അവസാനിച്ചത് പത്ത് വർഷം നീണ്ട കാത്തിരിപ്പ്; റഹ്മാനും സജിതയും ഇനി ഭാര്യാഭർത്താക്കന്മാർ; അപൂർവ്വതയ്‌ക്കൊടുവിലെ വിവാഹത്തിന് സാക്ഷിയായി എംഎൽഎ കെ ബാബു ഉൾപ്പടെയുള്ളവർ; ഇനി ഉള്ളത് സ്വന്തം വീടെന്ന ആഗ്രഹമെന്ന് റഹ്മാനും സജിതയും
പാലക്കാട്: പത്തുവർഷം ഒറ്റമുറിയിൽ ലോകമറിയാതെ കഴിഞ്ഞ പ്രണയജോഡികളായ റഹ്മാനും സജിതയും ഇനി ഭാര്യാഭർത്താക്കന്മാർ. അപൂർവതകൾ നിറഞ്ഞ പത്ത് വർഷത്തെ പ്രണയത്തിന് ശേഷം റഹ്മാനും സജിതയും ഔദ്യോഗികമായി വിവാഹിതരായി. പാലക്കാട് നെന്മാറയിലെ സബ് രജിസ്ട്രാർ ഓഫീസിലാണ് ഇരുവരും വിവാഹിതരായത്. നെന്മാറ എംഎൽഎ കെ ബാബുവിന്റെ സാന്നിധ്യത്തിലായിരുന്നു വിവാഹം. പുരോഗമന കലാ സാഹിത്യസംഘത്തിന്റെ കൊല്ലങ്കോട് ഏരിയ കമ്മിയാണ് വിവാഹത്തിനുള്ള സൗകര്യങ്ങൾ ഒരുക്കിയത്.
രാവിലെ പത്തുമണിയോടെ നെന്മാറയിലെ സബ് രജിസ്ട്രാർ ഓഫീസിലേക്ക് റഹ്മാനും സജിതയുമെത്തുമ്പോൾ സ്വീകരിക്കാൻ നെന്മാറ എംഎൽഎ കെ. ബാബുവും മറ്റു ജന പ്രതിനിധികളും എത്തിയിരുന്നു. പുരോഗമന കലാസാഹിത്യ സംഘത്തിന്റെ വിവാഹ സമ്മാനം സ്വീകരിച്ച് സബ് രജിസ്ട്രാർക്ക് ഇരുവരും വിവാഹ അപേക്ഷ നൽകി. ചടങ്ങിന് സാക്ഷികളാവാൻ സജിതയുടെ മാതാപിതാക്കളുമെത്തി. സബ് രജിസ്ട്രാർ ഓഫീസിൽ നിന്നും പുറത്തിറങ്ങിയ റഹ്മാനും സജിതയും എല്ലാവർക്കും മധുരം നൽകി.
സ്വന്തമായി ഒരു കൊച്ചു വീടെന്ന സ്വപ്നമാണ് ഇനിയുള്ളതെന്ന് ഇരുവരും പറഞ്ഞു. ഇരുവരുടെയും സ്വപ്നം യാഥാർഥ്യമാക്കാൻ ഒപ്പമുണ്ടാവുമെന്ന് കെ. ബാബു എംഎൽഎ ദമ്പതിമാർക്ക് ഉറപ്പ് നല്കി. സിനിമാക്കഥയെ വെല്ലുന്നതാണ് നെന്മാറ അയിലൂർ കാരക്കാട്ടുപറമ്പിലെ റഹ്മാന്റെയും സജിതയുടെയും പ്രണയകഥ. അയൽവാസികളായ യുവതിക്കും യുവാവിനും പരസ്പരം തോന്നിയ ഇഷ്ടത്തിന് മതത്തിന്റെ വേലിക്കെട്ടുകൾ തടസ്സമാകുന്ന് ഭയന്നവർ. പത്തുകൊല്ലത്തിന് ശേഷം ഒളിവുജീവിതം റഹ്മാനും സജിതയും അവസാനിപ്പിച്ചത് പൊലീസ് ഇടപെടലിലാണ്. അയിലൂർ കാരക്കാട്ടുപറമ്പ് സ്വദേശികളായ റഹ്മാനും സജിതയും ഇപ്പോൾ വിത്തനശ്ശേരിയിലുള്ള വാടകവീട്ടിലാണ് കഴിയുന്നത്. 2010 ഫെബ്രുവരിയിലാണ് റഹ്മാനോടൊപ്പം ജീവിക്കാൻ 18-കാരിയായ സജിത വീടുവിട്ടിറങ്ങിയത്. ഇലക്ട്രിക്കൽ ജോലിയും പെയിന്റിങ്ങും ചെയ്യുന്ന റഹ്മാനൊപ്പം കഴിയുന്നതിനായി ഇറങ്ങിത്തിരിച്ച സജിതയെ റഹ്മാൻ ആരുമറിയാതെ വീട്ടിലെ മുറിയിൽ താമസിപ്പിക്കുകയായിരുന്നു.
