മകന്റെ വിവാഹത്തിന് വസ്ത്രമെടുക്കാൻ പോയ വീട്ടമ്മ വാഹനാപകടത്തിൽ മരിച്ചു; അമിതവേഗത്തിലെത്തിയ ടോറസിടിച്ച് മരിച്ചത് മീനടം സ്വദേശിനിയായ വീട്ടമ്മ; ഒന്നര വർഷം മുമ്പ് ഇളയ മകനെ തട്ടിയെടുത്ത വാഹനാപകടത്തിന്റെ അതേ രൂപത്തിൽ ഷൈനി സാമിനും ദാരുണാന്ത്യം

കോട്ടയം:മകന്റെ വിവാഹത്തിന് വസ്ത്രമെടുക്കാൻ പോയ അമ്മ ലോറിയിടിച്ച് മരിച്ചു.മീനടം ചകിരിപ്പാടം ഷൈനി സാം (48) ആണ് അമിത വേഗത്തിൽ എത്തിയ ലോറി ഇടിച്ച് മരിച്ചത്.പാമ്പാടി എട്ടാം മൈലിൽ ഉച്ചയ്ക്ക് 12.30 യോടെയായിരുന്നു അപകടം. മകന്റെ ബൈക്കിന് പിന്നിൽ യാത്ര ചെയ്യുമ്പോഴായിരുന്നു അപകടം സംഭവിച്ചത്.മൂത്ത മകന്റെ വിവാഹം അടുത്തയാഴ്ച നടക്കാനിരിക്കെയാണ് ഷൈനിയുടെ ദാരുണാന്ത്യം.

പിന്നിൽ നിന്നെത്തിയ ടോറസ് ലോറി ബൈക്കിൽ ഇടിക്കുകയായിരുന്നു.ഇടിയുടെ ആഘാതത്തിൽ ടോറസിനടിയിലേക്ക് വീണ ഷൈനിയുടെ ദേഹത്ത് കൂടി വണ്ടി കയറി ഇറങ്ങി തൽക്ഷണം മരണം സംഭവിച്ചു.മകൻ അഖിൽ നിസാര പരിക്കുകളോടെ രക്ഷപ്പെട്ടു. മൃതദേഹം കോട്ടയം മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി.ഷൈനിയുടെ ഇളയമകൻ അനിൽ സാം മാത്യു ഒന്നര വർഷം മുമ്പ് വാഹനാപകടത്തിൽ മരിച്ചിരുന്നു.