നിങ്ങൾക്കും ഇനി യുഎഇ പൗരനാകാം; ചരിത്രപരമായ പൊളിച്ചെഴുത്തുമായി എമിറേറ്റുകൾ; നിക്ഷേപകർക്കും ഡോക്ടർമാർ അടങ്ങിയ പ്രൊഫഷണലുകൾക്കും അവസരം; വിദേശികൾക്ക് യുഎഇ പൗരത്വം എടുക്കാൻ അറിഞ്ഞിരിക്കേണ്ട കാര്യങ്ങൾ

ദുബായ്: യുഎഇയുടെ ചരിത്രത്തിൽ തന്നെ ഏറ്റവും ശ്രദ്ധേയമായ നിയമഭേദഗതിയാണ് ഇപ്പോൾ രാജ്യത്ത് നടപ്പാക്കുന്നത്.പൗരത്വ നിയമത്തിൽ ചരിത്രപരമായ ഭേദഗതിക്ക് അംഗീകാരം ലഭിച്ചതോടെ പ്രവാസികൾ ഉൾപ്പടെയുള്ളവർ ആഹ്ലാദത്തിലാണ്. നിക്ഷേപകർ, പ്രഫഷനലുകൾ, പ്രതിഭകൾ, കലാകാരന്മാർ, ഇവരുടെയെല്ലാം കുടുംബങ്ങൾ തുടങ്ങിയവർക്കാണ് പൗരത്വം ലഭിക്കുക. തങ്ങളുടെ യഥാർഥ പൗരത്വം ഇതോടൊപ്പം നിലനിർത്തുകയും ചെയ്യാം.

മലയാളികളടക്കം ഒട്ടേറെ ഇന്ത്യക്കാർ ഈ മേഖലകളിൽ ശ്രദ്ധേയരാണ്. യുഎഇയുടെ വികസനത്തിനും വളർച്ചയ്ക്കും വേണ്ടി പ്രവർത്തിക്കുന്നവർക്കുള്ള ആദരവാണ് പൗരത്വനിയമ ഭേദഗതിയെന്ന് അധികൃതർ പറഞ്ഞു. കിരീടാവകാശിയുടെ കോർട്, എക്‌സിക്യുട്ടീവ് കൗൺസിലുകൾ, ഫെഡറൽ മന്ത്രിസഭ എന്നിവ കൂടിച്ചേർന്നാണ് ഇതുസംബന്ധമായി തീരുമാനമെടുക്കുക. പൗരത്വം ലഭിക്കുന്നവർക്ക് ഒട്ടേറെ സർക്കാർ ആനുകൂല്യങ്ങൾ ലഭ്യമാകും.

നിക്ഷേപകർ, ഡോക്ടർമാർ, സ്‌പെഷ്യലിസ്റ്റുകൾ, ഉപജ്ഞാതാക്കൾ, ശാസ്ത്രജ്ഞർ, പ്രതിഭകൾ, ബുദ്ധിജീവികൾ, കലാകാരന്മാർ എന്നിവർക്കോ ഇവരുടെ കുടുംബാംഗങ്ങൾക്കോ ആണ് പൗരത്വത്തിന് അനുമതി ലഭിക്കുക. ഇവർക്കുള്ള കൃത്യമായ നിബന്ധനകളും പുറപ്പെടുവിച്ചിട്ടുണ്ട്.

നിബന്ധനങ്ങൾ എങ്ങിനെ

നിക്ഷേപകർ

നിക്ഷേപകർക്ക് യുഎഇയിൽ സ്വന്തമായി സ്വത്തുവകകൾ ഉണ്ടായിരിക്കണം.

ഡോക്ടർമാരും സ്‌പെഷ്യലിസ്റ്റുകളും

യുഎഇയിൽ അനിവാര്യജോലി ചെയ്യുന്നവരായിരിക്കണം. കൂടാതെ, 10 വർഷത്തിൽ കുറയാത്ത പ്രവൃത്തി പരിചയമുള്ളവരുമാകണം. പ്രമുഖ സ്ഥാപനത്തിലായിരിക്കണം ജോലി ചെയ്യുന്നത്.

ശാസ്ത്രജ്ഞർ

യൂണിവേഴ്‌സിറ്റിയിലോ, ഗവേഷക കേന്ദ്രത്തിലോ, സ്വകാര്യ മേഖലയിലോ ഗവേഷകരായിരിക്കണം. ഈ മേഖലയിൽ 10 വർഷത്തിൽ കുറയാത്ത പ്രവൃത്തിപരിചയം വേണം. ശാസ്ത്രഗവേഷണത്തിൽ രാജ്യത്തിന് എന്തെങ്കിലും സംഭാവന നൽകിയതിന് അംഗീകാരം ലഭിച്ചവർക്കായിരിക്കും മുൻഗണന.യുഎഇയിലെ ഏതെങ്കിലും ശാസ്ത്ര സ്ഥാപനത്തിൽ നിന്നുള്ള അംഗീകാരപത്രം നിർബന്ധമാണ്.

 ഉപജ്ഞാതാക്കൾ

യുഎഇ സാമ്പത്തിക വകുപ്പിൽ നിന്നോ മറ്റേതെങ്കിലും പ്രമുഖ സ്ഥാപനത്തിൽ നിന്നോ ഏതെങ്കിലും കണ്ടുപിടിത്തത്തിന് യുഎഇ സാമ്പത്തിക മന്ത്രാലയം അംഗീകരിച്ച ഒന്നോ അതിലേറെയോ 'പേറ്റന്റു'കൾ ലഭിച്ചവരായിരിക്കണം. സാമ്പത്തിക മന്ത്രാലയത്തിന്റെ കത്ത് ഹാജരാക്കണം.

 കലാകാരന്മാർ

കലാകാരന്മാരും ബുദ്ധിജീവികളും തങ്ങളുടെ മേഖലകളിൽ പ്രമുഖ സ്ഥാനമുള്ളവരും ഒന്നിലേറെ രാജ്യാന്തര അംഗീകാരങ്ങൾ നേടിയവരുമായിരിക്കണം. ഇതുസംബന്ധമായ സർക്കാർ കത്ത് നിർബന്ധം.

അതേസമയം പൗരത്വം പിൻവലിക്കാനും സർക്കാറിന് അധികാരമുണ്ട്.നിയമാവലികൾ ലംഘിച്ചതായി കണ്ടെത്തിയാൽ യുഎഇ പൗരത്വം പിൻവലിക്കുന്നതാണ്.