2021 മാർച്ചിൽ ഇരുവരും വീടുവിട്ടിറങ്ങി വിത്തനശ്ശേരിക്ക് സമീപമുള്ള വാടകവീട്ടിലേക്ക് താമസം മാറി. റഹ്മാനെ കാണാനില്ലെന്ന പരാതിയിൽ പൊലീസന്വേഷണം നടക്കുന്നതിനിടെ റഹ്മാനെ സഹോദരൻ നെന്മാറയിൽവെച്ച് കാണുകയും പൊലീസിൽ വിവരമറിയിക്കുകയും ചെയ്തു. തുടർന്നുനടത്തിയ അന്വേഷണത്തിലാണ് 10 വർഷത്തെ പ്രണയജീവിതത്തിന്റെ ചരിത്രം പുറംലോകമറിഞ്ഞത്.
റഹ്മാന്റെ വീട്ടിൽനിന്നു പത്തുവീട് അകലെയാണ് സജിതയുടെ വീട്. റഹ്മാന്റെ സഹോദരിയുടെ സുഹൃത്തുകൂടിയായിരുന്ന സജിത വല്ലപ്പോഴും വീട്ടിലേക്ക് വരുമായിരുന്നു. അങ്ങനെ സഹോദരിയുടെ കൂട്ടുകാരിയുമായി റഹ്മാൻ പ്രണയം തുടങ്ങി. രണ്ടുസമുദായക്കാരായ ഇവരുടെ ബന്ധത്തിൽ വീട്ടുകാർക്ക് താത്പര്യമില്ലെന്നറിഞ്ഞതോടെ എങ്ങനെയും ഒരുമിക്കണമെന്നായി. 18-ാം വയസ്സിൽ സജിത വീടുവിട്ടിറങ്ങി. പിന്നെ ആരും അറിയാതെ ഒരുമിച്ചൊരു ജീവിതം. സജിതയെ കാണാതായപ്പോൾ തന്നെ റഹ്മാനെ കുടുംബം സംശയിച്ചിരുന്നു. എന്നാൽ വീട്ടിൽ തന്നെ തുടർന്ന റഹ്മാൻ സംശയത്തിന് അതീതനായി. അങ്ങനെ സജിത നാടുവിട്ട പെണ്ണുമായി.
സൗകര്യങ്ങളൊന്നുമില്ലാത്ത, തന്റെ ഓടിട്ട ചെറിയവീട്ടിൽ റഹ്മാൻ താത്കാലികമായി സജിതയെ താമസിപ്പിച്ചു എന്നതാണ് വസ്തുത. റഹ്മാന്റെ വീട്ടുകാർപോലും ഇക്കാര്യം അറിഞ്ഞില്ലെന്നാണ് പൊലീസ് പറയുന്നത്. സജിതയെ കാണാതായതോടെ വീട്ടുകാർ പൊലീസിൽ പരാതിനൽകി. റഹ്മാനുൾപ്പെടെ സ്ഥലത്തെ പലരെയും പൊലീസ് ചോദ്യംചെയ്‌തെങ്കിലും തുമ്പൊന്നും കിട്ടിയില്ല. സജിതയുടെ തിരോധാനം പൊലീസും വീട്ടുകാരും മറന്നു. അപ്പോഴും റഹ്മാന്റെ തണലിൽ വീട്ടുകാരുടെ തൊട്ടടുത്ത് അവൾ ജീവിക്കുന്നുണ്ടായിരുന്നു.
ചുമരുകൾ വിണ്ടുകീറിയ, ഇരുട്ടുമൂടിയ ഒറ്റമുറി. കാലുനീട്ടി കിടക്കാൻപോലും ഇടമില്ല. റഹ്മാന്റെ വീട്ടിലെ മുറിയിലാണ് പത്തുവർഷത്തോളം സജിത കഴിഞ്ഞത്. വിവരം പുറത്തറിഞ്ഞാൽ എന്താവുമെന്ന് ഭയന്നത്തോടെ ഇലക്ട്രീഷ്യനായ റഹ്മാൻ സജിതയെ പുറത്തുകാണിക്കാതിരിക്കാൻ പല ഉപായങ്ങളും തേടി. പുറത്തുനിന്ന് പൂട്ടുമ്പോൾ വാതിലിന്റെ അകത്തുള്ള ഓടാമ്പലും താനേ അടയുന്ന ലോക്കിങ് സിസ്റ്റമായിരുന്നു ആദ്യത്തേത്. പൂട്ടിക്കിടക്കുന്ന ഓടാമ്പലിൽ ആരെങ്കിലും തൊട്ടാൽ ചെറിയ ഷോക്കടിക്കും.
