മലപ്പുറം: കെട്ടിടത്തിന് മുകളിൽ നിന്നും വൈദ്യുതി ലൈനിലേക്ക് വീണ അതിഥി തൊഴിലാളി ഷോക്കേറ്റ് മരിച്ചു. എടപ്പാളിലാണ് ദാരുണ സംഭവം. ബിഹാർ ചപ്ര ജില്ലയിലെ നയഗോൺ സ്വദേശി രാജു മഹതൊ (42) ആണ് മരിച്ചത്. കെട്ടിടത്തിന് മുകളിൽ നിന്നും രാജു ഫോൺ ചെയ്യുമ്പോൾ കാൽ വഴുതി തൊട്ടു താഴെയുള്ള വൈദ്യുത കമ്പിയിലേക്ക് വീഴുകയായിരുന്നു. എടപ്പാൾ ടൗണിൽ നരണിപ്പുഴ റോഡിലെ കെട്ടിടത്തിൽ കഴിഞ്ഞ ദിവസമാണ് സംഭവം. അപകടം നടന്ന കെട്ടിടത്തിൽ രണ്ട് വർഷമായി താമസിച്ച് വരികയായിരുന്നു രാജു.

എടപ്പാളിൽ വിവിധ പ്രദേശങ്ങളിൽ നിർമ്മാണ ജോലി ചെയ്തു വരികയായിരുന്നു ഇയാൾ. കെട്ടിടത്തിലെ മൂന്നാം നിലയിൽ നിന്നാണ് രാജു വൈദ്യുതക്കമ്പിയിലേക്കു വീണത്. ചങ്ങരംകുളത്തെ സ്വകാര്യ ആശുപത്രി മോർച്ചറിയിൽ സൂക്ഷിച്ച മൃതദേഹം ഇന്ന് പോസ്റ്റ്മോർട്ടത്തിനു ശേഷം ബന്ധുക്കൾക്കു വിട്ടുനൽകി. ഭാര്യ ശാന്താദേവി. മക്കൾ: രോഹിത്, മൊഹിത്. രോഹിത്. എടപ്പാളിൽ അച്ഛനോടൊത്തായിരുന്നു രാജു താമസിച്ചിരുന്നത്.