തിരുവനന്തപുരം പോത്തൻകോട് ടെക്‌സ്‌റ്റൈൽസിൽ മോഷണം; ഷർട്ടുകളും, വാച്ചുകളും, കണ്ണടകളും കവർന്നു; പൊലീസ് അന്വേഷണം തുടങ്ങി

തിരുവനന്തപുരം: ഹെൽമറ്റ് ധരിച്ചെത്തി പോത്തൻകോട് ടെക്‌സ്‌റ്റൈൻസിൽ മോഷണം. ബൈക്കിലെത്തിയ രണ്ടുപേരാണ് ജീവനക്കാരനെ കബളിപ്പിച്ച് മോഷണം നടത്തി കടന്നുകളഞ്ഞത്. വെള്ളിയാഴ്ച ഉച്ചയ്ക്കാണ് പോത്തൻകോട് വെഞ്ഞാറമൂട് റോഡിലെ കടയിൽ മോഷണം നടന്നത്.

ഹെൽമറ്റ് ധരിച്ചെത്തിയ ഇവർ ജീവനക്കാരനെ കബളിപ്പിച്ച് ഷർട്ടുകളും, വാച്ചുകളും, കണ്ണടകളും കവർന്നു. രാത്രി സ്റ്റോക്ക് പരിശോധനയ്ക്കിടെയാണ് മോഷണം മനസ്സിലായത്. സിസിടിവിയിൽ നിന്ന് മോഷ്ടാക്കളുടെ ദൃശ്യം കിട്ടിയിട്ടുണ്ട്.

കടയിലേക്ക് കയറുമ്പോൾ തന്ന വാച്ചുകൾ മോഷ്ടിക്കുന്നത് സിസിടിവിയിൽ വ്യക്തമാണ്. ഷർട്ടുകൾ നോക്കാൻ ഒരാൾ നിൽക്കുമ്പോൾ രണ്ടാമനാണ് മോഷണം നടത്തുന്നത്. സിസിടിവിയിൽ മോഷ്ടാക്കളിൽ ഒരാളുടെ മുഖം വ്യക്തമായിട്ടുണ്ട്. പോത്തൻകോട് പൊലീസ് കേസെടുത്ത് അന്വേഷണം തുടങ്ങിയിട്ടുണ്ട്.