അതിനാൽ റഹ്മാൻ ജോലിക്കുപോകുമ്പോഴും വീട്ടിലുള്ളവർ വാതിലിൽ തൊടില്ല. പ്രാഥമിക കൃത്യനിർവഹണങ്ങൾക്ക് രാത്രിമാത്രമാണ് സജിത പുറത്തേക്കിറങ്ങുക. ഇതിനായി മുറിയിലുള്ള ചെറിയ ജനലിലെ അഴികൾ എടുത്തുമാറ്റി. ആരോടും മിണ്ടാതെ മുറിക്കകത്തിരിക്കുന്ന സജിത ജോലികഴിഞ്ഞ് റഹ്മാൻ വരുമ്പോൾ മാത്രമാണ് സംസാരിക്കുക. അപ്പോഴെല്ലാം മുറിയിലെ ചെറിയ ടി.വി. ശബ്ദംകൂട്ടിവെച്ചു. അങ്ങനെ വീട്ടുകാരെ പറ്റിച്ചു. തനിക്ക് ഭ്രാന്തുണ്ടെന്ന തോന്നൽ പോലും കാമുകിക്ക് വേണ്ടി റഹ്മാൻ സൃഷ്ടിച്ചു.
റഹ്മാൻ മുറിപൂട്ടാൻ വാതിലിന് അകത്തും പുറത്തും യന്ത്ര സംവിധാനം ഘടിപ്പിക്കുകയാണ് ചെയ്തത്. സ്വിച്ചിട്ടാൽ ലോക്കാവുന്ന ഓടാമ്പലും സജ്ജീകരിച്ചു. രണ്ടുവയറുകൾ വാതിലിന് പുറത്തേക്കിട്ടിരുന്നതിൽ തൊട്ടാൽ ഷോക്കടിക്കുമെന്ന ഭയം വീട്ടുകാരിലുണ്ടാക്കി. ജനലഴി ഇളക്കിമാറ്റി. വാതിലിനു പിറകിലൊരു ടേബിളും ചേർത്തുവച്ച് പ്രണയിനിക്ക് സുരക്ഷയൊരുക്കി. മുറിയിലിരുന്നാൽ വീട്ടിൽ വരുന്നവരെയും പോകുന്നവരെയും വാതിൽപ്പാളിയിലൂടെ കാണാം. രാത്രിയിൽ പുറത്തിറങ്ങുന്നതിന് പുറമെ പകൽസമയത്ത് ആളില്ലാത്ത സമയം കണ്ടെത്തി ടോയ്‌ലറ്റിൽ പോയി. വസ്ത്രങ്ങൾ വൃത്തിയാക്കി.
മൂന്നുമാസംമുമ്പ് വീട്ടിൽനിന്ന് റഹ്മാനെ കാണാതായി. പൊലീസ് അന്വേഷണത്തിനിടെ, റഹ്മാനെ നെന്മാറയിൽവെച്ച് സഹോദരൻ കാണുകയും പൊലീസിൽ അറിയിക്കുകയുംചെയ്തു. താൻ ഇപ്പോൾ വാടകവീട്ടിലാണെന്നും ഒപ്പം സജിതയും ഉണ്ടെന്നും ചോദ്യംചെയ്യലിൽ പറഞ്ഞതോടെയാണ് പ്രണയകഥ പുറത്തായത്. റഹ്മാന്റെ വീട്ടിലെത്തിയ പൊലീസിനോട്, റഹ്മാനും സജിതയും പത്തുവർഷത്തെ ജീവിതം വിവരിച്ചു.
പ്രായപൂർത്തിയായതിനാൽ ഇരുവരും സ്വന്തം ഇഷ്ടപ്രകാരം ഒരുമിച്ച് താമസിക്കുകയാണെന്ന് മൊഴിനൽകിയതോടെ പൊലീസ് നടപടികൾ അവസാനിപ്പിക്കുകയായിരുന്നു. ഇരുവരും ഒരുമിച്ച് താമസിച്ചെങ്കിലും നിയമപരമായി വിവാഹിതരായിരുന്നില്ല
