പൊള്ളലേറ്റ് മരിച്ചനിലയിൽ വീട്ടമ്മയുടെ മൃതദേഹം സമീപത്തെ ആറ്റിൽ കണ്ടെത്തി; മൃതദേഹം കണ്ടെത്തിയത് സമീപത്തെ കാണാതായതിനെത്തുടർന്ന് നടത്തിയ തിരച്ചിലിൽ; കൂടെ താമസിച്ച മകനെ ചോദ്യം ചെയ്ത് പൊലീസ്

ഇളംകാട് : പൊള്ളലേറ്റു മരിച്ചനിലയിൽ വീട്ടമ്മയുടെ മൃതദേഹം വീടിനു സമീപമുള്ള ആറ്റിൽ കണ്ടെത്തി. ഇളംകാട് ടോപ്പ് പാലത്തിങ്കൽ പരേതനായ വർക്കിയുടെ ഭാര്യ ലീലാമ്മയെ (65) ആണ് മരിച്ചനിലയിൽ കണ്ടെത്തിയത്. ഇന്നലെ രാവിലെ ലീലാമ്മയെ കാണാതായതായി മകൻ ബിപിൻ നാട്ടുകാരെ അറിയിച്ചു. തുടർന്നു നടത്തിയ തിരച്ചിലിൽ ആറ്റിലെ കുഴിയിൽ മൃതദേഹം കണ്ടെത്തുകയായിരുന്നു.

ഇളയ മകൻ ബിപിനും ലീലാമ്മയും മാത്രമാണ് വീട്ടിൽ താമസിച്ചിരുന്നത്. വീടിനു സമീപത്തു നിന്ന് ആറ്റിലേക്ക് ഇറങ്ങാൻ മുൻപ് വഴിയുണ്ടായിരുന്നെങ്കിലും പ്രളയത്തിൽ അതു നശിച്ചിരുന്നു. അതുകൊണ്ടു തന്നെ എങ്ങനെ ആറ്റിൽ എത്തിയെന്നതും ലീലാമ്മയുടെ ശരീരത്തിൽ പൊള്ളലേറ്റത് എങ്ങനെയെന്നതും ഇനിയും വ്യക്തമായിട്ടില്ല.

ബിപിനെ ചോദ്യം ചെയ്യുകയാണെന്നും ശാസ്ത്രീയ തെളിവുകൾ ശേഖരിച്ച് അന്വേഷണം നടത്തിവരികയാണെന്നും പൊലീസ് പറഞ്ഞു. ഫൊറൻസിക്, വിരലടയാള വിദഗ്ദ്ധർ എത്തി തെളിവുകൾ ശേഖരിച്ചു. ബിജുവാണ് ലീലാമ്മയുടെ മറ്റൊരു മകൻ.