൻ ബാധ്യസ്​ഥരാണെന്ന് കോടതി വ്യക്​തമാക്കി.

തൊട്ടടുത്ത പറമ്പിൽ സ്​റ്റേ നാ​ട്ടേണ്ടതിനാൽ അവരുടെ സമ്മതം വേണമെന്നും ഇത്​ ഹാജരാക്കാത്തതിനാലാണ്​​ ​വൈകുന്നതെന്നുമായിരുന്നു ഉദ്യോഗസ്​ഥരുടെ വാദം. ഓംബുഡ്​സ്​മാൻ നിർദ്ദേശ പ്രകാരം ഹരജിക്കാ​ർ റൂട്ട്​ സ്​കെച്ച്​ സമർപ്പിച്ചപ്പോൾ സ്​റ്റേ ലെയ്​ൻ സ്​ഥാപിക്കേണ്ടത്​ പറഞ്ഞിരുന്നില്ലെന്ന്​ ചൂണ്ടിക്കാട്ടിയാണ്​ കമ്മിഷൻ പിഴ വിധിച്ചത്​. കമ്മിഷൻ നിഗമനം കോടതിയും ശരിവെച്ചു. ഓംബുഡ്​സ്​മാൻ ഉത്തരവ്​ നടപ്പാക്കാത്തത്​ ലംഘനമായി കണക്കാക്കാമെന്ന്​ കോടതി വ്യക്​തമാക്കി. ഈ സാഹചര്യത്തിൽ നടപടി സ്വീകരിക്കുന്നതിൽ തെറ്റില്ലെന്ന്​ ചൂണ്ടിക്കാട്ടി പിഴ ഒഴിവാക്കാനുള്ള ഹർജി തള്ളുകയായിരുന്നു.

പിഴവൈദ്യുതി കണക്ഷൻഹൈക്കോടതി

മറുനാടന്‍ മലയാളി

    മറുനാടന്‍ മലയാളി ബ്യൂറോ