ഇന്ത്യയ്ക്ക് വീണ്ടും സഹായ ഹസ്തവുമായി സൗദി; 60 ടൺ ഓക്സിജൻ കൂടി അയച്ചു

റിയാദ്: കോവിഡ് രണ്ടാം തരംഗം ശ്വാസംമുട്ടിച്ച ഇന്ത്യയ്ക്ക് വീണ്ടും സഹായ ഹസ്തവുമായി സൗദി അറേബ്യ. ഇന്ത്യയുടെ കോവിഡ് പോരാട്ടത്തിന് പിന്തുണ അറിയിച്ച് സൗദി 60 ടൺ ലിക്വിഡ് ഓക്സിജൻ കൂടി ഇന്ത്യയിലേക്ക് അയച്ചു.മൂന്ന് കണ്ടെയ്നറുകളിലായാണ് ഓക്സിജൻ ഇന്ത്യയിലേക്ക് അയച്ചത്. ഇത് ജൂൺ ആറിന് മുംബൈയിലെത്തും.

ഓക്സിജൻ ക്ഷാമം രൂക്ഷമായ പശ്ചാത്തലത്തിൽ നേരത്തെ 80 ടൺ ലിക്വിഡ് ഓക്സിജനും ചികിത്സാ സഹായങ്ങളും സൗദി ഇന്ത്യയിലേക്ക് അയച്ചിരുന്നു. കോവിഡ് പ്രതിസന്ധിയിൽ സൗദി അറേബ്യ നൽകിയ സഹായത്തിന് ഇന്ത്യൻ പെട്രോളിയം മന്ത്രി ധർമേന്ദ്ര പ്രധാൻ ട്വിറ്ററിലൂടെ നന്ദി അറിയിച്ചു. ഇരുരാജ്യങ്ങളും തമ്മിലുള്ള സൗഹൃദത്തിന്റെ ആഴം പ്രതിഫലിപ്പിക്കുന്നതാണ് ഈ നടപടിയെന്ന് അദ്ദേഹം ട്വീറ്റ് ചെയ്തു.