ഷാരൂഖ് ബിജെപിയിൽ ചേർന്നാൽ മയക്കുമരുന്ന് പഞ്ചസാരയാവും; പരിഹാസ്യവുമായി മഹാരാഷ്ട്ര മന്ത്രി

മുംബൈ: ഷാരൂഖ് ഖാൻ ബിജെപിയിൽ ചേർന്നാൽ മയക്കുമരുന്ന് പഞ്ചസാരയായി മാറുമെന്ന് മഹാരാഷ്ട്ര മന്ത്രി ഛഗൻ ഭുജ്ബൽ. മയക്കുമരുന്ന് കേസിൽ ഷാരൂഖ് ഖാന്റെ മകൻ ആര്യൻ ഖാൻ പിടിയിലായതുമായി ബന്ധപ്പെട്ട വിഷയത്തിലാണ് എൻസിപി നേതാവ് കൂടിയായ മന്ത്രി ഛഗൻ ഭുജ് ബിജെപിക്കെതിരെ പരിഹാസമുയർത്തിയത്.

ഗുജറാത്തിലെ മുന്ദ്ര തുറമുഖത്ത് നിന്ന് 3000 കിലോ ഹെറോയിൻ പിടിച്ച സംഭവം അന്വേഷിക്കുന്നതിന് പകരം ഷാരൂഖിനെ വേട്ടയാടാനാണ് എൻ.സി.ബിക്ക് താൽപര്യമെന്നും എൻ.സി.പി നേതാവ് കൂടിയായ ഭുജ്ബൽ ആരോപിച്ചു.

ആഡംബര കപ്പലിൽനിന്ന് മയക്കുമരുന്ന് പിടിച്ചെടുത്ത കേസിൽ ജാമ്യത്തിനായുള്ള ആര്യൻ ഖാന്റെ ഹർജികൾ എൻ.ഡി.പി.എസ് കോടതി തള്ളിയിരുന്നു. നിലവിൽ മുംബൈ ആർതർ റോഡ് ജയിലിലാണ് ആര്യൻ ഖാൻ.