അപൂർവ്വയിനം തിമിംഗലത്തെ അബുദാബിയിൽ കണ്ടെത്തി

അബുദാബി: അപൂർവ്വയിനം തിമിംഗലത്തെ അബുദാബിയിൽ കണ്ടെത്തിയെന്ന് അധികൃതർ. സമുദ്ര സർവേകളിലൂടെയാണ് 12 മീറ്ററിലധികം നീളമുള്ള അപൂർവ്വയിനം ബ്രൈയിഡ് തിമിംഗലത്തെ കണ്ടെത്തിയതെന്ന് പരിസ്ഥിതി ഏജൻസി-അബുദാബി അറിയിച്ചു.

ബലീൻ തിമിംഗല സ്പീഷിസിൽപ്പെട്ടതാണ് ബ്രൈയിഡ് തിമിംഗലങ്ങൾ. സാധാരണയായി 12 മുതൽ 16 മീറ്റർ വരെയാണ് ഇവയുടെ നീളം. 12 മുതൽ 22 ടൺ വരെ ഭാരമുണ്ടാകും.

അബുദാബിയിൽ തിമിംഗലത്തെ കണ്ടെത്തിയത് എമിറേറ്റിലെ വെള്ളത്തിന്റെ ഉയർന്ന ഗുണനിലവാരമാണ് സൂചിപ്പിക്കുന്നതെന്ന് പരിസ്ഥിതി ഏജൻസി പറഞ്ഞു.

കടലിൽ ഇത്തരം തിമിംഗലങ്ങൾ ശ്രദ്ധയിൽപ്പെട്ടാൽ അവയിൽ നിന്ന് സുരക്ഷിത അകലം പാലിക്കണമെന്ന് ഏജൻസി അഭ്യർത്ഥിച്ചു. ഏതെങ്കിലും അപൂർവ്വയിനത്തിൽപ്പെട്ടതോ അസാധാരണമോ ആയ ജീവികളെ കണ്ടാൽ അബുദാബി സർക്കാർ കോൺടാക്ട് സെന്ററിന്റെ 800555 എന്ന നമ്പരിൽ ബന്ധപ്പെടണമെന്ന് അധികൃതർ കൂട്ടിച്ചേർത്തു.