ബാങ്കിങ്, പേയ്മെന്റ്, ടെക്നോളജി മേഖലയിൽ പ്രവർത്തിച്ചത് രണ്ട് പതിറ്റാണ്ടിലേറെ; ഏഷ്യയിലെ ഇ-കൊമേഴ്സ് സംരംഭങ്ങളുടെ ചുക്കാൻ പിടിച്ചു; ഇന്ത്യയിൽ മെറ്റയെ ഇനി നയിക്കുക സന്ധ്യ ദേവനാഥൻ

ന്യൂഡൽഹി: ഫേസ്‌ബുക്കിന്റെ മാതൃകമ്പനിയായ മെറ്റയ്ക്ക് ഇന്ത്യയിൽ വനിതാ മേധാവി. സന്ധ്യ ദേവനാഥനാണ് തലപ്പത്തെത്തിയത്. മെറ്റയുടെ ബിസിനസ്സ്, വരുമാന മുൻഗണനകൾ ഉയർത്തുന്നതിനൊപ്പം ദീർഘകാല വളർച്ചയെ പിന്തുണയ്ക്കാനും സന്ധ്യ ദേവനാഥിന് ചുമതലയുണ്ടാകും. 2023 ജനുവരി 1 നായിരിക്കും സന്ധ്യ ദേവനാഥ് ചുമതലയേൽക്കുക.

2000ൽ ഡൽഹി യൂണിവേഴ്‌സിറ്റിയിൽനിന്നു മാനേജ്‌മെന്റ് സ്റ്റഡീസിൽ എംബിഎ പൂർത്തിയാക്കിയ സന്ധ്യ ദേവനാഥന് ബാങ്കിങ്, പേയ്മെന്റ്, ടെക്നോളജി എന്നിവയിലായി 22 വർഷത്തെ സേവനപരിചയമുണ്ട്.

2016ൽ മെറ്റയിൽ ചേർന്ന സന്ധ്യ, സിംഗപ്പൂർ, വിയറ്റ്‌നാം എന്നിവടങ്ങളിൽ മെറ്റയുടെ വളർച്ചയ്ക്കും തെക്കുകിഴക്കൻ ഏഷ്യയിൽ ഇ-കൊമേഴ്സ് സംരംഭങ്ങൾ കെട്ടിപ്പടുക്കുന്നതിലും ചുക്കാൻപിടിച്ചു. ഈ മാസമാദ്യമാണ് മെറ്റയുടെ ഇന്ത്യ മേധാവിയും മലയാളിയുമായ അജിത് മോഹൻ രാജിവച്ചത്.

ഇതിനു പിന്നാലെ വാട്‌സാപ് ഇന്ത്യ മേധാവി അഭിജിത് ബോസും, മെറ്റ (ഫേസ്‌ബുക്) ഇന്ത്യ പബ്ലിക് പോളിസി മേധാവി രാജീവ് അഗർവാളും രാജിവച്ചിരുന്നു. എന്നാൽ ഇവയ്ക്ക് തമ്മിൽ പരസ്പര ബന്ധമില്ലെന്നാണ് കമ്പനി വൃത്തങ്ങളുടെ വിശദീകരണം. ഫേസ്‌ബുക് കഴിഞ്ഞ ദിവസം നടത്തിയ പിരിച്ചുവിടലുമായും ഇതിനു ബന്ധമില്ല.

22 വർഷത്തെ പരിചയവും ബാങ്കിങ്, പേയ്മെന്റ്, ടെക്നോളജി എന്നിവയിൽ അന്താരാഷ്ട്ര കരിയറും ഉള്ള ഒരു ആഗോള ബിസിനസ് ലീഡറാണ് സന്ധ്യ ദേവനാഥൻ. 2016-ൽ മെറ്റയിൽ ചേർന്ന സന്ധ്യ ദേവനാഥൻ സിംഗപ്പൂർ, വിയറ്റ്‌നാം ബിസിനസുകളും ടീമുകളും അതുപോലെ തെക്കുകിഴക്കൻ ഏഷ്യയിലെ മെറ്റയിലെ ഇ-കൊമേഴ്സ് സംരംഭങ്ങളും കെട്ടിപ്പടുക്കാൻ സഹായിച്ചു. തന്റെ പുതിയ പദവിയിൽ, സന്ധ്യ ദേവനാഥൻ മെറ്റാ ഏഷ്യ-പസഫിക്കിലെ വൈസ് പ്രസിഡന്റ് ഡാൻ നിയറിക്ക് റിപ്പോർട്ട് ചെയ്യും.

2020-ൽ, ആഗോളതലത്തിൽ മെറ്റയുടെ ഏറ്റവും വലിയ നിക്ഷേപ മേഖലയായ ഏഷ്യ-പസഫിക് മേഖലയിൽ കമ്പനിയുടെ മുന്നേറ്റത്തിന് നേതൃത്വം നൽകാൻ സന്ധ്യ ദേവനാഥന് കഴിഞ്ഞു.

തൊഴിൽ രംഗത്ത് സ്ത്രീകളുടെ നേതൃത്വത്തെ പ്രതിനിധ്യത്തെ കുറിച്ച് ശബ്ദമുയർത്തുന്ന വ്യക്തിയാണ് സന്ധ്യ ദേവനാഥാൻ. മെറ്റായിലെ വിമൻ@എപിഎസിയുടെ എക്സിക്യൂട്ടീവ് സ്പോൺസറാണ് സന്ധ്യ. മെറ്റയുടെ ഗെയിമിങ് വ്യവസായത്തിലെ പ്രാതിനിധ്യം മെച്ചപ്പെടുത്തുന്നതിനുള്ള ആഗോള മെറ്റാ സംരംഭമായ പ്ലേ ഫോർവേഡിന്റെ ലീഡുമാണ് സന്ധ്യ.

പെപ്പർ ഫിനാൻഷ്യൽ സർവീസസിന്റെ ഗ്ലോബൽ ബോർഡിലും അവർ സേവനമനുഷ്ഠിക്കുന്നുവെന്ന് മിസ് ദേവനാഥന്റെ ലിങ്ക്ഡ്ഇൻ പ്രൊഫൈൽ പറയുന്നു.