കെ.യു.ഡബ്ല്യു.ജെ സംസ്ഥാന പ്രസിഡന്റ് കെ.പി. റെജിയുടെ ഭാര്യ ആഷ നിര്യാതയായി; അന്ത്യം കോവിഡ് ബാധിച്ച് ചികിത്സയിൽ കഴിയവേ

തിരുവനന്തപുരം: കേരള പത്രപ്രവർത്തക യൂനിയൻ (കെ.യു.ഡബ്ല്യു.ജെ) സംസ്ഥാന പ്രസിഡന്റും 'മാധ്യമം' തിരുവനന്തപുരം യൂനിറ്റ് ന്യൂസ് എഡിറ്ററുമായ കെ.പി. റെജിയുടെ ഭാര്യ ആഷ ശിവരാമൻ നിര്യാതയായി. റാന്നി മക്കപ്പുഴ അപ്‌സരയിൽ റിട്ട. എ.ഇ.ഒ സി.കെ. ശിവരാമന്റെയും റിട്ട. അദ്ധ്യാപിക പി. ശ്രീദേവിയുടെയും മകളാണ്. കോവിഡ് ബാധിച്ച് ചികിത്സയിൽ കഴിയവേയായിരുന്നു അന്ത്യം.

പെരിന്തൽമണ്ണ അൽ ഷിഫ, കോഴിക്കോട് ജെ.ഡി.ടി, കൊട്ടാരക്കര വിജയ, കോഴഞ്ചേരി മുത്തൂറ്റ് നഴ്സിങ് കോളേജുകളിലും കൊൽക്കത്ത ഇൻസ്റ്റിറ്റ്യൂട്ട് ഓഫ് സൈക്യാട്രിയിലും അസോസിയേറ്റ് പ്രഫസർ ആയിരുന്നു. മഹാത്മഗാന്ധി സർവകലാശാലയിൽനിന്ന് റീഹാബിലിറ്റേഷൻ നഴ്‌സിങിൽ പി.എച്ച്ഡി നേടിയിട്ടുണ്ട്.

കഴക്കൂട്ടം സൈനിക് സ്‌കൂൾ വിദ്യാർത്ഥി ദേവനന്ദൻ മകനാണ്. സഹോദരങ്ങൾ: ഹരികൃഷ്ണൻ (കൊണ്ടിനെന്റൽ ബംഗളൂരു), അഭ (ഒറക്കിൾ, ബംഗളൂരു).